Read lango Icaya 46 Bible Online

Icaya 46 - lango bible

Icaya 46

¹“Cal jogi a jo Babulon doŋ ceggi gik oko! Bel kede Nebo a yam oworo, aman doŋ odoko gi-ayea a leyi, aman doŋ odoko twon yec apek meicel ame olokom Leyi.

²Gin luŋ doŋ okulo wigi piny, oguŋo karacel, cal jogi mom twero larre kengi; aco doŋ omakogi, aterogi iyi opii.

³“Winy wunu ba koppa, wun ikwae a Yakobo, wun jo luŋ ame idoŋ wunu i ot a jona Icrael. An abedo gwokowu cakere i yi totowu, atiŋowu cakere i kare me nywalowu;

⁴An abedo Obaŋawu ame bino gwokowu, abino gwokowu naka iti wunu, abino bedo tiŋowu naka i kare ame wiwu doŋ i lwar. An en aketowu, dok abino daŋ gwokowu, abino konyowu, abino larowu.

⁵“Kara ibino pora wunu kede ŋa ba? Tye ŋattoro ocele ame cal keda?

⁶Jo ame juko lim ajuka iyi icaogi, ame pimo ryal i mijan, oculo atet jabu me tiyigi cal jok, gin te ryebere i nyime woro.

⁷Otino ote ryoŋo i wi gwokgi, ocibo kakare, te cuŋ iye atwal, kun mom twero ya kene kabedo mere-nono, Ka jo ocwao kwacgi baŋe, en mom gamo, mom daŋ laro jo ame okwaenono i cangi.

⁸“Po wunu i kop man wun obalo, koŋ itam wunu, ilwod wunu koppere i cunywu,

⁹Poyo wunu gin ame rik otimere con, pien an abedo Obaŋa, an kena, mom dok tye moro ame cal keda.

¹⁰Cakere con i ageyi, anyuto kite ame bino timere kede oko, naka kite ame bino gik kede. Akobo ni gin ame ayiko luŋ bino cobere, abino timo ginnoro luŋ ame ayiko me tiyo.

¹¹Abino lwoŋo dano calo acut i tuŋ kide; dano-nono bino ya i kannabor, me cobo gin ame doŋ atyeko yiko. An doŋ atyeko kobo, bino daŋ timere.

¹²“Winy wunu koppa ba, wun jo ame cunywu nwaŋ, wun jo ame tamo ni loyo kop bor meicel kedwu.

¹³Nino me loyo kop doŋ ceggi acega, mom doŋ bor kadi acel, mom doŋ abino gal me laro jo, abino laro Jerucalem, pi Icrael ame anwoŋo kwogona pire.”