Read lango Icaya 52 Bible Online

Icaya 52 - lango bible

Icaya 52

¹Co oko, co oko i waŋ nino, ruk tekoni, yin Cion; ruk boŋŋini abeco mege, yin Jerucalem, boma acil, pien jo moro a mom olirre, kede jo ame cik ogeŋo, mom dok bino donyo baŋi.

²Teŋ doŋ apua oko i komi me iya malo, yin Jerucalem ame yam ibedo opii, Gony doŋ tol oko i ŋutwu, wun jo me Cion ame yam ibedo wunu opii.

³“Mom oculo limmoro me wilowu, mom daŋ ibino culo limmoro me lakorowu.

⁴Yam iwoto ibedo wunu i Miciri acalo wele, icennere jo Accuria te wunowu aboŋo balloro.

⁵Koŋ inen, aman dok otero jona i Babulon nono; otye ka ŋalo olocgi, jo tye ka cayo nyiŋa dyeceŋ benebene.

⁶Pi mannono, ibino doŋ ŋeya wunu, ibino ŋeyo wunu ni an Obaŋa, ibino ŋeyo wunu ni an en akobo kedwu.”

⁷Tyene neno ber nadi i wi kidi, ŋat ame kelo amut aber, ame rabo amut aber me kuc, ŋat ame rabo pi larre, ame kobo baŋ Cion ni, “Obaŋani tye ka loc.”

⁸Koŋ iwiny, okur bomani tye ka olakino i wer, owero wer me yomcuny karacel; pien otye ka neno Rwot i waŋgi, kun tye ka dwogo i Cion.

⁹Mwoc wunu wer oko, wun luŋ, wun wi odur me Jerucalem; pien Rwot doŋ okweo cuny jo mere oko, olakoro doŋ Jerucalem oko.

¹⁰Rwot doŋ oyabo tekomere acil oko i nyim rok luŋ; jo luŋ i wi podo bino neno kite ame Rwot Obaŋawa olarowa kede.

¹¹Ya oko, ya oko, ya wunu oko i kuno, kur igud wunu ginnoro a mom cil, ya wunu oko i kuno me ilonyere wunu, wun jo ame tiŋo jami a Rwot.

¹²Mom ibino ya wunu i myelkom, mom daŋ ibino riŋo wunu ariŋa, Rwot bino telo nyimwu, Rwot Obaŋa me Icrael bino bedo naka i ŋewu.

¹³Rwot okobo ni, “Nen ba, tic amirona tye awot apwot, obino wore ote tiŋe malo, en bino bedo dano amalo meicel;

¹⁴Jo ame onene obedo kede wur meicel; waŋe onwoŋo pat apata kede me a dano, cal kome daŋ onwoŋo mom rom kede me a dano.

¹⁵En bino poyo kom rok apol kittono, obakki doggi bino two oko pien obino neno gin a yam mom otittigi pire, dok obino niaŋ i gin a yam mom ru owinyo pire.”