Read lango Icaya 62 Bible Online

Icaya 62 - lango bible

Icaya 62

¹Mom gira abino liŋ pi Cion, mom daŋ abino weo pire en Jerucalem, tuno ka loccere doŋ ocaro piny calo lero a ceŋ, dok larrere daŋ doŋ omenyo piny calo mac.

²Rok luŋ bino neno locci, yin Jerucalem obakki luŋ bino neno kwogoni; obino lwoŋi kede nyiŋ anyen ame Rwot i kome bino tuco.

³Yin ibino bedo calo tok kwogo ame tye i ciŋ Rwot, ame nyuto dittere dok ibino bedo acalo tok kwogo ame nyuto loc Obaŋani.

⁴Mom doŋ obino medde lwoŋi ni, “Boma a doŋ oweko,” loboni daŋ mom obino lwoŋo ni, “Dako ame oweko”, ento obino lwoŋi ni, “Dako ame cunya yom i kome”; kun loboni olwoŋo ni dako ame onyomo; pien Rwot cunye yom i komi dok en bino bedo calo cwar loboni,

⁵Pien kite acalo awobi nyomo nyako, awobeni daŋ bino nyomi kittono, dok kit acalo anyom lelo pi atera, amannono daŋ Obaŋani bino lelo piri.

⁶Yin Jerucalem ba, oketo okurpiny i wi celli malo; gin mom bino liŋ kadi acel dyeceŋ kede dyewor. Wun jo ame poyo Rwot, mom iwe wunu,

⁷dok daŋ mom imie wunu kare me weo, tuno ka en omio Jerucalem odoko tek, omio odoko gin ame opako i wi lobo.

⁸Rwot doŋ otyeko kwoŋo kwoŋ atek meicel, kun kwoŋo i bade me twer, ni, “Mom dok abino miyo kaili bedo me acama okworri, orok mom dok bino mato koŋo olok ame ilolle kede;

⁹ento jo ame okao bino camo te pako Rwot, jo ame opwono olok bino mato koŋo mere i dyekalla acil.”

¹⁰Be wunu, be wunu i dogcel, yik wunu yo pi lwak, Tor wunu, tor wunu gudo oko, kwakwanyo wunu gweŋe oko iye, tiŋ wunu bendera malo pi rok luŋ,

¹¹Koŋ inen wunu, Rwot doŋ orabo kop naka i agikki lobo ni, “Kobbi wunu boma me Cion ni, Nen ba, larreni doŋ tye abino; mottere tye gire baŋe, jo ame olwenyo pire tye is nyime.”

¹²Obino lwoŋo ni, Rok acil, Jo ame Rwot olakoro; dok daŋ obino lwoŋi ni, Boma ame Rwot omaro, ame mom oweko ata.