Read lango Icaya 41 Bible Online

Icaya 41 - lango bible

Icaya 41

¹Liŋ wunu mot, iwiny wunu koppa, wun lobo ame tye i dog nam; wun rok ocele luŋ myero icak wunu cukoro wunu cunywu, myero icak bino wunu me okob wunu kop; wan luŋ onok wunugi aceggi me oŋol kop i akinawa.

²Ŋa ame otugo ŋat ame oya i tuŋ kide, ame loo lweny i kabedo ame en woto iye ducu? Ŋa ame jalo rok apol i ciŋe, eka en te nyono obakki adoŋodoŋo i te tyene piny? Jami lwennyere miogi odoko calo apua, atero mere kologi calo cuŋ kal.

³Ryemogi, te kato i nyimgi kede kuc, kun dwir atek, ame lokki tyene mom gudo piny.

⁴Ŋa ame rik omio man otimere? Ŋa ame omio jo me kare luŋ otye kite ame aman tye kede-ni cakere i ageyi? An Rwot, rik onwoŋo atye con i ageyi, an Rwot Obaŋa, abino daŋ bedo tye i agikki piny.

⁵Lobo a tye i dog nam otyeko neno gin ame atio, lworo omakogi, komgi te myel amyela; gin luŋ doŋ obino oko ceggi

⁶Ŋat acel acel bino konyo awotere, kun kobbi ominnere ni, “Di cunyi.”

⁷Apac cukoro cuny atet jabu, ŋat ame yiko kom cal anyul cukoro cuny ŋat ame goo agoa i kidi tet, kun kobo ni, “Gin ame omwononono ber”; gin te goyo callono ocumal me kur dok gwette.

⁸Ento yin amirona, Icrael, in Yakobo ame doŋ atyeko yero ikwae Iburaim ame amaro;

⁹yin en ame rik akwanyi i agikki lobo, alwoŋi kom i gul kannabor meicel, kun akobbi ni, “Yin ibedo amirona, an doŋ ayeri, dok mom daŋ aboli teŋe.”

¹⁰Kur ilwor, an atye kedi, cunyi kur poti, pien an abedo Obaŋani; abino miyi teko, abino konyi, abino makki kede ciŋa tuŋcem ame mia aloo okworra.

¹¹Nen wunu ba, jo ame akemo omako i komwu, obino miyo lewic makogi; alee te twodogi; jo ame pyem kedwu, wun jona, obino doko calo gin a konnyere mom, ote to oko,

¹²Ibino yenyo wunu jo ame lwenyo kedwu; cite mom ibino nwoŋo wunu, jo ame bino cobo mony i komwu: bino doko calo gin a konnyere mom,

¹³Pien an a Rwot Obaŋawu, amako ciŋwu me tuŋcem; an en ame atye akobbiwu ni, “Kur ilwor wunu, an abino konyowu.”

¹⁴Kur ilwor Yakobo, kadi bed yin icalo kudi, kur ilwor wun jo Icrael, kadi bed igoro wunu meicel! An abino konyowu, Rwot okobo; ŋat ame bino lakorowu obedo Ŋat Acil me Icrael.

¹⁵Nen ba, abino miyo idoko wunu acalo apwod me dino kal, apek, anyen ame dino kal aber meicel; ibino dino wunu kiddi ite ŋiŋinyo wunu oko, ibino miyo lobo obedo kidikidi doko calo cuŋ kal,

¹⁶Ibino pyeto wunu, yamo te kolo oko, yamo kot ajuru te keketogi atata, Yin ibino bedo kede lelo i Rwot; ibino wakere wunu meicel pi Ŋat Acil me Icrael.

¹⁷Ka ce ocan kede jo amito kony bino yenyo pi me amata, kun mom nen kadi acel, ame dwongi doŋ otwo imek, an Rwot abino winyo kwacgi, an Obaŋa me Icrael, mom abino wekogi ata.

¹⁸Abino miyo pii molo i wi kiddi kan a yam pii pe iye, pii bino kukunya i dye luŋ piny; abino miyo pii poŋ i dye tim a yam otal ikaŋ, akon bino bedo tut i lobo otwo.

¹⁹Abino miyo yen cedar doŋo i dye tim, kede okuto itiri, kede yen atino a ŋwecgi kur, kede jeituni; abino miyo yen buŋere i dye tim a yam yen pe iye, yen cipre karacel kede yen ocele apapat.

²⁰Jo bino neno man ote ŋeyo, Rwot Obaŋa Acil me Icrael en ame omio mannono otimere, ni en Rwot en atimo man, gin luŋ obino tamo mot ote niaŋ ni, Rwot en atimo man.

²¹Rwot Obaŋa ame obedo abaka me Icrael okobo ni, “Wun obaŋe a rok ocele, kel wunu kop ame itye wunu kede, kel wunu pido mogo atek baŋa.

²²Bye inyuttiwa wunu gin ame bino timere anyim. Titti wunu lwak gin ame yam doŋ otimere oko, me koŋ tam; tittiwa wunu gin ame bino ya i kom gin ame otimere-nono, me wan daŋ oniaŋ iye ka ottimere.

²³Tittiwa wunu gin ame bino timere anyim, me wan oye ni wun kara ibedo wunu obaŋa. Koŋ itim wunu ginnoro aber onyo ginnoro arac, ame poto cunywa dok moi lworo makowa,

²⁴Wun kom mom i ginnoro wunu kadi acel, gin ame itimo wunu daŋ konnyere pe; jo ame worowu doko gin me kwer baŋa.

²⁵An doŋ ayero dano moro ame tye tun anyarodi; atuge me bino cobo mony i komwu i tun kide, en bino nyono loc luŋ ite tyene piny calo coto, calo acwe gulu ame nyono lobo mere; en bino lwoŋo nyiŋa.

²⁶Ŋa ame yam koŋ ottitiwa kop man con, me oŋe, onyo ame otito con ni man bino timere, me wan oye ni okobo kop ateni? Mom gire tye ŋattoro ame okobo, mom tye ŋattoro ame onyuto ginnoro iye, mom daŋ tye ŋattoro ame owinyo ka ikobo wunu.

²⁷An Rwot gire, en ame ageo titti jo Cion kop man, acwao daŋ akwena i Jerucalem me wot kobbigi amut aber.

²⁸Ento ka aŋio gin obaŋe-mogo, mom anwoŋo moro ame twero miyo tam ame twero gamo kop ame apenyo,

²⁹Gin luŋ konygi pe; mom tye ginnoro ame gin twero tiyo kadi acel, calgi calo yamo nono.”