Read lango Icaya 32 Bible Online

Icaya 32 - lango bible

Icaya 32

¹Nen ba, abaka bino loyo loc a kite atira, oloccere bino loc kun oŋolo kop atira.

²Ŋat acel acel bino bedo calo kalarre ka yamo tye, dok acalo ka-gwokkere ka kot ocorre piny, acalo kulli me pii i kabedo otwo, dok acalo tipo kidi moro adwoŋ i lobo otwo imek.

³Waŋ jo ame neno mom bino wumere, jo ame yitgi ogiporo, bino tero yitgi iye.

⁴Jo ame timo jami oyotoyot, bino niaŋ iye ote ŋeyo aber, jo ame te lebgi odwale bino kop atira aboŋo peko moro.

⁵Ŋat amiŋ mom dok obino kobo ni dano me awora, naka ŋat ame kite rac me kobo ni twon lo moro adwoŋ,

⁶Pien amiŋo kobo kop me miŋo, tamere tye ka i timo bal; timere luŋ mom yomoro yi Obaŋa, kobo kop a mom ber i kom Rwot; medo ka kec baŋ jo ame kec oneko, jo oryo ciro en twono pii oko.

⁷Ŋat ame kite rac, timere daŋ arac, en kelo ka tam me timo gin arac, balo ocan oko i koppere me goba, kadi kop a ŋat a can odio tye kakare.

⁸Ento dano me awora kela daŋ tam ame oworo, en cuŋ i kite me woro.

⁹Ya wunu malo wun mon ame tye kede kuc, winy wunu koppa; ter wunu yitwu, iwiny wunu kop ame akobo wun anyira ame mom paro ginnoro.

¹⁰Nino ame odoŋ mom dok romo mwaka acel twal, komwu bino bedo po apoa wun mon ame mom paro ginnoro, pien nyig olok bino bedo pe, dok daŋ mom obino pwono nyig yen.

¹¹Komwu myero myel, wun mon ame tye kede kuc, komwu myero popoa wun ame mom iparo wunu ginnoro; gony wunu boŋo oko i komwu, ite tweyo wunu boŋo cola i pyerwu.

¹²Bap korwu pi pottiwu ame yommoro cunywu, pi olok ame nyak atek meicel,

¹³pi lobo a jona, ame okuto kede ococok tye adoŋo iye; kede pi udi luŋ ame yommoro cuny jo, ame tye i boma ame jo lelo iye.

¹⁴Pien abaka bino ya oko i ode, boma a jo pol iye bino doŋ nono; kidi me Opel kede kan ocuŋ iguŋ malo me ŋiyo piny bino doko gorogoro atwal; kane me tim bino lelo pirgi, bino doko ka kwayo rommi kede dyegi,

¹⁵tuno waŋ ame Obaŋa oonyo Cuny Acil i komwa kun ya i malo, ame tim me Lebaŋon doŋ odoko poto ame ceko cem abup meicel, kun poto ame yam ceko cem olokere odoko buŋ.

¹⁶Ŋolo kop atira te bedo i tim, aco kite atira te bedo i poto a ceko cem.

¹⁷Kite atira bino kelo kuc, dok kite atira bino kela daŋ bedo mot kede gen ame bedo nakanaka.

¹⁸Jona bino bedo i kabedo me kuc kan ayela moro mom iye, ame ber me weo mot.

¹⁹Pee bino corre, buŋ te onyo oko piny, boma daŋ bino rette oko piny.

²⁰Itye wunu kede yomcuny wun jo ame coo koti i dog kulo ducu, ame mio twoni kede kane lato gigi ata.