Read lango Icaya 34 Bible Online

Icaya 34 - lango bible

Icaya 34

¹Biye wunu ceggi wun rok luŋ, me icik yitwu iwiny wunu! Jo luŋ ame bedo i lobo, myero bin winy.

²Pien akemo doŋ omako Rwot kom rok ducu, akemo ocire meicel i kom monygi, en doŋ ojalogi oko me ajwera i pala calo leyi.

³Kom jogi ame oneko obino bolo ata, ŋwec kom jo-nono bino kuto aŋwec remogi bino mol i wi kidi,

⁴Lwak mony me polo luŋ bino top oko, polo bino dolle oko calo buk odolo. Monygi luŋ bino rutte oko piny, kite ame pot olok ony kede piny, kite ame pot olam ony kede i kom yattere.

⁵Pien palana me lweny omer oko i polo, pien abino piny me ŋolo kop i kom Edom kom jo ame doŋ omio me ajwera,

⁶Rwot tye i pala lweny ame remo doŋ omwono lake oko, dwol doŋ dwoŋ i kome meicel, remo rommi kede dyegi, dwol aŋaluru me nyogi rommi. Pien Rwot bino ŋolo mot me yale i Bojra, kede twon nek adwoŋ meicel ame en bino timo iyi Edom.

⁷Jo bino rette calo twoni kede jobi Lobogi bino mato remo meicel, dwol bino miyo lobo bedo amio amia.

⁸Pien Rwot tye kede nino me culo kwor, tye kede mwaka me lakoro Cion i ciŋ okworrere,

⁹Kulli atye Edom bino lokere doko calo odok lam, lobo iye bino doko calo gweŋ Calfa, aco lobo-naca luŋ bino doka calo odok lam ame awaŋ.

¹⁰Mac bino lyel dyeceŋ kede dyewor kun mom to, yito mere bino wikino malo nakanaka. Kare luŋ lobo bino doŋ nono, ŋattoro mom bino beo iye atwal.

¹¹Olwit kede ecoc bino leyo kannono tula kede agak bino bedo iye. Rwot bino ryeyo tol i kome te miyo rubere atata kede birigi ame mio doŋ nono aboŋo ginnoro,

¹²Obino lwoŋo nyiŋe ni Loc gire mom kuno, jo adoŋo bino bedo pe iye,

¹³Okuto bino doŋo i wi udi mere adoŋo, ayilayila kede ocokocok bino doŋo i kom apama cellere, ekwe kede udo bino bedo iye.

¹⁴Leyi me tim bino rwatte odyekodyek cen acalo dyegi bino kok baŋ owotegi, min lee oti ame nen dyewor keken bino wot me yenyo ka weo kuno.

¹⁵Tula bino gero ode kuno, bino bolo toŋe kuno bino beko daŋ kuno, bino coko itino mere karacel i te bwome kuno, Ogole daŋ bino cokere kuno, kun acel acel i akinagi tye kede cware.

¹⁶Koŋ iyeny wunu i buk a Rwot: mom tye moro i akina magi ame bino rwenyo, mom tye moro ame bino bedo kene aboŋo cware. Pien Rwot doŋ ociko ni bed kittono, en ikome bino cokogi karacel.

¹⁷En bolo kwir pirgi, en ikome en opokkigi lobo kun pimo kede tol. Bino doŋ bedo megi atwal, gin bino bedo iye waŋ i waŋ.