Read lango Icaya 59 Bible Online

Icaya 59 - lango bible

Icaya 59

¹Nen ba, bad Rwot mom odoko acek oko, ame mom doŋ romo laro jo, yite daŋ mom gire odiŋ, ame mom romo winyo kop;

²ento timwu arac opokowu oko kede Obaŋa, balwu omio waŋe doŋ owumere oko i komwu, mom romo neno.

³Pien remo doŋ obalo ciŋwu oko, anyira ciŋwu Opoŋ ka i tim areco keken, dogwu kobo kop me goba, lebwu muno kop me timo tim areco.

⁴Mom tye ŋattoro ame doto wadgi i kop ateni, mom tye ŋattoro ame pido pido ame tye kakare; jo luŋ jeŋere i kop a tere mom, kun okobo kop goba, oparo ka pi timo gin arac, ame kelo can.

⁵Jo luŋ beko ka tim arac calo toŋ codocodo, ocikoboogi calo me otyetyem; ŋat ame ocamo tongi-nono to oko, aco ka onyono anyona, ororo ya iye.

⁶Ento timgi-nono mom bino konyogi kadi acel, mom bino konyogi me aruka, akadi me wumere, Gin otio ka tic me timo bal, tim me byemi tye gire i ciŋgi.

⁷Tyengi dwir ata me wot timo gin arac, oyute ayuta me wot onyo remo ajo a mom i bal; otamo ka tam me wot timo gin arac, yak kede balle a lobo tye i gudogi luŋ.

⁸Okwia-gu yo me kuc, ŋolo kop atira mom tye i gudogi luŋ; ogogomo yogi luŋ, mom tye ŋattoro a beo iye ame bedo i kuc.

⁹Mannono omio ŋolo kop atira bor abora kedwa, larre mom ru otuno baŋwa. Koŋ inen doŋ ba, akaka ceŋ, wan onwoŋo colpiny, akaka lero, wan owoto i piny acol icuc.

¹⁰Oboboŋo doŋ kor apama calo otowaŋ, oboboŋo calo jo ame waŋgi mom ogatte kom a piny pwod ler calo dyewor, i akina jo a komgi tek, wan ocalo jo oto.

¹¹Nen doŋ oŋuŋura-gu calo leyi, obedo kok akoka calo amam, okuro ŋolo kop atira cite mom onwoŋo; okuro larre, cite bor abora kedwa,

¹²Pien balwa doŋ odurre adura nyimi, rocwa en a doŋ obedo caden komwa; wan gire doŋ otyeko balo, wan oŋeo tim areco ame obedo timo.

¹³Wan okalo wi cik, okwero-gu Rwot oko, oweko daŋ lubo Obaŋawa oko, kun okobo ka kop me wuno jo kede jem, ogamo kop goba i cunywa, ote kobo.

¹⁴Aco ŋolo kop atira mom oye rwako ume, kite atira doŋ mom noko ŋetwa, ateni doŋ tye arimo piny i dye boma ata, ginnoro ame tye kakare mom doŋ nwoŋo yo me donyo.

¹⁵Ateni mom doŋ tye atwal, ŋat ame kwero timo tim arac, miye kene i peko. Rwot oneno timmoro atira mom doŋ tye, pien ŋolo kop atira mom doŋ tye.

¹⁶En oneno ni ŋattoro mom doŋ tye; owuro pien oneno ni ŋattoro mom doŋ tye ame twero laro pirgi. En ikome doŋ bino larogi i tekkere kene, kite atira bino miyo en cato atek.

¹⁷En bino ruko kite atir calo nyonyo me geŋo kore, kede tok nyonyo me larre i wie, cuny me culo kwor bino bedo acaloboŋo aruka mere, akemo te boyo kome oko calo jor.

¹⁸En bino culogi kite ame timgi tye kede, akemo baŋ omone mere, cul arac baŋ okworrere; cul arac baŋ lobo ame tye i dog nam.

¹⁹Mannono bino miyo olworo nyiŋ Rwot cakere i tuŋ to, kede kwogo mere cakere i tuŋ kide; pien bino ru bino oyot calo pii amol ager, ame yamo a Rwot en akolo.

²⁰Rwot okobo baŋ jo mere ni, “An abino i Cion acalo ŋat ame lakorowu, wun jo a Yakobo ame oweko timo gin arac.

²¹“Aco i tuŋ baŋa, man en obedo cikere ame acikere kedwu. Tekowu ame doŋ atyeko miyowu, kede koppa ame doŋ atyeko keto i dogwu, mom doŋ bino ya i dogwu, akadi i dog itinowu, onyo i dog ikwaewu, cakere tin naka waŋ i waŋ.”