Read lango Icaya 56 Bible Online

Icaya 56 - lango bible

Icaya 56

¹Rwot okobo baŋ jo mere ni, “Myero iŋol wunu kop atira, dok itim wunu gin atira, pien aceggi larowu; larre ame alarowu kede ceggi doŋ nen kannaler.

²Ŋat ame timo man tye kede winyo nadi, karacel kede dano ame omako atek odoco, ame gwoko cabit, kun mom balo, dok gwoko daŋ ciŋe mom timo gin arac.”

³Arokkoro ame doŋ obino oko baŋ Rwot myero kur kob ni, “Rwot gire bino poka oko i akina jo mere,” dok ŋat ame ooro oko kur daŋ kob ni, “Nen ba, an doŋ a yat otal.”

⁴Pien Rwot doŋ otyeko kobo oko ni, “Jo ame oroo oko ame gwoko ceŋ cabitta, ame yero gin ame yomoro cunya, ame lido cikerena odoco,

⁵abino miyogi gin me po nyiŋgi, ame bino bedo i ot me wora kede i akina jona, ame ber kato bedo itino awobe kede anyira; abino miyogi nyiŋ me perakino atwal, ame mom twero rwenyo kadi acel.

⁶“Orok ame doŋ obino oko baŋ Rwot, me tic baŋe, kun maro nyiŋe, dok me bedo omiro mere, jo luŋ ame gwoko ceŋ cabit, kun mom obalo, ame lido cikerena odoco,

⁷jo-nono abino kelo i wi kidina acil, abino yomoro cunygi i ot me kwaya, Abino gamo mot awaŋagi kede motgi ame oyalo kede, abino gamo i wi keno me lamma; pien oda obino lwoŋo ni ot me kwac a rok luŋ.”

⁸Rwot Obaŋa ame ocoko jo Icrael ame oryemo okobo ni, “Dok abino coko jo ocele baŋa, amedo i kom jo ame doŋ atyeko coko.”

⁹Wun leyi luŋ me tim, biye imwod wunu, wun leyi luŋ me buŋ,

¹⁰Okurpiny a jo Icrael waŋgi oto oko, gin luŋ mom otye kede ŋeccoro kadi acel; gin luŋ ocalo gwogi ame lebgi oto, mom doŋ oromo gweo; oleko lek kun obuto gigi oko, omaro nino keken.

¹¹Gwogi-nono owor meicel, mom oyeŋ kadi acel. Gin okwat a mom niaŋ, ŋat acel acel i akinagi kwanyo yo mere kene, ŋat man yenyo agoba mere kene kite a cunye mito,

¹²Gin olwoŋere ni, “Biye me owot oom koŋo olok, biye okak arege me omer; diki dok onen, adwoŋ okato kare oko.”