Read lango Icaya 36 Bible Online

Icaya 36 - lango bible

Icaya 36

¹I mwaka me apar wie aŋwen me loc abaka Kejekia, Cennakerib abaka me Acuria owoto me wot lweny i kom boma luŋ me Juda, ame onwoŋo ocelo atek meicel, eka te daŋ makoboma-nono luŋ.

²Abaka me Acuria te cwayo Rabcake baŋ Kejekia i Jerucalem, kun Rabcake ya i Lakic i twon mony adwoŋ meicel. Oticcere adoŋo te wot cuŋ i yo pii ame mol tero pii iyi atapara ame tye tuŋ malo, i yo adwoŋ ame woto i poto Alwok-boŋo.

³Jo adek me Juda te bino me bino rwatte kede: Eliakim wot a Kilkia, ame rik obedo adwoŋ a loo ot abaka, kede Cebna, ame onwoŋo aran, kede Joa wot Acap ame rik en aco kop i kom ginnoro luŋ ame otimere.

⁴Rabcake te kobbigi ni, “Kobbi wunu Kejekia ni, ‘Abaka adwoŋ ame en abaka me Acuria okobo ni, Gen ame itye wunu kede-ni ocuŋ kara i kom ŋo ba?

⁵Itamo ni kop me dog keken rom aroma i ryeko kede teko me lweny bo? Aman ame yin ijem i koma ni yin igeno ŋa?

⁶Nen yin itye ka geno Miciri ame rom aroma i mako ogada ame tur oyot akaka mako abiro; ame tur cobo ciŋ ŋattoro keken ame ojeŋere i kome. Parao ame obedo abaka me Miciri daŋ tye kittono baŋ jo luŋ ame keto gengi i kome.

⁷Ento ka ikobba ni, “Wan ogeno Rwot Obaŋawa”, kara mom en Obaŋa-nono en ame Kejekia rik omuko kabedo mere me abila ame tye malo kede keno lam, kun ciko Juda kede Jerucalem ni, “Myero gin wor Obaŋa i nyim keno man”?

⁸Aman doŋ tim ber ijeŋ ginnoro wun adwoŋŋa, abaka me Acuria: An abino miyi aguragura tutumia aryo ka ce yin itwero nwoŋo jo ame twero ŋwec kedgi,

⁹Kara yin itwero juko aticcoro i akina otic adwoŋŋa i yore mene, ka ce yin pwod igeno Miciri pi gadigadi mere kede jo ame ŋweco agurgura?

¹⁰Medo i kom mannono, yin itamo ni an abino jwero lobo man aboŋo Rwot? Rwot okobba ni wot i lweny i kom lobo man, me ijwer jo iye luŋ’.”

¹¹Eka Eliakim kede Cebna, kede Joa te kwayo Rabcake ni, “Tim ber i kob kedwa wan omironi i leb Aram pien wan oniaŋ iye. Kur ikob kedwa i leb me Juda ame jo ame tye i wi apama me cel twero winyo.”

¹²Rabcake te gamo kopgi ni, “Itamo ni adwoŋŋa ora me bino kobo kop man baŋ adwoŋwu kede baŋwu keken, kun mom akobo baŋ jo ame tye i wi apama cel malo ca? Aco kono, wun karacel kede gin jo-ni luŋ doŋ ibedo wunu jo ame bino camo cetewu kede mato lacwu?”

¹³Rabcake te putte malo, te redo ni, “Koŋ iwiny wunu kop abaka adwoŋ me Acuria!

¹⁴En okwenyoro wu ni myero kur imi Kejekia bwolwu, pien en gire mom bino larowu.

¹⁵Kur imi wunu Kejekia wir tamwu me jeŋere i kom Rwot kun kobbiwu ni, Rwot gire mom bino miyo boma man i ciŋ abaka me Acuria,

¹⁶Kur iwiny wunu kop a Kejekia. Abaka me Acuria okobo ni ŋat acel acel myero katto oko i boma me bin yik kop me kuc kede. En ebino miyo dano acel acel camo nyig olokkere en i kome, kede nyig oduro mere, kun daŋ mato pii mere ame en i kome ojolo;

¹⁷ituno ka abino terowu i lobo ocele ame rom aroma i lobowu, lobo ame ceko cem, koŋo olok dwoŋ iye, lobo ame ogati kede olok tye iye.

¹⁸Gwokkere wunu, kur iye wunu Kejekia bwolwu ni Rwot bino larowu, Yam koŋ tye Obaŋa arokkoro ame olaro lobo mere i ciŋ abaka me Acuria?

¹⁹Kara gin obaŋe-nogo aman otye kwene? Obaŋa boma Kamat kede Arapad kede obaŋa me Ceparraim? Gin rik olaro Camaria i ciŋa?

²⁰I kom obaŋe magi luŋ, mene ame yam olaro lobogi i ciŋa? Kara ŋo ame omio yin itye ka tamo wunu ni Rwot twero laro Jerucalem?”

²¹Jo te liŋ aliŋa, kite ame onwoŋo abaka ocikogi kede ni myero kur ogam kopporo,

²²Icennere Eliakim wot a Kilkia, ame onwoŋo obedo adwoŋ ame loo ot abaka, kede Cebna, ame obedo aran, kede Joa wot a Acap, ame onwoŋo obedo aco kop luŋ i kom gin otimere, ote wot baŋ Kejekia kun oyeyeco boŋŋigi oko, ote titte kop ame Rabcake okobo.