Read lango Icaya 53 Bible Online

Icaya 53 - lango bible

Icaya 53

¹“Ŋa, ŋa oye, kop man ame wan otito? Dok ŋa ame bad Rwot onyutte baŋe? Pien en odoŋo i nyime calo ginapita ame pwod adoŋo adoŋa, ame pwod aryeyo lwite aryea i lobo otwo.

²En yam mom tye kede kommoro aber onyo kwogo, ame kono miwa ocik waŋwa i kome, ginnoro ame wao tam a dano onwoŋo mom tye baŋe kadi acel mom tye ginnoro ame twero miyowa obedo i tam i kome.

³Jo ocae te kwere-gu oko, obedo kede cwercuny adwoŋ kede twon rem okato kare. En obedo calo dano ame jo owumo waŋgi oko i kome, Jo ocae, kun mom oparo pire kadi acel.

⁴Ateteni, en okanyo can pirwa, oyeo remwa; cite wan obedo tamo ni Obaŋa en oketo can i kome, ogoe dok ote time cucu.

⁵Ento rik ocobo pi balwa, owane pi timwa areco; can ame oketo i kome okelliwa kuc, pi go ye omio wan ocaŋ.

⁶Wan luŋ onwoŋo orwenyo oko calo rommi, Ŋat acel acel onwoŋo okwanyo yo mere kene, ento Rwot doŋ oketo balwa luŋ i kome.

⁷ Rik owune, oketo can i kome, cite en gire mom oŋamo doge; acalo romo ame otero me aneka, dok acalo romo a liŋ i nyim onyar yerrere, kittono en mom oŋamo gire doge.

⁸Owune, oŋolle kop, ote kwanye oko Ŋa kara oparo pi gin otimere i kome, ni okwanye oko i lobo a jo akwo, ogoe pi bal a rokwa?

⁹Oyiko lyellere karacel kede me otim tim areco, karacel kede alonyo i kare me to mere, kadi bed balloro onwoŋo mom a en otimo, lebe daŋ mom okobo goba.”

¹⁰Rwot gire a rik omito ni myero waŋe, en gire omio en obedo kede rem. I kare ame en bino miye iye kene acalo mot me bal, en bino neno ikwae, en bino medo kare me kwo mere. En bino Cobo gin a Rwot oyiko;

¹¹en bino neno gin aber oya i cwercuny ame ebeo iye, mannono bino kweyo cunye. Pi ŋeccere, amirona ame kite atira, bino miyo okwano jo apol ni kitegi atira, en bino yeyo balgi.

¹²Mannono bino miyo amie kabedo me woro i akina jo adoŋo, obino poko jami ayaka karacel i jo atek i lweny, pien en ojalo kwo mere i to, dok okwane karacel obalo; ento en oyeo bal a jo apol meicel, dok okwao Obaŋa pi obalo.