Read lango Icaya 29 Bible Online

Icaya 29 - lango bible

Icaya 29

¹Ariel oneno can nadi, Ariel ame en boma ame Daudi onwoŋo oguro kema mere iye! Wek wunu mwakki koŋ kat aryo adekkoro kun ibedo kwero wunu ecubaŋ apapat i karegi.

²Cite abino wuno Ariel; koko kede kumo bino bedo tye iye, calo keno lam me waŋo leyi ame oŋolo me yala,

³Abino guro kemana i ŋeti kun guri dyere, abino guri dyere i pemmogo ocuŋ malo iguŋ, abino toro lobo ayido i nyimwu calo cel.

⁴Abino dwoki piny i te lobo twal, ibino kop i piny iyi apua, dwoni bino donyo i te lobo calo dwonjok, kopi bino winyere i weewee kun donyo iyi apua.

⁵Cite okwori bino bedo apipim calo apua, kede jo a kica mom i cunygi bino bedo calo cuŋ kal a yamo kolo,

⁶Eka cucut, i kare-nono, Rwot me mony te limi, kun mio kot mwomwoca, oyeŋo bedo tye, kede woo bedo dwoŋ, yamo ajuru, yamo kot, karacel kede maccoro ager meicel.

⁷Lwak mony apipim me rok apapat ame lwenyo i kom jo me Ariel, jo luŋ ame lwenyo i komgi kede i kom kan atek me larregi, ame wunogi, gin luŋ obino doko calo lek, gin ame Obaŋa nyuto dyewor.

⁸Kite a calo lo a kec aneko leko ni etye ka cam, eka te coo ame iye ginnoro mom iye. Onyo acalo lo orwo pii ociro leko ni atye emato pii, eka te co ame oryo pii ociro atek, kun mito mato pii; lwak rok luŋ lwenyo i kom kidi me Cion, daŋ bino bedo kittono.

⁹Baŋere wunu kenwu me ibed wunu omino, Babalo wunu waŋwu kenwu me ibed wunu otowaŋ! Mer wunu, aboŋo koŋo; gagata wunu, aboŋo koŋo moro akec!

¹⁰Pien Rwot doŋ ocoro i komwu cuny me nino atek; owuno daŋ waŋwu oko, ame gin odwarpinywu; kede wiwu daŋ owumo oko ame gin jo a neno piny.

¹¹Gin Obaŋa nyuto baŋ odwarpiny luŋ doŋ odoko calo buk ame omwono doge oko i tu baŋwu. Ame ka omio baŋ dano moro ame ŋeo kwan kun kobbe ni, “Biye ikwan man”, en gamo ni, “Pe gira atwero kwano pien omwono doge oko,”

¹²Dok daŋ ka omio bukkono baŋ ŋat a kwia kwan, kun kobbe ni, “Biye ikwan man,” en gamo ni, “Pe gira atwero kwano.”

¹³Rwot te doŋ kobo ni, “Rok-ki kara noka ceggii doggi nono, owora daŋ i doggi nono, cunygi kara bor keda lworo ame gin lwora kede-ni kara cik a dano ame opwonyogi kede apwonya;

¹⁴pi mannono ba, dok abino timo gin me aura i kom rok man, gin me awura, dok me taŋo meicel; ame mio ryeko rweny i jo aryek oko.”

¹⁵Jo ame kanni Rwot tamgi oko kan atut, jo ame tio ticgi kan acok, jo-nono bino neno can, dok ame okobo ni, “Ŋa kara ame nenowu? Ŋa kara ame ŋeowu?”

¹⁶Koŋ inen kite ame wun iloko wunu kede jami oluktuke! Otwero poro acwe-gulu kede lobo cweyo gulu? Gin ame otio atia twero kobbi ŋat ocwee ni, “Pe gire yin icwea?” Onyo gin ocweo twero kobbi ŋat ocwee ni, “Mom gire iŋeo ginnoro?”

¹⁷Odoŋ kare anonok meicel eka Lebanon te doko poto ame ceko cem abup meicel, kun poto ame yam ceko cem meicel olokere odoko buŋ.

¹⁸I nino-nono jo a yitgi odiŋ bino winyo kop i buk otowaŋ daŋ waŋgi bino yabere, kun oya i mutu kede colpiny.

¹⁹Jo amwol bino dok nwoŋo yomcuny i Rwot, ocan bino lelo i Ŋat Acil me Icrael.

²⁰Pien jo a mom i kica gire bino bedo pe, wegi aŋale daŋ bino tum, oko, olib jo dyewor me timo tim areco obino miyo waŋgi rwenyo oko,

²¹jo ame pi kopgi mio kop loo dano, ame ciko owic pi ŋat ame jukogi i dogcel me boma, ame cwao ŋat a kite atira teŋe pi koppogo a tere mom.

²²Mannono omio Rwot ame rik olaro Iburaim, okobo kop i kom ot a Yakobo ni, “Lewic mom dok bino mako Yakobo, waŋe mom dok bino balle,

²³Pien ka en bino neno itino mere, ame gin obedo tic me ciŋa, kun tye baŋe, gin bino miyo nyiŋa bedo me awora; gin bino ŋeyo ni Ŋat Acil a Yakobo gire cil, gin bino bedo kede lworo i kom Obaŋa me Icrael.

²⁴Jo ame gak oko i cunygi bino niaŋ, kede jo ame ŋunura daŋ bino ye pwonnyi.”