Read lango Icaya 54 Bible Online

Icaya 54 - lango bible

Icaya 54

¹Mwoc wer, iredu i yomcuny, yin amerem nywal mom ogudi! Pien itino a dako ame oweko bino bedo apol, kato me a dako ame obedo kede cware, man kop a Rwot.

²Dok imed nyayo kabedo me kemani bed alac, mi med doŋ ryeyo boŋo me celo kabedoni; kur iwek mogo doŋ, med tol kemani bed aboco, gur teke daŋ bed atek.

³Pien waŋ loboni bino medde tuŋŋi kede tuŋŋi, ikwai bino leyo ka orok, dok obino poŋo boma luŋ ame tye nono,

⁴Kur ilwor, pien lewic mom dok bino maki; kur imi alee twodi, pien mom obino miyo lewic maki. Pien wii bino wil oko i kom lewic a rik ibedo kede i tinoni, mom dok ibino poyo acae me bedo keni aboŋo cwari.

⁵Pien Ŋat ocwei, en obedo cwari, nyiŋe Rwot me mony; Ŋat Acil me Icrael en a lakoro yin, olwoŋo ni Obaŋa me wi podo luŋ. Obaŋa bino laro Jerucalem i opii

⁶Pien Rwot doŋ otyeko lwoŋi oko, acalo dako ame oweko kene, kun tye i cwercuny, acalo nyako ame onyomo a pwod tidi, ka oryemo; Obaŋani en okobo.

⁷Pi kare anok meicel rik aweki keni, ento abino dwoggo yin i kica adwoŋ meicel.

⁸Rik akano waŋa oko i baŋi, i kare anok ame onwoŋo akemona dwoŋ meicel, ento abino nyuto marra baŋi nakanaka; man kop a Rwot, ame en ŋat alakoro yin okobo,

⁹Pien man rom aroma i kare a Nua i baŋa, Kite acalo rik akwono i kare a Nua ni, pii mom dok bino medde poŋ ame balo lobo luŋ, aman doŋ akwoŋo ni mom dok abino bedo kede akemo i komi, mom daŋ abino dok juki.

¹⁰Pien kiddi twero ya, tur daŋ otwero kobo oko kan ocele ento marra a mom lokere mom bino ya i komi, cikerena me kuc mom obino kobo teŋe. Mannono kop ame Rwot ame kica mako i koma-ni okobo.

¹¹Ama, yin boma ame ineno can, ame yamo kot okodo i komi i teko, yin ame mom okweo cunyi kadi acel, nen ba, abino mwono kiddini aber meicel, abino gero acakki teri kede kiddi me wel ame obedo bululu bululu

¹²kan ocuŋ malo iguŋ bino gero kiddi arema me wel aco dogcel, i kiddi amimila bala mac, eka apamani ate deyo i gweŋe alilia apapat.

¹³Itinoni luŋ Rwot en abino pwonyogi, itinoni bino bedo aber meicel.

¹⁴Kite atira bino miyo ibedo atek, mom obino wuni kadi acel, pien mom ibino bedo kede lworo moro pire, jo a wuni mom gire bino noko ŋeti,

¹⁵Ka ce dano moro bino ero da kedi, mannono nwoŋo mom oya i baŋa; ŋattoro keken ame bino da kedi, dano-nono bino poto oko piri.

¹⁶Nen ba, an doŋ aketo atet, ame bino buko loti mac, te teto i jami lweny me ticcere; dok aketo daŋ abalo lobo, me jwero jami ducu.

¹⁷Mom tye gi-lwennyoro ame oteto pi lweny i komi, ame bino tiyo ticcere, dok daŋ ibino loyo kop luŋ ame obino kelo i komi. Man obedo gin ame omiro a Rwot bino nwoŋo loyo kopgi ya i baŋa, man kop a Rwot ikokome.