Read lango Icaya 3 Bible Online

Icaya 3 - lango bible

Icaya 3

¹Pien, koŋ inen ba, Rwot, ame obedo Rwot me mony, tye ka kwanyo oko baŋ Jerucalem kede Juda, ginnoro luŋ ame kwogi ojeŋere iye, cam luŋ ame kwogi ojeŋere iye, kede pii daŋ ame kwogi ojeŋere iye;

²jo atek kede jo me mony, oŋolkop kede odwarpiny, otyet kede odoŋe,

³otel jo pyerabic kede jo me awora, omi-tam kede emuroko aryekkege, kede oryeko me tiyo irizi.

⁴Abino miyo awobe en ame bedo olocgi, itino atino en ame bino loyogi.

⁵Jo bino bedo wuwuna kengi kengi, kun ŋat man wuno awottere, dano acel acel wuno dano wadgi; awobi bino nywaro adwoŋ, lo moro a piny meicel bino nywaro lo oworo.

⁶I nino-nono dano bino mako ominnere i ot a pappere, kun kobo ni, “Yin itye kede ruk, yin ibino bedo alocwa, wi obur man bino bedo te locci”.

⁷I nino-nono en bino kobo ni, “An gira mom abino bedo acaŋdano; ogati kede ginnoro me aruka gira pe i oda; pe gire ibino keta wuno me bedo ŋat ame loo lwak.”

⁸Pien Jerucalem mio jo buco rette, aco Juda doŋ opoto oko; Pien kop ame gin kobo kede gin ame gin timo tiko gire Rwot, gin ojem i kome kede i kom kwogo mere.

⁹Kitegi me yero jo ayera bino bedo caden i komgi; gin orabo pi balgi calo Codom, mom gigi okano balgi. Gin bino neno can meicel! Pien gin okelo can i komgi kengi.

¹⁰Tittii jo a kitegi atira ni, gin gigi obino bedo aber, pien gin obino camo gin ame oya i ticgi.

¹¹Jo a kitegi reco bino neno can meicel! Meggi bino bedo arac okato kare; pien gin ame ciŋgi otimo, en ame daŋ obino timo i komgi.

¹²Itino ame wuno jona, mon en ame loogi: Ama jona, otelwu rwenywu arwenya, gin odwadwalowu oko i yowu.

¹³Rwot doŋ gire obino oko, en ocuŋ me ŋolo kop i kom jo mere,

¹⁴Rwot doŋ ocako piddi jo oko, ocako piddi odoŋe a jo mere kede olocgi. “Wun en ame icamo wunu poto olok, jami ame iyako wunu i baŋ ocan tye i udiwu,

¹⁵Kara piŋo iŋiŋinyo wunu jona, kun irego wunu waŋ ocan oko?” Man kop a Rwot me mony.

¹⁶Rwot okobo ni, “Pien anyira me Cion wakere, owoto ame onyedo ŋutgi anyeda, kun oneno jo i waŋ me alaya, ocwinyo wot acwinya i wi tyengi kun oyeyeŋo mola tyengi gito koko ogita.

¹⁷Pi mannono, Rwot bino miyo wi anyira me Cion duduga, Rwot daŋ bino miyo komgi doŋ nono.”

¹⁸I nino-nono Rwot bino kwanyo mola me tyengi abeco oko, kede tigo otokome tur nyimgi, kede mola me cal dwe;

¹⁹mola ŋut ame ryeny aryenya, mola ŋut ciŋ, kede tambara me adwala i ŋut;

²⁰boŋŋigi me atwea i wie, mola me bat, alid tweyo pyer, cupa moo wir, irizi me gwoko kom;

²¹atem me ciŋ, kede mola um;

²²boŋŋigi abeco me aruka i nino adoŋo, gomicigi, boŋŋigi me wumere, kede cao ciŋ;

²³rukkogo arerep, boŋŋi camanini, tambara adwala i wic kede tambara me geŋo waŋ.

²⁴Akaka moo akur bino bedo gin otop; akaka tambara pyer, bino bedo tol; akaka yer akeda, bino lyedo; akaka boŋŋigi mogo me wel, boŋo cola en ame bino bedo i pyergi; akaka nen amwonya, bino bedo lewic.

²⁵Cogwu bino to i pala lweny, jowu atekkege bino to i mony,

²⁶Kumo kede kokome can bino winyere i dogcellere, bino bedo acalo dako ame oyako jami mere luŋ, ame obedo piny i lobo.