Read lango Icaya 33 Bible Online

Icaya 33 - lango bible

Icaya 33

¹Ibino neno can yin ajwer jo, ame yin mom ojweri, yin won adote, kun ŋattoro mom ru oketo erupe i komi. Ka doŋ iweko jwero jo oko, obino daŋ jweri oko; kede ka doŋ iweko timmi me doto jo oko, yin daŋ obino keto erupe i komi.

²Ama Rwot, timwa ber, wan okuri. Bed acalo bad wa piny a ru i piny a ru, larwa i kare me peko.

³Rok ocele riŋo gigi oko pi winyo dwon jo awo, ka yin itiŋere malo, orok keketa oko;

⁴oyako jami calo omor ame camo cam i poto opyepyea iye calobonyo.

⁵Rwot gire dit meicel, pien bedo malo; en bino miyo jo Cion luŋ ŋolo kop atira kun kitegi daŋ atira,

⁶en bino miyo icuŋ wunu atek i karewu, bino miyo larre, ryeko kede ŋec bedo adwoŋ; gin ame pire tek baŋ jo mere en lworo Rwot.

⁷Koŋ inen ba, kite ame jo mere a tek i lweny kok kede okwena me kuc kok kede cwercuny meicel.

⁸Yo gudo luŋ doŋ odoŋ oko nono, ŋattoro ame woto iye doŋ mom tye. Nen cikere doŋ oturo oko, caden doŋ ocao acaa mom daŋ doŋ oparo pi dano.

⁹Lobo gire doŋ oballe oko; alee otwodo Lebanon, tekomere doŋ tye arwenyo oko, Caron doŋ calo tim; aco Bacan kede Karmel pot yengi doŋ tye aony aonya.

¹⁰Rwot okobo ni, “Aman doŋ abino ya oko, abino doŋ tiŋere malo; abino doŋ bedo dit.

¹¹Iyaco wunu reŋ kal, ite lunyo nywalo wunu cuŋ kal; weo me dogwu en ame bino bedo mac ame a bino tyekowu.

¹²Rok luŋ bino doko calo buru mac odoŋ ka mac oto, acalo okuto ame otoŋo ote waŋo i mac.”

¹³Wun jo ame tye kannabor, winy wunu gin ame doŋ atimo, kede wun jo ame ceggi, myero iŋe wunu twer ame an atye kede.

¹⁴Obalo ame tye i Cion, lworo doŋ omakogi oko, jo ame kwero Obaŋa komgi doŋ amyel amyela. “Ŋa i akinawa ame twero bedo i ŋet mac ame jwero jo? Ŋa i akinawa ame twero bedo i ŋet gin ame lyel nakanaka?”

¹⁵Ŋat ame kite atira i nyim Obaŋa ame kobo kop ateni, ame cunye dag lonyo ame onwoŋo pi buro jo, ame taŋo gire ciŋe oko i gamo lim me wil i muŋ, ame culo yite oko iwinyo kop me onyo remo, ame mio waŋe oko i neno gin arac.

¹⁶En bino bedo malo; ka geŋere mere bino bedo cel ame ocweo i lela; obino miye gire cammere, pii amata mere daŋ mom bino rwenyo.

¹⁷Ibino neno wunu abaka kede waŋwu i kwogo mere; gin bino neno loba ame opette alac.

¹⁸Cunyi bino lwodo kop i kom lworo adwoŋ meicel “Akwan wel kara tye kwene? Ara ocoro kara tye kwene? Akwan gedo ocuŋ igur; kara tye kwene ba?”

¹⁹Mom dok ibino neno wunu rok ame oŋale, rok ame kopgi pat apata, ame mom itwero niaŋ wunu kopgi, okobo leb ame niaŋ iye tek.

²⁰Koŋ inen wunu Cion, boma ame ikwero wunu ecubanwu iye! Ibino neno wunu Jerucalem i waŋwu ame en paco okwe calo kema ame mom okobo, ame teke mege mom oputo, dok tollege daŋ mom cot,

²¹Rwot bino nyuto kwogo mere kuno, kan ame kulli adoŋo kede en atino tye iye, kan ame mele ame okwaŋo i pol mom beo iye, yede me kwogo daŋ mom beo iye.

²²Pien Rwot en aŋol kopwa, en alocwa, Rwot en abakawa, en bino larowa,

²³Tol yeeni ogony oko; mom mako te yat cuŋ atek, mom daŋ otwero yaro boŋo iye wek yamo koli. Jami ayaka bino bedo apipim ame jo bino poko, naka oŋwalo daŋ bino nwoŋo moro.

²⁴Mom tye ŋattoro ame bedo i lobowa ame bino kobo ni, “An koma lit.” Jo ame bedo iye luŋ obino timo kica pi balgi.