Read lango Icaya 24 Bible Online

Icaya 24 - lango bible

Icaya 24

¹Nen ba, Rwot bino miyo lobo doŋ nono, bino miyo doko wi obur, dok en bino loko lobo oluktuke, te keketo jo iye oko.

²I kare-naca can alamdog bino bedo rom i me a jo ata; can opii bino bedo rom me adwoŋŋere; me aŋica bino medo rom i me imattere; me acatwil bino bedo rom i me awil; me ami-baŋya bino bedo rom i me akopbaŋya; me apid-baŋya bino bedo rom i me a ŋat a tye i baŋya.

³Lobo gire bino doŋ nono aboŋo ginnoro, kun oyako jami iye luŋ; pien man en kop a Rwot doŋ otyeko kobo,

⁴Lobo bino kumo, tekomere te rwenyo oko, wi podo luŋ bino nyobere, tekomere te rwenyo oko, polo kede lobo te nyoŋere oko.

⁵Lobo doŋ oballe gire oko, pi jo ame bedo iye; pien jo doŋ oturo cik Obaŋa oko, mom olubo gin ame Obaŋa ociko, gin oturo daŋ cikere ame perakino atwal.

⁶Mannono omio Obaŋa doŋ oceno lobo oko, jo iye tye aneno can pi rocgi; mannono en omio jo i lobo tye awaŋ, jo anokkoro keken en ame odoŋ.

⁷Koŋo olok daŋ tye akumo, olok daŋ onyonere oko, jo luŋ a cunygi yom tye acucura.

⁸Ajaa mogo ame kok aloŋo pi yomcuny doŋ oliŋ oko, wo a jo ame lelo daŋ oliŋ oko, yomcuny ame mio jo goo naŋa opuk daŋ doŋ pe.

⁹Jo mom dok mato koŋo i wer i dog-gi; omat kono doŋ nwoŋo kec atata i doggi.

¹⁰Jami i boma luŋ doŋ tye atata, udi iye luŋ ocecego oko me jo kur dony iye.

¹¹Jo mwoco koko i dye yo pi koŋo ame orwenyo oko; kit lelo luŋ doŋ ogik gire oko, yomcunyoro doŋ mom nen i wi lobo.

¹²Boma doŋ oweko acalo wi obur, dogcel daŋ oŋiŋinyo oko atitino.

¹³Bino daŋ bedo amannono i wi lobo i akina orok, bino bedo acalo jeituni ame doŋ odepo nyige oko, onyo acalo olok ame opwono nyige oko.

¹⁴Jo woto dwongi, kun owero wer me yomcuny: woogi pi dit a Rwot winyere i tuŋ to,

¹⁵Pi mannono wun jo me tuŋ kide, mi wunu kwogo baŋ Rwot; kede wun jo me dog nam, mi wunu kwogo i nyiŋ Rwot Obaŋa me Icrael.

¹⁶Cakere i agikki piny wan owinyogi owero wer me pako Rwot, Ŋat Acil kwogo mere dwoŋ nadi! Ento an ate gamo ni, “Ajony ikokoro, Ajony ikokoro, Can i wia doi! Pien odot jo otany oko iyi adote, odot jo doto jo arac meicel.”

¹⁷Lworo kede bur, kede owic, bino makowu, wun jo ame bedo i lobo.

¹⁸Ŋat oŋweco woo akelo lworo, bino poto i bur, ka ce en oyito oko i bur, bino moko i yi owic. Pien polo tye ame oyabere oko, acakki me lobo tye ayeŋere.

¹⁹Lobo gire doŋ oŋinyere odoco, lobo doŋ obarre oko i dyere, lobo otagere atek meicel.

²⁰Lobo doŋ tagere bala amer kono yeyeŋa calo gano; ballere dwoŋ onue oko, orette ame mom dok twero ya,

²¹I kare-nono Rwot bino keto can i kom mony me polo, i polo kuno, kede i lobo kan, i kom obakki me lobo.

²²Gin luŋ obino doko obuc, ote cokogi karacel i bur; obino cegogi oko i ot kol, ote keto can i komgi kun kare alalac doŋ okato.

²³Alee te twodo dwe oko, lewic daŋ te mako ceŋ oko; pien Rwot me mony bino bedo abaka i wi kidi me Cion, kede i Jerucalem, bino nyuto kwogo mere i nyim odoŋe mere.