Read lango Icaya 47 Bible Online

Icaya 47 - lango bible

Icaya 47

¹Rwot okobo ni, “Yitto piny, ibin ibed piny iyi apua, yin Babulon ame mom ru iŋeye ico moro; bed kom piny i lobo aboŋo kom me loc, yin lobo me Kaldaya. Pien mom dok obino kobo ni, iyom a mom iromo tiyo ginnoro.

²Kwany anya kidi me iregi i moko, gony itambara oko i wii, gony boŋo abor naka piny-nyu oko i komi me tyeni nen, be i kulo, idokoro tuŋ ca

³Komi me mon bino doŋ nono, komi a mom myero nen bino doŋ nen kannaler. An doŋ abino culo kwor, mom abino weko dano moro kadi acel.

⁴Ŋat ame larowa nyiŋ Rwot me mony, en obedo Ŋat Acil me Icrael.

⁵“Bed iliŋ mot, kun itye i piny acol, yin lobo me Kaldaya; pien mom dok obino lwoŋi ni, imat ame loo rok apol.

⁶Akemo rik omaka i kom jona, amiogi obedo calo gin me kwer; amiogi i te locci, kica mom te makki i komgi kadi acel; kolli te bedo opek meicel baŋ jo oteggo.

⁷Yin onwoŋo ikobo ni ibino loyo rok apol nakanaka, omio mom ite keto cunyi i kop magi, akadi po pi kite ame bino gik kede.

⁸“Pi mannono ba, winy kop man, yin ame imaro yomcuny wokki yin ame itamo ni itye giri i kuc. Yin i kobo i cunyi ni mom dok tye ŋattoro a rom kedi, yin itamo ni mom itwero doko dako to, itinoni daŋ gire mom bino to.

⁹Kit can aryo-nono luŋ bino poto i komi i nino acel, i dakika moro anonok; to itino kede doko dako to, gin luŋ bino rwomo rutte i wii karacel. Kadi bed iti i twoni timmogo me jojok, akadi ityet tyet arom mene.

¹⁰Yin onwoŋo itamo ni itye giri i kuc i kom timmi arac, kun itamo ni ŋattoro gire mom tye ame neni, Ryekoni kede ŋec ame itye kede orwenyi arwenya, ibedo kobo i cunyi ni mom tye ŋattoro a rom kedi,

¹¹Cite gin arac bino poto i komi, ame tim-mi me jojok mom romo juko, Can bino poto i komi, ame mom romo kwanyere kadi acel; to bino poto i komi oyot, ame yin mom iŋeo.

¹²Cuŋ atek ityet, yin medde ameda i timo tim me jojok, ame ibedo timo cakere i tinoni; atot onyo twero konyi i yore moro, onyo ca twero miyo jo lwori.

¹³Tekoni otum oko kadi bed otye ka miyi tam meicel, koŋ gin doŋ obin olari, gin jo ame ŋeo poko polo, kede jo ame ŋio acer, jo ame i kare luŋ i por dwe anyen, otito gin ame bino timere i komi.

¹⁴Nen ba, gin gire orom aroma i cuŋ kal, mac gire waŋogi oko; gin mom twero laro kwogi kengi, i kom teko a leb mac. Man mom obedo mac me aoa, mom daŋ mac ame otwero bedo i ŋete,

¹⁵Jo ame ibedo yelle kedgi-nono tye kittono baŋi, ame ibedo balo kareni baŋgi cakere i tinoni. Gin luŋ obino weki ata, kun ŋat man mako yo mere ŋat ame bino lari mom tye.”