Read lango Icaya 45 Bible Online

Icaya 45 - lango bible

Icaya 45

¹Rwot okobo ni, “Kuro en a doŋ odoko abaka ame atyeko wiro kede moo, an doŋ atyeko kete me loyo rok apol, acwae me wot turo teko obakki, atye ka yabo nyime bedo aler a mom dok bino cegere.”

²Rwot te kobbi Kuro ni, “An ikoma abino telo nyimi, abino yiko yo piri bedo apwot, abino tuturo doggola me mola oko, ate tuturo daŋ nyonyo me dogcel oko.

³Abino miyi lim ame okano kan adiŋ, kagi-mogo ame mom jo ŋeo kadi acel, me iŋe ni an Rwot Obaŋa me Icrael, an en a doŋ atyeko yeri.

⁴Aketi me konyo amirona Yakobo, jo Icrael ame gin obedo jona, mannono en omio an ayeri, acakki nyiŋi anyen kadi bed yin mom iŋea.

⁵An en abedo Rwot, mom dok tye moro ocele, Obaŋa moro ocele gire mom dok tye, kono an kena, abino miyi teko kadi bed ym mom iŋea.

⁶Man atimo me jo luŋ ne ni an abedo Rwot kena, cakere i but lobo tuŋcel tuno tun ocele, mom dok tye obaŋa moro ocele kono an kena.

⁷An en aketo lero kede colpiny, amio kuc bedo tye dok can daŋ bedo tye; an a Rwot en atiyo jami magi luŋ.

⁸Abino onyo kite atira piny kun ya i polo, abino miyo cwe calo kot, lobo bino yabere me gamo larre, dok kite atira daŋ bino cakere i lobo, an a Rwot abino miyo man timere.”

⁹Dano ame pyem Obaŋa ame okete, bino neno can. Gulu twero pyem i ŋat ocwee? Lobo twero penyo acwe gulu gin ame en atiyo? Onyo gulu twero kobbi acwe gulu ni mom gire otic aber?

¹⁰Atin ame penyo pappere ni kara inywalo ŋo, atinnono bino neno can; onyo ame penyo tottere ni iremo rem me nywal i ŋo?

¹¹Rwot ame obedo Ŋat Acil, ame oketo Icrael, okobo ni, “Wun mom iromo wunu penya kop i kom itinona, dok mom itye kede twerroro me kobba gin a myero ati,

¹²An en atio lobo, aketo dano me bedo iye; aryeo polo kite ame tye kede ni pi tekona, an en a daŋ aciko jami luŋ me polo ni bed kite ame tye kede-ni.

¹³An en aketo Kuro me moko kite atira, abino miyo en cobo ticcere luŋ kakare; en bino gero bomana, dok bino gonyo jona oko i opii, mom pi cul kadi pi mottoro ame abino miye.” Man kop a Rwot me mony okobo.

¹⁴Rwot okobbi Icrael ni, “Lonyo luŋ me Miciri kede jami acata me Eciopia, gin luŋ bino dokomegi, kede jo Ceba ame obedo twoni jo abocoboco, gin luŋ bino bino baŋi te doko omironi, gin bino lubo yori kun otweogi oko kede jegere, gin bino ryebere piny i nyimi me wori, Gin luŋ obino mwolle i nyim kun okobo ni, ‘Yin gire en itye kede Obaŋa, yin keni, obaŋa moro ocele gire doŋ mom, kono en kene.’ ”

¹⁵Ateni, yin gire ibedo Obaŋa ame pono oko, yin gire en ilaro jo, Ama Obaŋa me Icrael.

¹⁶Lewic bino mako jo luŋ ame tio cal jogi, alee bino twodogi gin luŋ.

¹⁷Cite jo Icrael Rwot gire bino laro oko, lar ame olarogi kede bino ri nakanaka; lewic gire mom bino makogi, alee mom bino twodogi kadi acel.

¹⁸Pien Rwot gire en oketo polo, en gire en obedo Obaŋa! En ocako tic me keto lobo, te tyeko, en omio omoko atek odoco, En rik mom oketo lobo te weko kun tye atata, en oketo me bedo kan ame otwero bedo iye, En Rwot en ame okobo ni, “An a Rwot, moro ocele gire doŋ mom.

¹⁹An gira rik mom akobo kop i muŋ, i lobo ame tye i piny acol, an gira rik mom akobbi ikwae a Yakobo ni, ‘Ibino yenya wunu i kan obedo atata, An abedo Rwot ame kobo kop ateni, anyuto gin ame tye kakare.’ ”

²⁰Rwot okobo ni, “Cokere wunu karacel, me ibin wunu, biye wunu aceggi, wun jo me rok apapat ame ibwot wunu. Jo ame bedo tiŋo cal jogi ame opao apaa obedo jo a mom niaŋ kadi acel; obedo balo karegi i kwayo cal jok ame mom twero larogi kadi acel.

²¹Biye inyut wunu kopwu i ka pido; me jo ame apido penyere kengi. Ŋa ame rik omio kop man oŋeye geye i kare acon? Mom an a Rwot, en a rik atimo? mom dok tye obaŋa moro ocele, kono an kena, an en a bedo Obaŋa a kite atira, ame laro jo, mom dok tye moro ocele kadi acel.

²²“Lokere ibin wunu baŋa, me alarwu, wun jo ame tye i wi podo luŋ! Pien an abedo Obaŋa, an kena.

²³An gira doŋ atyeko kwoŋ oko, kop ame oya i doga tye atira, koppono mom bino poto piny ame mom ocobere, ni, ‘Jo luŋ bino rumo congi i nyima, leb jo luŋ bino kwoŋo kwoŋ me wora’.

²⁴“Jo luŋ bino kobo ni, kite atira kede teko nwoŋsere ka baŋ Rwot; jo luŋ ame cunygi waŋ i kome, bino bino baŋe kun otye kede lewic.

²⁵Ikwae Icrael luŋ, bino loyo kop ote bedo kede kwogo i Rwot.”