Read lango Icaya 44 Bible Online

Icaya 44 - lango bible

Icaya 44

¹Rwot okobo ni, “Winy ba, yin amirona Icrael, wun jona ame ayero, ikwae a Yakobo.

²An a Rwot ame aketi, ame acwei i yi totti, an abedo konyi kare ame kwo cakere i komi. Kur ibed kede lworo, pien yin Yakobo ibedo amirona, yin Jecurun ame ayero.

³Pien abino onyo pii i lobo ame otwo, ame pii pe iye, abino miyo pii cako mol i lobo otwo; abino onyo Cuny Acil i kom ikwai, dok abino miyo gum baŋ ikwai.

⁴Gin bino bedo aber calo lum ame pii oromo, calo yen ame tye i ŋet kulo ame mol.

⁵Jo mogo bino kobo ni, gin obedo jo a Rwot. Gin bino cako bino baŋ jo a Yakobo me notte kedgi. Jo ocele bino coyo nyiŋ Rwot i ŋut ciŋgi, obino lwoŋere kengi ni gin obedo jo ame tye i akina Icrael.”

⁶Rwot ame obedo abaka me Icrael, Rwot me mony ame laro jo me Icrael okobo ni, “An abedo me agege kede me agikki mere, mom dok tye obaŋa moro ocele kono an kena,

⁷Tye ŋattoro ocele ame cal keda, ame twero tito yore i yore gin ame bino timere anyim. Koŋ en doŋ tittiwa odoco, cakere i ageyi nak i agikki mere?

⁸Kur ilwor wunu, komwu myero kur myel! An rik atittiwu oko con, kun anyuto jami ducu ame bino timere. Wun ibedo wunu cadenna, Tye dok Obaŋa moro ocele? Tye dok Obaŋa moro ame tek meicel ame an yam mom ru awinyo pire?”

⁹Jo luŋ ame tio cal jogi obedo jo ame konygi pe, dok cal jogi ame pirgi tekkigi-nono mom konyo ginnoro kadi acel. Jo ame woro cal jogi-nono obedo otowaŋ ame mom niaŋ; obino miyo lewic mako kodi jo-nono.

¹⁰Ŋa ame tio cal jok, onyo ame twako cal me awora ame mom romo konyo ginnoro?

¹¹Nen ba, obino miyo lewic mako jo luŋ ame WORO kodi callono. Jo ame tio gin callono obedo dano a dana. Gin luŋ myero ocokere, obin ocuŋ i ka ŋolo kop, lworo bino makogi, alee bino twodogi, gin luŋ.

¹²Atet nyonyo tio ticcere kede mac. Teko ame tye i bade en ame tiŋo kede anyul me luŋo nyonyo, Kec neko, oryo pii ciro, eka tekomere te dok oko piny.

¹³Aco apac geo pimo bao, kun ŋolo alam; cwero kede randa, te bedo pimo i gi-ticcere. En tio gire-nono acal kede dano ame daŋ ber meicel calo dano, me aketa i ot me woro.

¹⁴En twero yero yat Cedar, onyo yero yattoro ame tye i buŋ i tim, te toŋo. Kare ocele pito yat cedar mere, te bedo kuro kot me doŋo.

¹⁵Yattono icennere konyo dano acalo yen me awaŋa i mac, kun dul ocele bedo me tiyo cal jok. Dullere tuŋcel bedo me kuto mac me aoa, kede me tedo; dul ocele en doŋ te te tiyo kede cal jok me awora mere.

¹⁶Dullere en kuto i mac, bulo kede riŋo me acama mere, ame te medde teko. Ka en tye aobo kome i maccono kobo ni, “Maccere malo meicel! Aobo koma rac wok!”

¹⁷Eka tuŋcel en tio kede cal jokkere me awora mere; en woro callere-nono, kun kwao ni, “Yin ibedo obaŋana, lara!”

¹⁸Kodi jo-nono miŋ meicel ame mom romo ŋeyo gin ame otimo. Waŋgi owumere oko ame mom oromo neno; tamgi daŋ oballe oko ame mom oromo niaŋ i gin a tye ateni.

¹⁹Mom tye ŋattoro i akina oti cal jogi ame tamo, onyo ame tye kede ŋec, ame twero niaŋ te kobo ni, “Yat ame atio i cal jok-ki mogo awaŋo oko i mac, en ocele amyeno i kwon, abulo i riŋo ate camo oko; tuŋ ocele en ame ate tiyo kede cal jok me awora. An en doŋ atye ka woro dul yat.”

²⁰En moko buru; tammere me miŋo omio en orwenyo odoco ame mom doŋ romo larre kene, mom daŋ romo niaŋ ni cal apaa ame emako i ciŋe mom gire obedo obaŋa kadi acel.

²¹Rwot okobo ni, “Yin Yakobo koŋ ipoyo ba kop magi, myero ipo ni yin ibedo amirona. An rik aketi me bedo amirona, wia gire mom bino wil i komi, yin Icrael.

²²Aweo doŋ balli oko calo pol, kede tim luŋ areco ame ibedo timo aketo daŋ oko calo ekuna. Dwog doŋ cen baŋa, pien atyeko doŋ lakoro yin oko.”

²³Red doŋ i wer me yomcuny, yin polo; pien Rwot doŋ otimo! Red wunu ba, wun kabedo ame tye piny! Red wunu ba, wun kiddi luŋ, kede yen luŋ ame tye i buŋ, i tim. Pien Rwot doŋ otyeko lakoro Yakobo, kwogo mere doŋ onen oko kom Icrael.

²⁴Rwot ame oketi, ocwei i totti, ame en Rwot ame lakoro yin okobo ni, “An abedo Rwot ame oketo jami ducu, aryeo polo an kena, kare ame atio lobo ŋattoro onwoŋo pe me konya.

²⁵Amio anyut ogoba odoko gin a konnyere pe, otyet amio odoko jo amiŋ; acoro jo aryek, adwoko cen, amiogi oŋeo ni ryeko mom ginnoro.

²⁶Amio kop ame omirona otito ocobere kakare, gin ame amio okwenana okobo, amio ocobere, Akobbi Jerucalem ni jo dok bino bedo iye kuno, kede boma me Juda ni dok obino gerogi, kan ame yam odoko wi obur bino dokoboma.

²⁷Aciko pie i nam atut kede i kulli ni myero odwon oko, pii daŋ te dwono oko,

²⁸Akobbi Kuro ni en bino loc kakara, ni en bino tiyo gin ame an amito ni tiye; en bino miyo ogero Jerucalem, dok bino miyo ocibo acakki te ot me wora.”