Read lango Icaya 55 Bible Online

Icaya 55 - lango bible

Icaya 55

¹Biye wunu ba i pii, wun luŋ ame oryo ocirowu; ŋat ame limmere moro mom, myero bin wil, cam, Biye iwil wunu koŋo olok kede cak, aboŋo culloro kadi welloro ame oŋolo pire.

²Piŋo kara ibalo limwu i kom gin a mom obedo ogati? Piŋo kara ityeko tekowu i kom tic ame mom romo yeŋowu? Ter yitwu baŋa, me icam wunu gin aber, lel wunu i cam ame amiowu.

³Ter wunu yitwu, ibin wunu baŋa: winy wunu koppa, me tipowu bed kwo; abino cikere kedwu i cikere a perakino odoco, abino miyowu mar mera a mom lokere ame genne, ame rik aciko pi Daudi.

⁴Nen ba, rik akete me bedo caden baŋ orok, atel kede ami-cik baŋ orok.

⁵Nen ba, ibino lwoŋo rok apapat ame mom iŋeo wunu, rok apapat ame mom ŋeowu bino riŋo baŋwu, pi Rwot Obaŋawu, ame en Ŋat Acil me Icrael, pien en doŋ oketo kwogo i komwu.

⁶Yeny wunu Rwot kun pwod twero nwoŋere, kok wunu baŋ Rwot kun en tye ceggi.

⁷Atim tim arac myero wek timerenono oko; ŋat a cunye mom atira myero wek kit tammere-nono oko; myero en dwog baŋ Rwot, me en time kica, myero en dwog baŋ Obaŋawa, pien bino gonyo ballere luŋ.

⁸“Pien tamma, mom tamwu, akadi yowu daŋ mom obedo yona”, Rwot okobo.

⁹“Kite acalo polo otiŋere malo meicel ame kato lobo kittono daŋ yona tye malo ame kato yowu oko, tamma daŋ kato tamwu oko.

¹⁰“Pien kite acalo kot kede pee corre piny kun ya i polo, mom dok twero dok kuno, ento bido lobo, mio ginapita tu, doŋo, mio koti baŋ acoc, kede cam baŋ jo ame camo.

¹¹Kop ame ya i doga daŋ bino bedo amannono; mom dok bino dwogo baŋa, cite bino tiyo gin ame amito ni ti, dok bino cobo gin ame acwae pire.

¹²“Pien ibino wot wunu oko kede lelo, kun oterowu kede kucs; kiddi ame tye i nyimwu karacel kede tur luŋ, gin luŋ bino mwoco wer agwa meicel, kun yen luŋ me tim ba po ciŋgi.

¹³Yen cipre en a bino tu akaka okuto, yen a nwecgi kur akaka ocokocok; mannono bino bedo gin me po nakanaka, ame mom twero rwenyo, me nyuto ni an Rwot en a rik atio.”