Read lango Icaya 39 Bible Online

Icaya 39 - lango bible

Icaya 39

¹I kare-nono abaka me Babulon, Merudak-baladan, wot a Baladaŋ owinyo ni abaka Kejekia rik kome lit; en te cwayo kwena me tero waraga baŋe karacel kede mot, pien onwoŋo owinyo ni doŋ otyeko caŋ oko i two mere.

²Kejekia rik te jolo kwena mere naca i yomcuny, te nyuttigi lonyo mere, kun daŋ miogi oneno ot me kano limmere, gin oneno jabu, ryal, gigi mogo a ŋwecgi kur, moo me wel, ot me kano jami lwennyere luŋ, kede ginnoro luŋ ame onwoŋo tye i ot kano jami mere. Mom tye ginnoro ame en mom onyuto baŋgi ame onwoŋo tye i ode kede i lobo ame onwoŋo tye i te loccre.

³Cite odwarpiny Icaya rik te bino baŋ abaka Kejekia, te penye ni, “Jo-ni kara oya ikwene? Dok kop aŋo ame gin okobo?” Kejekia te gamo ni, “Gin oya i lobo abor meicel, oya i Babulon twal.”

⁴Icaya dok te penye ni, “Gin aŋo ame gin oneno i odi?” Kejekia te gamo ni, “Gin oneno jami ducu ame tye i oda; mom tye ginnoro ame tye i udi me kano lim ame mom anyuttigi.”

⁵Icaya te kobbi abaka ni, “Koŋ doŋ iwiny kop a Rwot me mony okobo.

⁶Nen ba, kare tye abino, ame jami ducu atye i odi, jami luŋ ame kwarowu yam obedo kano tuno kede naka tin, obino terogi luŋ i Babulon. Mom tye ginnoro ame bino doŋ kadi acel.

⁷Dok ikwai mogo, obino royo oko, ote terogi wot tic i paco abaka me Babulon.”

⁸Abaka Kejekia te niaŋ ni kuc bino bedo tye i kare mere aboŋo alokaloka moro, omio en te kobbi Icaya ni, “Kop a Rwot ame ikobo-nono gire ber.”