Read lango Icaya 60 Bible Online

Icaya 60 - lango bible

Icaya 60

¹Ya malo ba, yin Jerucalem, pien cenni doŋ obino oko, kwogo a Rwot doŋ opelo, ocaro komi oko.

²Nen ba, colpiny bino wumo lobo oko, mutu acol icuc bino wumo rok ocele oko, ento Rwot bino pelo te caro komi, obino neno kwogo mere i kome.

³Orok bino bino i leroni, obakki bino bino i lero ceŋ ame opelio i komi.

⁴Tiŋ waŋi malo, me iŋoloro koŋ piny, jo luŋ bino cokere karacel, te bino baŋi; awobeni bino ya i kannabor, anyirani obino tiŋo otino i kor.

⁵Ibino neno, komi te ryeny aryenya, cunyi bino myel ite lelo; pien lim abup meicel me nam obino jwaŋo i ciŋi, lonyo a rok apol obino kelo baŋi,

⁶Inaga ecipan bino wumi oko, itino inaga me Midian kede me Epa; anaka jo me Ceba luŋ bino bino baŋi, Gin bino kelo jabu kede luban, obino rabo pi jami abeco ame Rwot otimo.

⁷Rommi luŋ me Kedar obino coko baŋi, nyogi rommi me Nebayot bino konyi; obino kelogi i wi keno lam me yala, ate gamogi, dok abino medo kwogo i kom oda me kwogo,

⁸Man kara jo mene ame twarre calo pol-li, onyo calo amam ame dok i dog udigi?

⁹Pien lobo ame tye i dog nam bino kura, mele ame oya i Tarcic en ame bino telo yo, Mele-nogo bino kelo itinoni i kannabor karacel kede lonyo adwoŋ meicel, pi nyiŋ Rwot Obaŋani, ame en Ŋat Acil me Icrael, pien en doŋ oketo kwogo komi.

¹⁰Orok bino gero apama me celli, obakkigi bino konyi i tic; pien i kare ame rik akemo omaka, agoi, cite pi ber a yie atyeko doŋ timi kica,

¹¹Dogcelli bino bedo twolo kare luŋ, mom obino cego dyeceŋ kede dyewor; me jo kel lonyo a rok luŋ baŋi, kun odorre dorre me kwogo karacel obakkigi.

¹²Pien rok kede loc ame mom bino ye locci bino to; kodi rokkono luŋ bino balo lobogi odoco,

¹³Kwogo me Lebanon bino bino baŋi, cipre kede yen abeco ocek, me miyo kabedona acil nen amwonya; dok daŋ abino miyo kabedo a tyena poŋi kwogo.

¹⁴Itino a jo a yam owuni bino bino baŋ i aguŋo; kede jo luŋ ame yam obedo cayi obino ryebere piny i te tyeni; gin bino lwoŋi ni yin ibedo boma a Rwot, Cion ame obedo me a Ŋat Acil me Icrael.

¹⁵Aco kono yam koŋ oweki ata, okweri oko, kun ŋattoro mom beo baŋi; abino miyi ibedo dit nakanaka, jo me kare luŋ bino lelo piri.

¹⁶Ibino bedo doto cak a rok luŋ, ibino doto anaka tuno obakki. Ibino ŋeyo ni an a Rwot, an en a lari, dok an en a lakoro yin, an a Won Twero ame abedo Obaŋa a Yakobo.

¹⁷Akaka mola, an abino kelo jabu, akaka nyonyo, abino kelo ryal, akaka bao, abino kela mola, akaka gweŋ, abino kelo nyonyo, Abino miyo kuc en ame loi, akaka odoŋe a loo tic, kite atira en ame bino bedo nyamparani.

¹⁸Tim me byemi mom dok bino winyere i loboni, kadi yak onyo balle a lobo i wan loboni. Ibino cako nyiŋ apama celli ni, Larre, aco dogcelli ibino lwoŋo ni, Pak.

¹⁹Mom ceŋ en a dok bino menyi dyeceŋ, akadi lero a dwe dyewor; Rwot gire en a doŋ bino menyi nakanaka, Obaŋani en ame bino miyo ibedo kede kwogo.

²⁰Ceŋŋi mom dok bino poto, dwe daŋ mom bino rwenyo; pien Rwot en ame bino menyi nakanaka, kare me kumoni doŋ bino gik oko.

²¹Joni luŋ bino bedo jo a kitegi atira, lobo doŋ bino dokomegi atwal; jaŋ yat ame an apito, tic ame an ikoma atio, me wek jo mia kwogo,

²²Doggola a jo mere ame nok atek bino doko atekere twal, ŋat ame jo mere tidi meicel bino doko twon rokkoro atek, An abedo Rwot; abino miyo timere oyot ka kare mere oromo.