Read lango Icaya 5 Bible Online

Icaya 5 - lango bible

Icaya 5

¹Wek koŋ awer baŋ ŋat ame amaro wer me mar i kom poto olokkere. Ŋat ame amaro rik onwoŋo tye kede poto olokkere, i lobo a ceko cem ame tye i wi kidi malo.

²En oboto, oloko, te coko gweŋ iye oko, te pito iye olok abeco ame oyero ayera; te gero pem i dyere me gwoko, te daŋ kunyo bur me jolo pige. En te bedo kede gen ni bino nyako nyige abeco, cite te lunyo dok nyako nyige acalo me olok me tim.

³Aman doŋ ba, wun jo ame bedo i Jerucalem, kede wun jo me Juda, tim wunu ber iŋol wunu kop, i akina an kede poto olokka.

⁴Gin aŋo odoŋ ame onwoŋo myero atim i poto olokka, ame mom atimo? Kare ame an abedo kede gen ni bino nyako nyige abeco, piŋo dok nyige olunyo bedo nyig olok me tim?

⁵Aman koŋ iwek dok atittiwu, gin ame abino timo i kom poto olokka, Abino kwanyo cel iye okome wek balle oko, abino coro apama cellere oko piny, me leyi nyonyogi oko piny.

⁶Abino jalo aweko balle oko, mom dok abino ŋolo jaŋe, akadi doyo tere, okuto kede ocokocok bino tu, te doŋo iye; abino daŋ ciko pol luŋ aluŋa, me kur dok omi kot cwe iye.

⁷Pien poto olok a Rwot me mony, obedo lwak jo Icrael; kede jo me Juda. Gin luŋ obedo gin a en opito me yomoro cunye; en onwoŋo tye kede gen ni gin bino ŋolo kop atira, cite koŋ inen remo ame tye ka ony i akinagi; en onwoŋo tye i gen ni gin bino bedo jo akitegi atira, cite koŋ inen twon koko ame tye i akinagi.

⁸Jo owor ame kubo udi i kom udi wadgi bino neno can, kede jo ame medo pottigi ameda tuno waŋ ame kannoro mom doŋ odoŋ i jo ocele, kun odoŋ doŋ kengi i lobo.

⁹Rwot me mony okobo kun an awinyo, ni, “Ateteni, udi apol gire bino doŋ yigi nono, udi adoŋo, abeco bino doŋ aboŋo ŋattoro i yigi.

¹⁰Poto olok me eka apar bino ya iye koŋo olok ame roma debe aryo keken, kede kotti pukki adek twal, bino ya iye debe aryo keken.”

¹¹Jo ame dilo ibai me yenyo koŋ akeccege, jonono bino neno can, kede jo ame ri i ka koŋo naka idiŋ, tuno ka doŋ omer atek.

¹²Iyi aramagi ogo iye opuk kede naŋa, ajaa, nyamulere, kun koŋo mom rwenyo iye; cite mom gigi oparo kadi acel pi tic ame Rwot otio, akadi bolo waŋgi i gin ame en otio i ciŋe.

¹³Mannono omio jona owoto gire oko iyi opii, pi kwiya pinygi; jo ame oworo i akinagi tye ato kec, lwak jo apipim i akinagi oryo pii ociro gire oko.

¹⁴Mannono omio lyel me yiko jo tye amwonyo lao meicel, kun oŋamo doge alac okato kare, kwogo a Jerucalem kede lwak iye apipim donyo gigi iye, jo ame wo iye kede jo a lelo daŋ.

¹⁵Dit a dano doŋ okwanyo gire oko, co doŋ odoko jo moro apiny meicel; wan a yam obwono kede jo doŋ ogik oko,

¹⁶Cite Rwot me mony gire dit meicel i ŋolo kop atira, Obaŋa Acil nyutte gire ni ecil i timo gin a tye atira,

¹⁷Rommi bino cam i Jerucalem calo eletgi, dok ocwe kede dyegi bino cam i wi obur.

¹⁸Jo ame wao kite arac i tol me goba bino neno can, ame wao bal calo tol ame wao gadigadi,

¹⁹ame okobo ni, “Wek oru timo wunu, me en cuny ticcere acunya, me wan onen; me wek gin a Ŋat Acil me Icrael oyikome atia bin aceggi, me bin, me wan daŋ oŋe.”

²⁰Jo ame lwoŋo gin arac ni ber, eka, ote lunyo lwoŋo gin aber ni rac, jo nono bino neno can, Akaka colpiny gin gigi olunyo loko doko lero, eka akaka lero gin te loko doko colpiny, gin akec, gin loko doko gin alim, eka gin alim gin te loko doko gin akec!

²¹Jo ame ryekogi tye i waŋgi kengi, bino neno can, jo ame nenne kengi ni gin oryek.

²²Omat koŋ adoŋo bino neno can, kede mon ame odiro i nyobo koŋo amit;

²³ame mio ŋat obalo loo kop pi lim owilogi kede i muŋ, ame mom dwokki ŋat a mom i balloro jami mere.

²⁴Pi mannono ba, kite ame leb mac waŋo kede reŋ kal, kede kite ame lum otwo ony kede i leb mac, gin daŋ bino bedo acalo yat ame lwite otop oko onyo acalo yat ame ture two dunyo apua, pien gin okwero winyo cik a Rwot me mony, kun ocao kop ame Ŋat Acil me Icrael okobo.

²⁵Mannono omio akemo omako Rwot i kom jo mere, en te ryeyo ciŋe i komgi, nekogi oko; kiddi adoŋo te yeŋere, komgi oto te radde ata calo yugi i dye yo, Magi-nono luŋ mom gire okweo akemo mere, en gire pwod tye aryeyo ciŋe aryea i komgi.

²⁶En bino tiŋo bendera mere pi rok ame tye kannabor, bino lwoŋogi i agikki piny kun lwio alwia; nen, gin ca, oriŋŋo obino oyotoyot!

²⁷Ŋattoro ame ool onyo ame ogatte mom gire tye i akinagi, ŋattoro ame nino omako waŋe onyo ame onino mom gire tye i akinagi, mom tye ŋattoro ame boŋo pyere ogony, amuk i tyen ŋattoro mom daŋ ocot.

²⁸Aterogi bit meicel, akud aterogi luŋ tye ame otelo atek meicel, ogwenere tyen aguraguragi calo lela, tyen gadigadigi wirre calo yamo ajuru.

²⁹Gin luŋ mor calo eŋatu, morgi calo me itino eŋatu; gin oŋur ote mako gin ame odwaro, ote tero gigi aboŋo ŋattoro ame laro i baŋgi.

³⁰Gin bino nur i kome i nino-nono, acalo nam ame amor. Aco ka ce ibolo waŋi i lobo, nen ba, ibino neno colpiny kede can keken, kun pol ogeŋo waŋ ceŋ oko.