Read lango Icaya 26 Bible Online

Icaya 26 - lango bible

Icaya 26

¹I nino-naca obino wero wer man i lobo me Juda, ni, “Wan otye kede boma atek odoco; Rwot en omio larre tye, cellere tye ame omane amana.

²Yab wunu dogcel oko, me jo me rok a kitegi atira, ame genne, dony iye.

³Ŋat ame tammere tye i komi, yin imio bedo i kuc me ateni, pien gennere tye i komi.

⁴Ket gen i kom Rwot nakanaka, pien Rwot Obaŋa en twon lela atek a mom balle atwal.

⁵Pien en odwoko piny jo ame yam bedo i boma otiŋere malo. En ocorogi piny, ocorogi piny i lobo, oretogi kom piny i apua.

⁶Jo doŋ nyonogi i tyengi, tyen ocan, kede me jo ame piny oloo.”

⁷Yo a ŋat a kite atira lubo tur pe iye, yo mere-nono yin en iyiko.

⁸Ama Rwot, wan okuri, i yo ame inyuto i cikki cunywa tye kom i nyiŋi, dok daŋ oparo piri meicel.

⁹Oparo piri dyewor, tipona i yia dilo ibai me yenyi. Pien ka yin iŋolo kop lobo, jo ame bedo iye pwonyo kite atira.

¹⁰Ŋat arac kadi bed tim ber, mom pwonyere me bedo dano a kite atira; en bedo timo tim a mom atirai lobo a jo a kite-gi atira, kun mom neno dit a Rwot.

¹¹Ama Rwot, badi gire tye otiŋere malo, cite okworri gire mom oneno. Mi lewic makgi, Ama Rwot. Migi onen mitkomi i kom joni. Mi mac ame iyiko pi kodi jo-nono tyekgi oko.

¹²Ama Rwot, ibino miyowa obedo kede kuc, pien ticwa luŋ yin en itio pirwa.

¹³Ama Rwot Obaŋawa, rwode ocele, a mom yin, yam oloowa, cite wan otuco ka nyiŋi keken.

¹⁴Gin doŋ oto oko, mom dok obino bedo kwo! Gin doŋ odoko tipo, mom dok otwero ya malo! Yin ilimogi ite tyekogi oko, imio wi jo doŋ owil oko i komgi.

¹⁵Ento yin giri doŋ imio rok man onya, Ama Rwot, yin giri doŋ imio rok man onya; yin giri doŋ imio jo oketo kwogo i komi; yin doŋ imio waŋ lobowa odoko alac.

¹⁶Ama Rwot, wan olokere baŋi canwa; ka ce iketo can i komwa, wan okelo kwacwa i nyimi.

¹⁷Ocalo dako ame tye ka minne irem, kun twetwenya i koko pi remmere, wan daŋ onwoŋo otye kittono i nyimi, Ama Rwot.

¹⁸Wan obedo minne i rem, cite olunyo nywalo ka yamo. Mom tye loccoro ame wan oloo pi lobowa, mom tye ginnoro ame otio otyeko.

¹⁹Joni oto bino dok kwo, komgi oto-nono bino dok cer. Wun jo ame bedo i yi apua, co wunu oko me iwer wunu pi yomcuny! Pien toyoni, en toyo me lero, pi mannono, yin, ibino miyo toyo bedo tye i lobo a jo a yam doŋ oto oko.

²⁰Bye idony wunu i tyelo wun jona, ite cego wunu doggola oko; pon wunu koŋ kuno pi kare moro anonok, tuno waŋ ame akemo a Rwot doŋ okato oko.

²¹Pien, nen, Rwot tye abino kun ya i kabedo mere pi keto can i kom jo abedo i lobo pi balgi, remo ame oony i lobo bino nen kannaler, kun daŋ mom doŋ wumo kom jo oto.