Read lango Icaya 40 Bible Online

Icaya 40 - lango bible

Icaya 40

¹Kwe wunu cuny jona, kwe wunu cunygi! Man kop ame Obaŋawu okobo.

²Cukoro wunu cuny jo me Jerucalem, kobbigi wunu ni, “Karegi me bedo opii doŋ otum oko, otyeko doŋ timogi kica i kom balgi luŋ. Can ame Rwot oketo i komgi doŋ bup, romo doŋ bal ame gin otimo tyen aryo twal.

³ Dwonnoro awinyere ame aredo ni, ‘Ger wunu yo pi Rwot, yik wunu gudo i tim pi Obaŋawa, yik wunu cuŋ atira i tim otal.

⁴Luŋ ducu obino toro oko, kidi kede tur obino dwoko oko piny, kan ame ogonne obino miyo cuŋ atira, yo ame obedo popony obino piro oko.

⁵Kwogo a Rwot bino nen kannaler, jo luŋ bino neno karacel, pien Rwot ikome doŋ otyeko kobo.’ ”

⁶Dwonnoro tye akobo ni, “Redi!” An ate gamo ni, “Kara ared niŋo ba?” Ginnoro luŋ a tye kede kom calo lum, kwogo mere luŋ rom i tur lum me tim.

⁷Lum ner, ture te ony oko; ka weo a Rwot okuto iye, ateni, dano gire calo lum.

⁸Lum ner, ture te ony oko; cite kop a Rwot okobo bedo nakanaka.

⁹Yin Cion ame ikelo amut aber, yit ba i wi kidi malo, Yin Jerucalem ame irabo amut aber, med ba dwoni malo, med dwoni malo, kur ilwor. Kobbi jo ame bedo i boma me Juda ni, “Nen wunu ba Obaŋawu!”

¹⁰Nen wunu Rwot Obaŋawu tye abino kede teko, bade en ame loo loc pire; nen, mottere daŋ tye gire baŋe, jo ame olwenyo pirgi tye i nyime.

¹¹En bino kwayo rommi mere calo akwat, bino coko itino rommi mere i bade, en bino tiŋogi i kore, te peyo rommi ame dot momot.

¹²Ŋa ame yam koŋ opimo pii cuny ciŋe, dok ame opimo polo kede ciŋe? Ŋa ocoko kwoyo me lobo iyi gi-pimo jami, onyo ame yam opimo kiddi mijan, kede kan obedo tutur i ratili?

¹³Ŋa ame yam koŋ obedo telo cuny a Rwot, onyo ame yam koŋ obedo miye tam acalo apwonnyere?

¹⁴Ŋa ame Rwot yam koŋ openyo tam i baŋe, onyo ame opwonye i ŋolo kop atira? Ŋa ame yam koŋ opwonye me medo ŋeccere, onyo ame onyutte yore me bedo i niaŋ atut?

¹⁵Nen ba, rok luŋ rom i pii oton icel iyi gulu, dok okwanogi acalo apua ame tye i mijan; nen, en tiŋo cula daŋ calo ginnoro atitidi.

¹⁶Yen luŋ ame tye i buŋ me Lebaŋon, mom romo waŋo mot awaŋa; leyi iye daŋ nok, mom romo yalo Obaŋa.

¹⁷Rok luŋ mom ginnoro gire i nyime, gin luŋ mom obedo ginnoro kadi acel i tuŋ baŋe,

¹⁸Kara doŋ atwero poro Obaŋa kede ŋo ba, onyo atwero poro callere kede ŋo?

¹⁹Cal jok ame otwako atwaka, atet romo twako, ati jabu te mwono kome oko kede jabu, romo tiyo daŋ nyorrere kede ryal.

²⁰Ŋat ame can orido yero yat atek a mom top, yenyo apac ame adiro, me paye cal apaa, ame mom dok romo kwanyere i kan oketo iye.

²¹Mom iŋeo wunu bo? Yam mom ru iwinyo wunu? Yam mom okobbiwu pire con bo? Mom ru iniaŋ wunu cakere i ageyi keto lobo?

²²Ŋat ame bedo i wi kommere malo en ame oketo, en bedo malo meicel i ŋe pol, jo ame bedo piny i lobo nen atitino calo kalalaŋ. En ryeo polo caloboŋo icika, dok yaro daŋ calo kema me bedo iye,

²³En mio oloc doko jo a konygi pe, rwode luŋ me lobo en dwoko piny iraba.

²⁴Gin kom calo ginapita ame pwod opito apita, ame pwod ocoo acoa kun pwod oryeo lwitgi aryea i lobo, ame ka Rwot ocwao yamo i komgi, oner oko; ka ce yamo ajuru ocorogi, kologi calo cuŋ kal.

²⁵Kara doŋ ibino pora wunu kede ŋo ba, ame an atwero bedo rom kede? Man peny ame Ŋat Acil openyo.

²⁶Tiŋ waŋwu malo me inen wunu; ŋa kara oketo jami magi? Ŋat ame kelogi oko calo mony, dok ŋeo welgi luŋ, dok daŋ lwoŋogi kede nyiŋgi, tekomere dwoŋ meicel; mannono omio mom tye moro i akinagi ame rwenyo.

²⁷Piŋo kara itye ka koko, yin Yakobo? Piŋo kara itye ka kobo ni Rwot mom neni, yin Icrael, kun ikobo ni Obaŋa mom tye ka paro piri?

²⁸Mom iŋeo wunu? Yam mom ru iwinyo wunu? Rwot en Obaŋa ame bedo nakanaka, en gire oketo wi podo luŋ, En mom ol, mom daŋ doko agoro, Ŋeccere tut a mom twerre ame tato tere mom yot.

²⁹En mio teko baŋ jo agoro, dok daŋ medo teko baŋ ŋat ame tekomere odok piny,

³⁰Anaka awobe daŋ doko goro, otwero daŋ ol ame oromo rette piny;

³¹ento jo ame kuro Rwot, tekogi bino dwogo cen i komgi. Gin bino twarre malo i bwomgi calo cur, obino riŋo kun mom ool, obino wot nakanaka kun mom odoko jo agoro.