Read lango Icaya 37 Bible Online

Icaya 37 - lango bible

Icaya 37

¹I kare ame abaka Kejekia owinyo, oyeyeco boŋŋi mere, te rukoboŋo cola, te wot i ot a Rwot.

²En te cwayo Eliakam, adwoŋ ame onwoŋo loo ot abaka, kede Cebna, aran karacel kede olamdog adwoŋŋere baŋ Icaya wot Amoj, kun gin luŋ orukoboŋo cola.

³Gin te wot kobbi Icaya ni, “Man en kop ame Kejekia okobo ni okobbi, ‘Tin en nino me can, me keto can i komwa dok me cwercuny okato kare. Aman wan orom aroma i dako ame nino me nywallere oromo, cite tekome colo atin mom tye.

⁴Gwok onyo Rwot Obaŋani owinyo kop a Rabcake, ame adwoŋŋere, abaka me Acuria ocwae kede me bino ŋalo Obaŋa akwo. Rwot Obaŋani myero ket can i kom jo man ame okobo kop ame en otyeko winyo. Pi mannono ba, yin myero ikwa Rwot pi jo ame odoŋ.’ ”

⁵Kare ame omiro abaka Kejekia otuno baŋ Icaya,

⁶en okobbigi ni, “Wot ikob wunu baŋ adwoŋwu ni, ‘Rwot okobo ni myero kur ibed kede lworo moro pi kop ame iwinyo, ame omiro abaka me Acuria oyeta kede.

⁷Nen ba, en abino miyo en winyo koppogo me anike, ame bino miyo en dok i lobo mere. An abino miyo oŋeke kede pala romo i lobo mere.’ ”

⁸Rabcake te dok oko cen, te wot nwoŋo abaka me Acuria tye ka lweny i kom Libna; pien en onwoŋo doŋ owinyo oko ni abaka otyeko ya oko i Lakic.

⁹Abaka rik te winyo kop i kom Tiraka, abaka me Eciopia, ni en onwoŋo tye ka bino me bino lweny kedgi. En rik te cwayo kwena baŋ Kejekia kun kobbe ni,

¹⁰“Wot ikobbi wunu Kejekia abaka me Juda ni, ‘Kur imi Obaŋani ame igeno bwoli ni mom ebino miyo Jerucalem i ciŋ abaka me Acuria.

¹¹Nen ba, yin doŋ ityeko winyo gin ame abaka me Acuria otyeko timo i kom lobo luŋ. Iwinyo kite ame en orweogi odoco, kara yim doŋ ibino bwot i yore aŋo ba?

¹²Kwarina rik obin orweo boma me Gojan, Karan, Recep, te daŋ neko jo me Eden ame rik onwoŋo bedo i Telaccar, ento obaŋagi moro mom olarogi.

¹³Kara obakki me boma magi tye kwene? Abaka me Kamat, kede Arpad, kede me Ceparvaim, kede me Ena karacel kede me Ivva, gin luŋ aman tye kwene?’ ”

¹⁴Kejekia ogamo waraga i ciŋ okwena te kwano. En te wot kede i to a Rwot, te wot yaro waraga-nono i nyim Rwot.

¹⁵Kejekia te kwayo Rwot ni,

¹⁶“Ama Rwot Obaŋa me mony, Obaŋa me Icrael, ame ibedo i wi kommi me kwogo a tye malo i wi okerubi; yin keni gire en ibedo Obaŋa, ame iloo kit lobo apapat luŋ me wi podo. Yin en iketo polo kede lobo.

¹⁷Tim ber icik yiti iwinywa, ama Rwot, yab waŋi inenwa, dok daŋ iwiny kop luŋ ame Cennakarib ocwao me ŋalo Obaŋa akwo.

¹⁸Iyi ateni, ama Rwot, wan oŋeo ni abaka me Acuria ojwero lwak apol kun mio lobogi doŋ nono,

¹⁹dok daŋ owawaŋo obaŋegi oko i mac; pien gin mom onwoŋo obedo obaŋa ikome, ento cal apaa me yen kede gweŋe ame jo en otio.

²⁰Aman doŋ ba, ama Rwot Obaŋawa, larwa i ciŋ jo Acuria, me rok luŋ i wi podo ŋe ni yin giri en ibedo Obaŋa keni.”

²¹Icaya wot Amoj te cwayo kop baŋ abaka Kejekia kun kobbe ni, Rwot Obaŋa me Icrael okobo ni, Pien ityeko cwayo kwacci baŋa pi Cennakerib abaka me Acuria,

²²man en kop ame Rwot doŋ otyeko kobo i kome: Jo me Cion ocai calo nyako ame obwoni; Jo Jerucalem ocai, calo nyako oyeyeŋo wie i ŋei.

²³“Yin kara iŋalo ŋa, ŋa ame iyeto? Iwoto dwoni ikom ŋa ba, kun iŋao waŋi malo? Mom i kom ŋat acil me Icrael!

²⁴Imio omironi oŋalo Rwot, dok ikobo ni, yin iyito malo i wi kiddi kun iyito i gadigadi me lweny, ituno naka i wi Lebanon twal; kun iwakere daŋ ni itoŋo yen cedar aboco ikuno oko, kede yen cipre abeco mege oko; dok daŋ ni ituno iyi buŋ kanabor, kan ame yen ocule iye acula.

²⁵Iwakere-gu ni ikunyo akoŋ, imato daŋ pii, dok tyeni omio pii kulli luŋ me Miciri odwono oko.

²⁶“Mom onwoŋo iŋeo ni rik ayiko man con? Aman doŋ atye ka cobo acoba, gin ame rik ayiko pire con, ni ibino reto boma luŋ ame ocelo atek, me imi dok wi oburo.

²⁷Man omio jo ame bedo kuno mom doŋ tye kede teko, cunygi doŋ bedo poto apota, lewic daŋ doŋ ocirogi oko. Orom aroma i lum ame tye i poto, ocalo lum alyabu, onyo orom aroma i doo ame tuu i wii ot, ame yamo alyet me oro onero.

²⁸“Cite an aŋeo kop ducu i komi, aŋeo ginnoro luŋ ame yin itio, kede kabedo luŋ ame yin iwoto iye, karacel kede daa-ni i koma.

²⁹Atyeko doŋ winyo kop i kom akemoni, awinyo daŋ kop i kom wakereni oko; pi mannono abino rwako golo i wumi, abino keto daŋ tol i dogi, abino dwoki cen i yori, kun ibeo kede Iyo ame rik ibino.”

³⁰Icaya te kobbi abaka Kejekia ni, “Man en gin ame bino nyuto gin ame bino timmere. I mwaka ni kede i mwaka ame alubo man, ibino camo wunu cam ame otu kene, ento i mwakak me adekkere ibino coyo wunu koti, ite daŋ kayo wunu, ibino pito wunu olok, ite daŋ camo wunu nyige.

³¹Jo ame bino bwot, te doŋ i ot a Juda, bino bedo acalo yat ame oguro lwite piny, dok daŋ obino nyako nyiggi.

³²Pien jo bino doŋ i Jerucalem kede i wii kidi me Cion. Man bino timmere pien Rwot me mony tye i mit adwoŋ meicel iye.”

³³Man en kop ame Rwot okobo i kom abaka me Acuria: “En mom bino donyo i boma man kadi acel, mom daŋ bino bayo atero moro iye, mom tye acirikale moro ame omako kwot, ame bino tuno i ŋet boma, mom daŋ obino toro lobo moro me guro.

³⁴En bino dok cen i ŋec, kun lubo yo ame rik ebino kede, en gire mom bino donyo i boma man, Man en kop a Rwot me mony ikokome.

³⁵An abino lweny pi boma man ate gwokome kelo kwogo i koma, kede i kom amirona Daudi.”

³⁶Amalaika a Rwot rik te wot i gony a jo Acuria, te wot neko ocirikale tutumia mia acel kede pyeraboro wie abic. Orwo mere odiko con, kom jo oto onwoŋo doŋ oradde atata.

³⁷Cennakarib, abaka me Acuria te dok paco, wot bedo i Nineve.

³⁸I nino moro ame en rik onwoŋo tye akswayo obaŋa i ot obaŋa mere i Nicrok awobe mere Adramelek kede Carecer te neke oko i pala me romo, gin te lwi gigi wot oko i lobo Ararat. Wode Ecar-kaddon te leyo kakare acalo abaka.