Read lango Icaya 49 Bible Online

Icaya 49 - lango bible

Icaya 49

¹Winy wunu koppa, wun lobo ame tye i dog nam, cik wunu yitwu, wun rok ame oya i kannabor, Rwot olwoŋa ame pwod atye i yic, ocako nyiŋa kun pwod atye i kom totta.

²En omio kop oya i doga bit calo pala lweny, en kana i tipo me ciŋe; en omio adoko atero ame opako lake abit, en okana oko iyi icao me atero mere.

³En okobba ni, “Yin amirona, yin Icrael ame abino nwoŋo kwogo pire.”

⁴Cite an ate kobo ni, “Alole kom i tic nono, atyeko tekona kom nononono, aboŋo konnyoro”; kadi amannono, gin ame ber pira nwoŋere gire baŋ Rwot, Obaŋana gire bino cula pi gin ame atio,

⁵Ame pwod mom ru onywala, “Rwot onwoŋo doŋ oyera oko, en oketa me bedo amiro mere ame bino dwoggo jo mere baŋe, me coko Icrael dwoggo baŋe, pien Rwot oketo kwogo i koma, Obaŋana en obedo tekona.”

⁶En Rwot-tono okobo ni, “Bedo amirona obedo gin ayot meicel, me tiŋo atekere a Yakobo apapat malo, kede dwogo jo Icrael ame agwoagwoko; an doŋ aketi me bedo cen baŋ orok, me ami larre tun i agikki wi podo luŋ.”

⁷Rwot ame Ŋat Acil me Icrael, ame en a daŋ lakoro jo Icrael, en okobo kit man baŋ ŋat ame ocao atek, ŋat ame rok apapat okwero oko, ame tye acalo amiro oloc: “Obakki bino neni te ya malo, oloc bino neni te ryebere piny; man bino timere pi Rwot, ame en agen, Ŋat Acil me Icrael, ame oyeri.”

⁸Rwot okobo ni; “Rik agamo dogi i kare me timo jo ber, rik akonyi i nino me larre, atyeko gwoki, ate miyi bedo acalo gi-cikere baŋ rok luŋ, abino miyo doŋ ibedo i loboni, ibino poko lobo ame aman odoko wi obur.

⁹Abino kobo baŋ obuc ni, ‘Wot wunu doŋ oko,’ kede baŋ jo a tye kannacol ni, ‘Kato wunu kannaler.’ Gin bino calli i rommi ame cemo i ŋet yo ducu, ka cemgi bino bedo i wi tur luŋ ame yen pe iye,

¹⁰Kec gire mom bino nekogi, akadi oryo pii mom bino cirogi, yamo alyet kede cem mom bino wunogi, pien ŋat ame kica omako i komgi en ame bino telogi, bino telogi naka i ŋet pii ame kukunya i piny.

¹¹Abino miyo yo beo i wi kiddina luŋ, obino tuco gudona woto malo.

¹²Nen ba, jona bino ya i kannabor, kun oya i tuŋ anyarodi kede tuŋ to, jo ocel bino ya i lobo me Cuene.”

¹³Wer wer me yomcuny ba, yin polo, lel ba, yin lobo; mwoc wunu wer oko wun kiddi! Pien Rwot doŋ bino kweyo cuny jo mere, kica bino make i kom jo mere ame oneno can meicel.

¹⁴Ento jo me Jerucalem okobo ni, “Rwot doŋ owekowa ata, wie gire doŋ owil oko i komwa.”

¹⁵Cite Rwot te gamo ni, “Dako wie twero wil i kom atinnere ame edoto, kica mom twero makke i kom wode ame enywalo? Kadi bed dano wie twero wil, cite an wia mom bino wil i komi.

¹⁶Nen ba, yin Cion atyeko goro nyiŋi i ciŋa, apama celli tye i nyima kare luŋ.

¹⁷Jo ame bino geri abino oyot meicel, jo ame omumuko yin bino ya oko i baŋi.

¹⁸Tiŋ waŋi, inen kabedo luŋ; gin luŋ ocokere karacel obino baŋi, Rwot okobo ni, ‘Kite acalo an atye kwo, yin ibino rukogi calo gin me kwogo, ibino tweyogi i komi kite ame atera timo.’

¹⁹“Ateni, wi oburri doŋ odoŋ nono, loboni doŋ otyeko balle oko; cite aman doŋ bino bedo adiŋ meicel pi jo ame bino bedo kuno, jo ame yam omwonyi bino doŋ bedo kannabor.

²⁰Itinoni ame onywalo i opii, pwod dok ibino winyo kobo ni, ‘Kabedona diŋ meicel; myero dok meddiwa kabedo.’

²¹Ibino cako penyere keni i cunyi ni, ‘Ŋa kara onywallo jo man? Rik adoŋ nono aboŋo atinnoro, calo oraŋa, ote tera oko teŋe calo opii; kara ŋa a dokopito itino man? Koŋ inen, rik adoŋ an kena, kara itino man dok oya i kwene ba?’ ”

²²Rwot Obaŋa okobbi jo mere ni, “Nen ba, abino ryeyo ciŋa baŋ orok, abino tiŋo benderana baŋ rok apol; gin bino kelo awobeni kun okwako i korgi, obino tiŋo anyirani i wi gwokgi.

²³Obakki en a bino pito itinoni calo papagi, mongi en a bino bedo calo totogi. Gin bino ryebere piny i nyimi me wori, obino naŋo apua i tyeni, Mannono bino miyo iŋeo ni an a Rwot; lewic mom bino mako jo ame kura.

²⁴Otwero mayo jami ayaka i ciŋ jo atek, onyo otwero mayo jo ame omako calo pii i ciŋ ŋat ager?”

²⁵Cite Rwot okobo ni, “Opii i ciŋ lo atek obino mayo gire oko; jami ayaka i ciŋ lo ager daŋ obino gamo gire oko; pien an abino pyem i jo ame pyem kedwu, abino laro itinowu oko.

²⁶Abino miyo jo ame wunowu camo riŋo komgi kengi, obino mer i remo komgi kengi calo koŋo olok. Mannono bino miyo jo luŋ ŋeo, ni an a Rwot ame Alarri. Ŋat Atek me a Yakobo ame lakoro yin.”