Read lango Icaya 23 Bible Online

Icaya 23 - lango bible

Icaya 23

¹Man en kop ame Obaŋa okobo ame otiko Turo. Kok wunu ba, wun mel me Tarcic, pien Turo doŋ odoŋ oko nono, aboŋo ottoro onyo waŋ kwaŋŋoro, Onyuttigi koppere i yo dwogogi i Kupro.

²Cuŋ wunu ba mot, wun jo ame bedo i dog nam, wun ocatwil me Cidon. Okwena rik oŋolo nam, gin te bedo i wii pii adoŋodoŋo.

³Lim ame gin rik onwoŋo obedo kal me Cikor, ame gin owilo i dog kulo Nail. Rik yin ibedo acatwil ame cato wil i rok apol.

⁴Lewic myero maki, yin Cidon, pien nam okobo, ka bwot atek me dog nam daŋ okobo ni, “Rem me nywal mom gire ocana, mom daŋ anywal, mom daŋ apito atinnoro naka odoŋo, atin awobi onyo en anyako.”

⁵Kare ame kop man bino winyere i Miciri, cuny jo bino cwer atek meicel me winyo kop i kom Turo,

⁶Wot ikat wunu naka i Tarcic, wot ikok wunu, wun jo ame bedo i dog nam!

⁷Man en boma ame yam malo meicel, en boma ame rik ocakere con meicel, en boma ame yam ocwao okwena oŋolo nam, me wot bedo i lobo mogo ocele.

⁸Ŋa ame oyiko man i kom Turo, boma ame poko tok kwogo me loc, ame ocat willere rik obedo oloc, ame rik obedo jo a pirgi dito meicel i lobo?

⁹Rwot me mony en onwoŋo oyiko, me miyo wakeregi gik oko, me miyo jo ame oketo kwogo i komgi i lobo doko jo amwol.

¹⁰Wot ipur wunu lobo, wun jo ame bedo i Tarcic, pien waŋkwaŋ me Turo mom doŋ tye,

¹¹Rwot doŋ oryeo ciŋe oko i wi nam, en doŋ oyeyeŋo kit loc apapat oko, Rwot doŋ otyeko miyo cik oko i kom Kanaan, ni myero tur ka bwottere atek oko,

¹²En okobo ni, “Lelowu doŋ ogik oko, wun jo me Cidon, aman doŋ odiowu odoco, ame kadi ikat wunu i Kupro, kuno daŋ mom ibino nwoŋo wunu ka weo.”

¹³Koŋ inen wunu lobo ajo Kaldaya! Pe gire jo Acuria. Gin aye rok ame onwoŋo omoko ni Turo bino bedo me a leyi tim. Gin en ogero pem, oyido malo iguŋ kuno, ote mumuko udi adoŋodoŋo i kuno oko, ote daŋ miyo kuno doko wi obur.

¹⁴Kok wunu ba, wun mele me Tarcic, pien ka larrewu atek doŋ oketo oko.

¹⁵I kare-naca wi jo bino wil oko i kom jo Turo pi mwakki pyerabiro twal, ame rom aroma i kare me kwo abaka acel. Kare ame mwakki pyerabiro doŋ otum, Turo bino bedo acalo alaya ame owero ni,

¹⁶“Kwany naŋa opuk ba, wot kede i dye boma, yin alaya ame wi jo owil oko komi-ni! Mi dwone kok amit meicel, wer daŋ wer apopol, me jo dok cak paro piri.”

¹⁷Kare ame mwakki pyerabiro doŋ otum, Rwot dok te bino limo Turo, te dok dwoke i ticcere. En dok bino tic i lobo apapat ame tye i wi podo, kun tio kedgi acalo alaya.

¹⁸Agoba luŋ ame en bino nwoŋo icato willere-nono, mom bino gwoko, akadi kano me nono, ento en bino jalo oko me bedo gin acil baŋ Rwot, obino wilo i cam abup kede boŋŋi abeco pi jo ame tio ticgi i nyim Rwot.