Read lango Icaya 30 Bible Online

Icaya 30 - lango bible

Icaya 30

¹Otino amejem bino neno can, “Rwot okobo. “Jo ame cobo tamgi, ame mom mega; dok ame notte kede rok ame cunya mom mito, me medo bal i kom bal;

²ame ocako wotgi me wot i Miciri aboŋo koŋ penyo tamma, wek olar baŋ Parao me gwokgi, dok oyeny ka pono i tipo me Miciri!

³Pi mannono ba, ka-gwokerewu i baŋ Parao bino lokere miowu lewic, dok tipo me ponowu i Miciri bino miyo alee twodowu,

⁴Pien kadi bedo odoŋe mere tye Zoan, dok okwena mere tuno naka Kanec,

⁵ŋat acel acel lewic bino mako, pi rok ame mom romo konyogi, ame mom onwoŋo iye konyoro akadi berroro, kono ka lewic kede acae.”

⁶Man en kop ame Obaŋa okobo i kom leyi me Negeb, I dye lobo ame tye i twon ayela kede can apek, kan ame min eŋatu kede twon ŋuu ya iye, karacel kede ororo kede twol a twarre, ame oyeo lwak lonyogi apipim i ŋe kane, kede lim akanagi i wi aruk inaga, kun otero baŋ rok ame mom romo konyogi.

⁷Pien kony ame Miciri mio lam dok berroro mom iye, mannono omio acako nyiŋe ni, “Rakab ame tworo toke aboŋo ticcoro,”

⁸Aman doŋ wot igor coc i nyimgi kom kidi apada, ite daŋ coyo dok i buk, me bed tye pi kare ame tye i nyim, acalo caden ame bedo nakanaka.

⁹Pien gin obedo jo ame jem ame ogoba, itino ame dag winyo kop a Rwot;

¹⁰ame kobbi jo ame neno piny ni, “Kur inen wunu,” kede baŋ odwarpiny ni, “Kur irabbiwa kop a tye atira; kobbiwa wunu kop abeco keken, kun irabo wunu daŋ kop me goba keken,

¹¹gak wunu iwek wunu yo oko, me kur omedde winyo pi Ŋat Acil me Icrael.”

¹²Mannono omio Ŋat Acil me Icrael okobo ni, “Pien icao wunu kop man, ite lunyo keto genwu i wuno jo kede bwologi kun ijeŋere wunu i kodi timwunono;

¹³mannono bino miyo balwu-nono bedo i komwu, acalo apama cel ocuŋ malo iguŋ ame obarre oko dok daŋ ceggi rette piny, ame mukere oko i rwop oyotoyot meicel.

¹⁴Mukere mere rom aroma i to a gulu ame ocweo, ame oŋŋinyo aboŋo kica moro, eka tako moro mom te nen iye, ame dok romo kwanyo mac i keno onyo ame romo twomo pii iyi atapara.”

¹⁵Man en kop ame Rwot Obaŋa okobo ame en Ŋat Acil me Icrael, “Dwog wunu cen, bed wunu mot, me ilarre wunu: ibino nwoŋo wunu teko i bedo mot kede gen.”

¹⁶Ento wun ikwero wunu oko, kun ikobo wunu ni, “Pe gire wan obino ŋwec giwa agu ragura”, mannono bino miyo iŋweco wunu oko, dok ni, “Obino ŋwec kedwu adwir adwira”, mannono bino miyo jo ame ryemo yorwu bino bedo jo adwir meicel.

¹⁷Jo tutumia bino ŋwec pi lworo dano acel, wun luŋ ibino ŋwec wunu pi lworo okwor abic, tuno waŋ ame idon wunu calo yat bendera ame tye wi kidi, calo bendera ame tye i wi tur malo,

¹⁸Kadi bed amannono, Rwot gire tye akuro ka nyuttiwu berrere, mannono omio en otiŋere malo pire kene pi timowu kica. Pien Rwot en Obaŋa ame ŋolo kop atira jo luŋ ame kure tye kede yomcuny.

¹⁹Ateteni, wun jo Cion ame bedo i Jerucalem mom dok ibino kok wunu, kadi acel. Rwot gire bino timowu ber ka ce en owinyo kokowu en bino gamo dogwu ka en owinyo.

²⁰Kadi bed mi icam wunu ogati ame me can dok mi imat wunu pii kun owunowu, cite apwonywu mom dok bino pono kadi acel, ibino wunu gire neno apwony kede waŋwu.

²¹Ka ce igak wunu tuŋ cem onyo tun cam, yitwu bino winyo dwon ame bino iŋewu, kun kobo ni, “Yo gire ene, lubi”.

²²Eka ite pyedo wunu cal jogiwu ame opao apaa kun omwomwono komgi kede jabu karacel kede calwu ame otwako atwaka, kun omwomwono komgi kede jabu, ite bobologi wunu oko bala gin me kwer, kun ikobo wunu ni, “Jer wunu teŋe!”

²³Rwot bino miyowu kot pi kotti ame icoo wunu i potti kede cam ame cek i potti, bino cek aber dok abup meicel. I kare-nono dokwu bino cam i bar alac;

²⁴eka twoniwu kede kanewu ame puro, gin bino camo cem ame orubo kede kado, ame ojobo ote pyeto kede odero.

²⁵Kulo me pii ame mol bino bedo tye i wi kidi ducu kede i wi tur ducu, i nino ame obino neko iye jo i kare ame gedo mogo ocuŋ malo iguŋ bino rette iye piny.

²⁶Dok dwe bino ryeny acil meicel kun caro piny calo ceŋ, aco ceŋ bino bedo a rom mannono tyen abiro, acalo lero me nino abiro, i nino ame Rwot bino tweyo iye waŋ kan owanne i kom jo mere, kede caŋo kan ame en owawano.

²⁷Nen ba, nyiŋ Rwot bino i kannabor kun akemo mere waŋ calo mac ame yito mere wikino malo oculle acula; kun iniga opoŋ yi doge oko, aco lebe calo mac ame tye ajwero piny oko;

²⁸weo mere calo kulo ame amol olapakino atata, ame otuno naka i dwone malo; me yeko rok apapat kede odero me to kede pi keto i dog jo del ame miogi orwenyo oko.

²⁹Ibino bedo wunu kede wer acalo me dyewor me kwero ebucan a Rwot; cunywu daŋ bino bedo yom ame calo dano ame woto kun jo akuto nyamulere, me wot i wi kidi a Rwot, baŋ ŋat ame obedo Lela a jo Icrael.

³⁰Rwot bino miyo dwone me kwogo winyere, dok daŋ bino miyo bade nen ame en oryeo piny, kun tye kede twon akemo adwoŋ, kede leb mac ame jwero piny oko, karacel kede kot ame mwomwoca kun corre piny kede pee.

³¹Twon lworo adwoŋ meicel bino mako jo Accuria, ka ce gin owinyo dwon Rwot, kun en pwodogi kede abiro mere.

³²Ajaa kede naŋa opuk bino kok kun lubere kede abiro acel acel ame Rwot bino goyogi kede; en bino lweny kedgi kun yeyeno bade me lweny.

³³Pien ka waŋo doŋ otyeko yiko oko con; doŋ otyeko yiko gire oko pi abaka; kannono dwoŋ dok daŋ lac meicel, kun mac kede yen tye dwoŋ ata; weo a Rwot ame mol calo gweŋ calufa ame olio i mac en ame moko mac iye.