Read lango Icaya 25 Bible Online

Icaya 25 - lango bible

Icaya 25

¹Ama Rwot, yin Obaŋana; abino dwori, dok abino pako nyiŋi, pien yin itio tic me aura meicel, icobo gin a yam iyiko con, i gen kede ateni.

²Ilokoboma odoko wi obur; anaka boma luŋ ame ocelo atek, udi orok daŋ odoko wi obur; mom dok obino gedo kakare atwal.

³Mannono bino miyo rok atekkege keto kwogo i komi; boma a rok luŋ a mom i kica bino lwori.

⁴Pien yin ibedo kan atek ame laro ocan, yin kan atek ame laro jo ame piny oloo, yin ka gwoko yamo, kot kede woo ka ceŋ lyet; pien ewura dog jo a mom i kica calo yamo kot ame bukoro iyi apama, onyo calo lyeto ka piny doŋ otwo.

⁵Yin doŋ ijuko woo okwor; mannono omio wer a jo a mom i kica oliŋ, calo tipo me pol ame kweo lyeto.

⁶Rwot me mony bino tedo arama pi rok luŋ i wi kidi me Cion, arama me riŋo mogo amio, kede me koŋo olok ocek amit meicel kede riŋo amio, ame moo cogo dwoŋ iye ata, kede koŋo olok ame olio aber te cek amit meicel.

⁷Dok en bino yeyeco boŋo cola ame owumo i rok ducu, iwi kidi man, kede tambara ame gin obedo ruko i kare me kwero

⁸Rwot Obaŋa bino mwonyo to oko atwal, dok Rwot Obaŋa bino weyo pig waŋ jo ducu, te kwanyo lewic i wi jo mere oko i nyim jo luŋ i wi lobo; pien Rwot okobo.

⁹I nino-naca obino kobo ni, “Nen ba, man en Obaŋawa ame obedo kuro me larowa, Man en Rwot ame obedo kuro; olel wunu doŋ i yomcuny pi kite a en olarowa kede.”

¹⁰Pien ciŋ Rwot bino we i wi kidi me Cion, aco Moab obino nyono piny i kabedo mere, kite ame dok nyono kede reŋ kal i bur opwoc.

¹¹Jo Moab bino ryeyo badgi iye kite ame lo a kwan ryeo kede bade me kwan; ento Rwot bino miyo awaka mere gik oko karacel kede dito me ciŋe.

¹²Apama celgi ame ogero ocuŋ iguŋ malo-nu obino miyo dok oko piny, ote coro reto piny i lobo, naka iyi apua.