Read lango Icaya 42 Bible Online

Icaya 42 - lango bible

Icaya 42

¹ Rwot okobo ni, “Nen amirona ame an akonyo, ame ayero ame cunya yom i kome, Abino miyo cuny Acil bedo i kome, en bino kelo kit kwo atye atir baŋ jo luŋ.

²En mom bino da, mom bino redo areda, mom obino winyo dwone i waŋa yo;

³en mom bino turo ogada okak, dok mom bino neko uci tara ame pwod aduny, en bino kelo kit kwo atye atir aber odoco.

⁴En bino bedo kede gen nakanaka kun cunya mom poto tuno ka omio tim atira oromo wi podo luŋ, lobo a tye i dog nam tye akuro pwonnyere.”

⁵Rwot Obaŋa ame oketo polo, te ryeyo cuŋ atira, ame oyaro wi podo kede jami ame tye iye ducu, ame mio weo baŋ jo luŋ a bedo iye, kede kwo baŋ jo luŋ a woto iye, en okobo ni,

⁶“An a Rwot, atyeko doŋ lwoŋi me moko kite atira, amako ciŋi dok daŋ abino gwoki, atyeko doŋ miyi gi-cikere baŋ orok, me bedo cen baŋgi.

⁷Yin ibino yabo waŋgi, me imigi oya oko i ot kol ame otweogi iye, dok oya daŋ oko i colpiny ame obedo iye.

⁸An nyiŋa Rwot, mom amio kwogona baŋ ŋattoro ocele, akadi pak mera baŋ cal ame opao apaa.

⁹Nen gin me agege a rik atito doŋ otimere oko; aman dok akobbiwu gin ame nyen, kun gin mom ru ocako timere.”

¹⁰Wer wunu wer anyen me pako Rwot, pake wunu wun lobo ducu! Nam daŋ myero ŋur i mor kede jami luŋ ame tye iye, lobo a tye i dog nam daŋ kede jo luŋ a bedo iye.

¹¹Tim kede boma luŋ iye myero pak daŋ Rwot, jo luŋ me Kedar myero pake! Jo luŋ ame bedo i boma me Cela, myero wer i yomcuny i wi kiddi malo, kun owo i yomcuny.

¹²Jo luŋ ame bedo i dog nam kannabor myero daŋ opak Rwot, kun omie kwogo,

¹³Rwot woto i lweny calo dano atek meicel, akemo mere tugere calo dano me mony, en redo dok daŋ wo i dwon aloŋo meicel, en nyuto tekomere i kom okworrere.

¹⁴Obaŋa okobo ni, “Aliŋ doŋ pi kare alac meicel, abedo diyo cunya kun mom agamo dog jona, ento aman kare doŋ oromo me cako yelle pirgi, myero doŋ acak omo cunya i weo calo dako ame acolle.

¹⁵Abino balo lobo luŋ obedo kidikidi, kede kiddi luŋ, abino daŋ miyo ginnoro luŋ ame otu iye two oko; abino miyo kulo luŋ ame pii tye iye two ikaŋ, abino miyo pii dwono oko kabedo luŋ a pii ojolle iye.

¹⁶Abino telo jo ame waŋgi oto, i yo ame gin mom oŋeo, ame yam gin mom ru obeo iye, an abino peyogi iye. Abino miyo colpiny ame owumogi doko lero, lobo obedo popony abino miyo doko apwot, Magi en gin ame an abino timo, mom gire abino wekogi ata.

¹⁷Jo luŋ ame geno cal ame opao apaa, jo ame kobbi cal jogi ni, ‘Wun ibedo wunu Obaŋawa, obino dwokogi cen i twon lewic adwoŋ meicel.’ ”

¹⁸Rwot dok te kobo ni, “Winy wunu wun odingyit, yab waŋwu ba, wun otowaŋ, me inen wunu.

¹⁹Tye ŋattoro ame waŋe oto calo waŋ amirona, onyo ame yite odiŋ kato me a dano ame aoro? Ŋa ame waŋe oto calo danona ame ojalle pira, onyo ame waŋe oto calo amirona an Rwot?

²⁰Icrael neno jami apol meicel, cite mom gire keto cunye me neno aber, yite gire twolo, ame rome winyo kop, cite mom winyo ginnoro.”

²¹Rwot gire rik omito ni jo dwor cikkere, oket iye kwogo, pien en kite atira,

²²Cite man obedo rok ame doŋ otyeko yako, omao limgi oko gin luŋ doŋ otyeko ciko oko i bur, doŋ okanogi oko i ot kol; odoko doŋ gi-ayaka a jo aboŋo ŋattoro ame larogi, gin doŋ gi-ayaka aboŋo ŋattoro ame kobo ni, Dwok kakare!

²³Ŋa i akinawu ame bino doŋ ciko yite winyo man, ame cakere aman wot anyim bino doŋ keto cunye me winyo aber?

²⁴Ŋa omio Yakobo i ciŋ ŋat oyake, kede Icrael i ciŋ oyak? Mom mannono obedo Rwot ame wan obalo i nyime-ni? Mom en Rwot ame gin okwero lubo yo ame en mito-ni; Dok daŋ okwero winyo cikkere oko-ni?

²⁵Mannono omio en ocoro lyeto me akemo mere i komwa, kede tekome mony; maccere olyel oromo yi Icrael luŋ, cite wan naka mom omedo niaŋ gin ame atimere, maccere owaŋowa cite wan giwa mom oparo kadi acel.