Read lango Icaya 38 Bible Online

Icaya 38 - lango bible

Icaya 38

¹I kare-nono two rik onwoŋo omako abaka Kejekia, ame onwoŋo en doŋ ceggi to. Adwarpiny Iacya wot Amoj rik te wot limme, te kobbe ni, “Rwot okobo ni yin doŋ myero icik jo ame bedo baŋi oko i kop me odi, pien mom ibino caŋ, ento ibino to oko.”

²Kejekia te loko nyime neno apama, te kwayo Obaŋa,

³kun kobo ni, “Tim ber, Ama Rwot, ipo kit ame abedo tic kede baŋi kun ageni, icunya ducu, dok atimo gin ame tye atira i nyimi.” En te mwoco koko oko, kun cunye cwer meicel.

⁴Rwot dok te medde kobbi Icaya ni,

⁵“Wot ikobi Kejekia ni, Rwot Obaŋa akwarowu Daudi okobo ni, etyeko doŋ winyo kwacci, dok daŋ eneno pig waŋi; nen ba, ebino miyo dok ibedo i lobo pi mwakki apar wie abic,

⁶Ebino larri karacel kede boma man i ciŋ abaka me Acuria, dok ebino medde gwokoboma man.

⁷“Man en anen ame bino nyuto ni Rwot bino cobo gin ame eciko:

⁸En bino coro tipo ceŋ dok cen tyen apar iya i kom gi-poro ceŋ Akac.” Tipo cen daŋ te dok oko cen tyen apar twal.

⁹I kare ame Kejekia otyeko ya i two mere, en ocoo wer man me pako Obaŋa:

¹⁰Rik atamo ni abino ya i kwo man kun pwod atetek, atamo ni rik acwalla oko i lobo a jo oto, ate wot bedo kuno doŋ atwal, kun mom dok aneno ŋea.

¹¹Rik atamo ni mom dok abino neno Rwot, i lobo a jo ame kwo; dok mom daŋ abino neno ŋattoro, i akina jo luŋ ame bedo i wii lobo.

¹²Kwona onwoŋo doŋ oputo, otero oko kannabor, calo kema akwat ame oputo oko, odolo acaloboŋo ame pwod acweyo acwea, ame oŋolo oko i kom yat cweyo boŋo; Rwot onwoŋo doŋ amiyo kwena gik oko, cakere odiko tuno iwor.

¹³Akok dyewor benebene kun atye i twon rem adwoŋ meicel, onwoŋo atamo ni eŋatu gire tye atuturo cogona oko; Rwot onwoŋo doŋ amiyo kwona agik oko, cakere odiko tuno naka iwor.

¹⁴Dwona onwoŋo doŋ winnyere calo me aculegwec onyo me owalo, onwoŋo doŋ akok calo amam. Waŋa onwoŋo doŋ okaŋ oko me neno malo, Rwot lara ba, atye doŋ arac meicel.

¹⁵Kara ŋo ame dok atwero kobo ba? Pien okobo keda, dok en ikome omio man otimmere. Nino mom omako waŋa kadi acel dyewor, pi cwer cuny ame onwoŋo atye kede.

¹⁶Rwot, an gira abino bedo kwo piri yin keken; kwona Ocuŋ i komi; caŋa me abed kwo,

¹⁷Nen, cwer cuny adwoŋ ame onwoŋo atye kede, oya iye kuc; yin ilaro kwona i dog bur me to, pien ibolo balla luŋ iyo ŋei.

¹⁸Pien mom dok tye ŋattoro ame tye i lobo a jo oto, ame twero paki kede pwoyi; jo ame donyo piny i lyel mom dok obedo i gennoro me lubo atenini.

¹⁹Ŋat akwo en ame twero pwoyi, kite ame an tin apwoi kedeni; apap titi itino mere, kite ame yin igene kede,

²⁰Rwot yin giri ityeko lara oko! Wan obino goyo naŋa kun opaki kede, obino wero wer me paki i ot me wori, i kare me kwowa luŋ.

²¹Icaya onwoŋo okobbi abaka ni myero luŋ oduro te mwono i waŋ odeke mere, me caŋ oko.

²²Abaka Kejekia te penye ni, “Kara gin aŋo ame bino nyusto ni an abino wot i ot a Rwot?”