Read lango Icaya 22 Bible Online

Icaya 22 - lango bible

Icaya 22

¹Man en kop ame orabo ame otiko luŋŋoro ame Obaŋa onyuto iye anyuttogo baŋ Icaya. Ŋo kara ame dok otimere, ame omio wun luŋ itye wunu malo i wi udiwu?

²Piŋo jo i boma luŋ tye aredo kede woo caa ducu, kun iŋatte wunu i yomcuny? Jo meri ame oto i lweny man, mom oneko i pala lweny, mom daŋ onekogi i lweny gire.

³Rwodeni luŋ daŋ onwoŋo oŋweco gigi oko, omakogi ame gin mom ru olwenyo, Obin omako jo luŋ ame onwoŋo, akadi bed mogo rik onwoŋo oŋweco kun abor meicel.

⁴Mannono omio an akobo ni, “Lok waŋwu teŋe, kur inena wunu, weka wunu akok atek pi cwer cuny ame atye kede, ŋattoro kur lolle me kweyo cunya, pien jona oto apol meicel.”

⁵Pien Rwot Obaŋa me mony tye kede nino mere, ame obedo nino me woo, nino me nyono jo piny, kede nino me babaŋo jo luŋ i luŋ ame rik en onyuto iye anyuttogo. Ame en nino me mumuko cel me boma oko dok jo bino redo iye atata i akina kiddi.

⁶Mony ame oya Elam oryoŋo icao aterogi doŋ aryoŋa, aco mony oya Aram otweo aguraguragi i kom gadigadigi kun mony ame oya Kir tye ame doŋ otere oko i kwotgi.

⁷Luŋwu abeco luŋ, gadigadi me romo doŋ oradde iye atata aco wegi aguragura tye ocuŋ oko i dog cel me boma,

⁸Gin a yam Juda geŋere kede doŋ otyeko yabo oko. I kare-naca rik ineno wunu ot me Buŋ,

⁹ineno wunu kite ame apama me paco a Daudi omumuka kede, inwoŋo wunu daŋ yore me coko pii atapara ame tye piny.

¹⁰Ikwano wunu udi luŋ i Jerucalem, irereto wunu udi mogo piny me inwoŋ wunu gweŋe me gero cel atek,

¹¹ikunyo wunu daŋ atapara pii i akina cel aryo me jolo pii me atapara acon. Cite rik mom koŋ itamo wunu pi Obaŋa ame oyiko man con, dok ame omio otimere kittono.

¹²I nino-naca Rwot Obaŋa me mony onwoŋo alwoŋowu me bino koko kede kumo, me bino lyelo yer wiwu kede rukoboŋo cola.

¹³Aco koŋ inen kite ame inyero wunu kede i yomcuny, rommi kede dok omato pala mom twerre, nen riŋo kede koŋo mom rwenyo i dogwu. Itye ka kobo wunu ni, “Wek omatte wunu giwa, ocam wunu daŋ cem, pien diki oto giwa oko.”

¹⁴Rwot me mony onyutte kene baŋa kun kobba ni, “Areteni, mom gire obino timogi kica pi bal man, tuno waŋ ame gin oto i balginono.” Man kop ame Rwot Obaŋa me mony en okobo.

¹⁵Rwot Obaŋa me mony okobo ni, “Biye iwot baŋ Cebna, akan-jami, ame en a loo jami me ot abaka, iwot ipenye ni,

¹⁶‘Tic aŋo ame yin itiyo kan? Dok ŋa ame tye baŋi kan, ame omio yin igolo lyeli piri keni-ni? Piŋo kara iboro lyelli keni i wi kiddi malo?

¹⁷Nen ba, Rwot bino boli oko teŋe kede tek, kadi bed yin ibedo twon lo atek rom kwene. En bino maki atek odoco.

¹⁸En bino doli okuŋ calo odilo te boli teŋe i twon lobo moro alac meicel, ite daŋ to kuno. Ibino to kuno, iŋet gadigadini ame ijany kede woki. Yin ame kelo lewic i ot adwoŋŋi.

¹⁹Abino kwanyi oko i ticci, ate dwoki cen irwom a piny.’ ”

²⁰I nino-nono ka man bino timere, abino lwoŋo amirona Eliakim wot a Kilikia;

²¹abino miyo en rukoboŋŋini me tic kede delli me tweyo pyer kede itambara me tweyo wic, abino dwoko twerri luŋ i ciŋe. En bino bedo acalo apap baŋ jo me Jerucalem kede jo me Juda.

²²Abino miyo twer luŋ me ot a Daudi i wie. Abino miye agony me cego doggola ame en ka ocego ŋattoro mom dok twero yabo, dok ka oyabo ŋattoro mom dok twero cego.

²³Abino miyo en bedo atek acalo teke ame oguro ocuŋ atek, jo me ot a pappere luŋ bino nwoŋo kwogo pire.

²⁴Jo me ot a pappere kede watti mere luŋ bino bedo twon yeccoro apek meicel i wie, Gin luŋ obino ŋabere i kome calo kopo kede cupa ame oŋabo malo,

²⁵Ka man bino timere i ninonaca, teke ame yam onwoŋo oguro atek bino doko alogologo te rette oko piny. Mannono bino bedo agikki a ginnoro luŋ ame yam oŋabere i kome, Man en kop ame Rwot doŋ otyeko kobo.