Read lango Icaya 57 Bible Online

Icaya 57 - lango bible

Icaya 57

¹Ŋat a kite atira to, cite ŋattoro mom keto cunye iye; jo ame maro Obaŋa okwanyo oko, ŋattoro gire mom paro pirgi. Pien dano a kite atira nwoŋo okwanyo oko i can,

²en donyo gire i kuc; jo ame woto i yo me kite atira, jo-nono tye a wee i kabutogi.

³Cite wun, biye wunu ceggi baŋa kan, wun itino emuroko, ame acot onywalo kede i tim me carocaro.

⁴Ŋa ce ame wun inywaro wunu-nono? Iŋamo dogwu alac alaca-nono pi ŋa? Wun mom ibedo wunu itino otim bal, itino ame onywalo pi kop me goba.

⁵Wun ame mitwu mom kwe i te kworo, i te yen luŋ ame obuŋere, ame ineko itinowu i luŋ, i te gweŋe ame obabara?

⁶Gin ame opokki i akina gweŋe apwot i luŋ piny, gin, ginnaca luŋ megi; yin ionynyigi motti me amata, ikelo-gu motti me moko kwon. Cunya bino bedo yom pi kodi timmono?

⁷Iketo doŋ kabuto ni i wi kidi abor, otiŋere malo, yin doŋ iwoto kuno me wot yalo jok i motti,

⁸Iketo daŋ cal jok i ŋe kika kede i ŋe yat doggola; pi weka oko, omio iyabo kabutoni. Idonyo iye, ite yaro bedo alac; icikere kedgi piri keni, imaro doŋ kabutogi, ineno gin me lewic,

⁹Iwoto baŋ jok Molek kede moo, imedo mooni a ŋwece kur; ioro okwenani kannabor, icwalogi piny naka i Ceol.

¹⁰Wot abor ooli meicel, cite mom ikobo ni, “Konnyere mom;” inwoŋo kwo anyen ame medo tekoni, omio mom iŋoye iyo,

¹¹Ŋa ame onwoŋo ilworo atek, ame myelo komi, ame omio ikobo kop goba, wii te doŋ wil oko i koma, ame mom doŋ itwero po pira? Mom atemo diyo cunya pi kare alac, ame omio mom ite bedo kede lworo moro i koma?

¹²Kodi kiteni ame ikobo ni atiranono, kede timmi luŋ abino yabo oko kannaler.

¹³Ka ce iwoto dwoni i koko pi kony, gin cal jogini-nono myero konyi. Yamo bino kologi oko, ewura dog bino cwayogi teŋe. Ento ŋat ame riŋo laro baŋa bino bedo i lobo, dano-nono bino bedo i kidina acil.

¹⁴Obino kobo ni, “Tor wunu, tor wunu, yik wunu yo, put wunu iciki luŋ i dye yo a jona.”

¹⁵Obaŋa ame malo, ame cil, ame bedo nakanaka i kabedo ame otiŋere malo, ame ri nakanaka okobo ni, “An abedo i kabedo ame otiŋere malo ame cil, dok abedo daŋ i ŋat amwol, a cunye cwer, dok ŋut, pi roco cuny jo ame mwol, jo ame cunygi cwer dok ŋut.

¹⁶Pien mom abino bedo pyem nakanaka, mom abino kudo akemo kare luŋ, pien cuny dano oya i baŋa, an en amio weo me kwo.

¹⁷Bal a jona me paro lim omio akemo omaka; omio agoogi, apono oko, kun akemo maka, cite gin omedde ameda i jem kun otimo gin a cunygi mito.

¹⁸Atyeko doŋ neno kitegi, ento abino caŋogi; abino telogi, abino culogi i gin a kweo cunygi, abino kweyo cuny jo ame kumo pirgi.

¹⁹Abino miyo kuc baŋ jo a tye kannabor kede kan aceggi, dok daŋ abino caŋo jona.

²⁰Ento jo areco calo nam ame tagere, ame mom koŋ twero pye mot, kun pii mere bedo kelo yugi kede coto.

²¹Kuc gire mom pi obalo”, man kop ame Obaŋawa okobo.