Read lango Icaya 43 Bible Online

Icaya 43 - lango bible

Icaya 43

¹Aman doŋ Rwot ame oketi yin Yakobo, ame ocwei yin Icrael, okobo ni, “Kur ilwor, pien atyeko lakoro yin. An alwoŋi kede nyiŋi, yin ibedo mega.

²Ka ibino beo i dye nam atut, an abino bedo kedi; pii me kulo mom bino mwonyi gire; kadi ibino beo i cuny mac, mom gire ibino waŋ, leb mac mom bino gudi.

³Pien an a Rwot Obaŋani, an a Ŋat Acil me Icrael, ame lari. Abino miyo Miciri calo lim me lakoro yin, Eciopia kede Ceba bino bedo calo gin me wili.

⁴Pien yin ibedo twon ginnoro me wel meicel baŋa, piri litta meicel, aketo kwogo i komi, dok amari, en omio amio jo me lakoro yin, kede rok apapat pi laro kwoni.

⁵Kur ilwor, an atye kedi, abino kwanyo ikwai oko i tuŋ kide, abino dwoggo joni oko i tuŋ to.

⁶Abino kobbi jo i tuŋ anyarodi ni, ‘Weke wunu doŋ’, kede jo me tutuŋ anyarolum ni, ‘Kur doŋ imedde wunu make’; wek awo bena kede anyirana dwog doŋ oko i kannabor, wekgi odwog doŋ oko i wi podo luŋ.

⁷Gin obedo jona, aketogi me kela kwogo i koma.”

⁸Obaŋa okobo ni, “Kel jona i ka ŋolo kop, Waŋgi tye, cite mom oneno; yitgi tye, ento mom owinyo kop.

⁹Kel rok luŋ karacel i ka ŋolo kop, mi jo luŋ cokere kuno, Ŋa i akinagi ame twero kobo man, ame twero nyuttiwa gin ame yam doŋ otimere oko con? Gin myero kel ocadengi me kwanyo kop i komgi, me ka gin owinyo kopgi, gin mok ni tye kakare.

¹⁰“Wun jo Icrael, ibedo wunu cadenna; wun ibedo wunu omirona ame ayero, me iŋea wunu dok daŋ iye wunu an, iniaŋ wunu ni an abedo Obaŋa an kena, Mom dok tye obaŋa moro ocele kono an keken, cakere con moro mom obedo tye, dok mom daŋ bino bedo tye.

¹¹“An kena en abedo Rwot, mom dok tye moro ocele ame twero larowu,

¹²An rik atito pire, alarowu, dok daŋ arabo pire, i kare ame obaŋa moro a welo mom tye i akinawu; wun ibedo wunu cadenna.

¹³An Obaŋa, daŋ abino medde bedo Obaŋa nakanaka; mom dok tye ŋattoro ocele ame twero laro gin i ciŋa, mom tye ŋattoro ame twero geŋa tiyo ticca.”

¹⁴Rwot Obaŋa me Icrael ame larowu okobo ni, “Me larowu, an abino cwayo mony i kom jo Babulon; gin bino turo lodi me dogcel oko luŋ, woo a jo Kaldaya bino lokere doko kumo,

¹⁵An abedo Rwot Obaŋawu ame cil, an en acweowu, wun jo Icrael, dok an abakawu.”

¹⁶Rwot en ame rik oyabo yo i dye nam, en omio yo obedo tye i dye twoni pii ager meicel.

¹⁷En opeo twon mony atek meicel naka i to, lwak gadigadi lweny kede aguragura, Gin luŋ obuto piny ame mom dok oromo ya malo, onekogi, oto calo uci tara.

¹⁸En Rwot okobo ni, “Myero wiwu doŋ wil oko i kom gin otimere con, kur ibed paro wunu gin ame yam doŋ otimere oko,

¹⁹Wun myero doŋ icik waŋwu i kom gin anyen ame atimo, aman doŋ tye atimere. Pe ineno wunu ce? Abino tuco yo beo i dye tim, pii bino cako nen i tim kuno.

²⁰Anaka leyi me tim daŋ bino wora, ekwe kede udu bino paka; pien amio pii onen i dye tim ata, kede kulli i lobo otwo ikaŋ, me ami pii baŋ jona ame ayero.

²¹Gin obedo rok ame an acweogi pira, me gin ower wer me paka.”

²²Rwot okobo ni, “Aco yin gire rik mom iwora, yin Yakobo, yin rik onwoŋo doŋ iol keda oko, yin Icrael.

²³Rik mom doŋ iyala kadi acel kede rommini; rik mom iwora kede motti ame oŋolo. An daŋ rik mom abedo yeli pi mot me yala, mom daŋ abedo olokomi pi odok a ŋwece kur.

²⁴Mom rik iwilo odok a ŋwece kur pira, mom daŋ imia wunu ayeŋ i dwol me motwu ame oŋolo. Akaka mannono, ibedo miya wunu yeyo peko me balwu kun lolo wunu koma i balwu areco.

²⁵Aco ka bedo amannono, an en ame ajwao balwu, atimo amannono pi kite ame atye kede, an mom dok abino po pi balwu.

²⁶Poyo wia me olar kop karacel kedwu, kel kop ame nyuto ni yin itye atira,

²⁷Kwarowu me agege rik daŋ obalo, olocwu daŋ obalo bal i koma.

²⁸Mannono omio ababalo otel me kabedo acil oko, ajalo Yakobo me aneka, Icrael te doko gi-ayeta a jo.”