Read lango Icaya 48 Bible Online

Icaya 48 - lango bible

Icaya 48

¹Koŋ iwiny wunu man, wun ot a Yakobo, ame olwoŋowu i nyiŋ Icrael, ame ibedo wunu ikwae a Juda. Wun ikwoŋere wunu i nyiŋ Rwot, kun ituco wunu nyiŋ Obaŋa me Icrael, cite mom i ateni, onyo i yore aber.

²Aco kono olwoŋere gin kengi ni gin jo me boma acil, dok ojeŋere i kom Obaŋa me Icrael, ame nyiŋe Rwot me mony,

³“Rik atito gin ame bino timere oko con, koppere rik oya i doga, eka ate miyo ŋeye; amio daŋ oru tiye oko, te daŋ cobere.

⁴Pien onwoŋo aŋeo ni cunywu nwaŋ, kun ŋutwu nwaŋ calo nyonyo, eka tur nyimwu te bedo calo mola,

⁵en omio rik atittiwu koppere con, arabbiwu pire con kun mom ru otimere, me kur ikob wunu ni cal jogiwu en otimo, kun ikobo wunu ni cal apaawu kede cal atwakawu en okobo ni timere.

⁶“Doŋ ityeko wunu winyo; aman doŋ myero inen wunu man ducu; mom ibino wunu rabo pire? Cakere aman wot kede anyim abino miyo iwinyo wunu gigi mogo anyen, gin okane ame mom iŋeo kadi acel.

⁷Pwod amio timere aman, pe con; yam mom ru iwnyo wunu pirgi kadi acel, me kur ikob wunu ni yam gire iŋeogi con.

⁸Yam mom ru iwinyo wunu, dok daŋ mom ru iŋeo wunu, cakere con yitwu onwoŋo mom ru oyabere, Pien onwoŋo aŋeo ni ibino bedo wunu ogoba, dok daŋ cakere i yic, wun onwoŋo ibedo wunu jo a jem.

⁹“Abino miyo akemona koŋ gal pi nyiŋa, abino juko koŋ akemona pirwu mejo paka, me kur ajwerwu oko,

¹⁰Nen ba, doŋ aliyiwu oko, cite mom acalo ryal; atemowu i mac tet agwa meicel.

¹¹Atimo pira kena, atimo pira kena, kara atwero weko obalo nyiŋa piŋo? Mom atwero jalo kwogona baŋ obaŋa moro ocele.

¹²“Ter yiti iwiny koppa, yin Yakobo, wun jo Icrael ame an alwoŋo. An a en, an me agege, kede me agikki mere.

¹³Ciŋa en ame oketo acakki te lobo, ciŋa tuŋcem en oryeo polo; ka alwoŋogi, gin luŋ oya karacel.

¹⁴“Wun luŋ cokere wunu, me iwiny wunu, Ŋa i akinagi ame orabo ni man bino timere? Ŋat ame amaro bino cobo yikka i kom Babulon, en bino lweny i kom jo Kaldaya.

¹⁵An gire, an i koma doŋ akobo, dok alwoŋe daŋ oko, an akele, nyime bino bedo aber.

¹⁶Noka wunu aceggi, me iwiny wunu: cakere i ageyi, an mom akobo kopporo i muŋ, cakere i kare ame ocako timere, an onwoŋo atye kuno.” Aman doŋ Rwot Obaŋa oora kede Cunnyere Acil.

¹⁷Rwot, ame en Ŋat Acil me Icrael, ame lakorowu i opii, okobo ni, “An a Rwot Obaŋawu, ame mito pwonyowu me wek ibed wunu aber, kun atelowu i yo ame myero iwot wunu iye.

¹⁸Kono onwoŋo iwinyo wunu cikka! Kucwu kono omol calo pii i kulo, kono i loo wunu kop calo nam ame pii mere mol aboŋo weo,

¹⁹aco ikwaewu kono calo kwoyo, jo ame oya i komwu kono dwoŋ calo apua; kono nyiŋgi mom orwenyo kadi acel, kono mom gire ojwaowu oko nyima.”

²⁰Ya wunu oko i Babulon, iŋwec wunu jo Kaldaya, nyut wunu man i goyo ijira, rab wunu pire, cwal wunu koppere naka i agikki piny, kun ikobo wunu ni, “Rwot doŋ olakoro amiro mere Yakobo oko.”

²¹Kare ame en telogi i tim, oryo pii mom ocirogi; omio pii omollo pirgi kun yal lela, obaro lela pii te kirre oko.

²²“Kuc gire mom pi obalo”, Rwot okobo.