Read lango Icaya 63 Bible Online

Icaya 63 - lango bible

Icaya 63

¹Man kara ŋa ame ya i Edommie, kede i Bojra ame oruko boŋŋi arema, ame oruko ruk me kwogo, kun yon i wot i twon tekomere adwoŋ cae? “An ennono, arabbo pi loyo kop, an atek, ame atwero laro jo.”

²Piŋo kara rukki rema, kun boŋŋoni calo me a ŋat a nyono olok?

³“An anyono olok an kena, kun ŋattoro ame oya rok ocele mom tye baŋa; ajejebogi akemo meicel; remogi okikira i boŋona meicel, omio rukka luŋ ocido oko,

⁴Pien nino me culo kwor onwoŋo tye i cunya, mwaka me lakoro jona doŋ oromo oko.

⁵Aŋoloro piny, ate nwoŋo ni mom tye ŋattoro ame twero konya, awuro meicel, cite mom tye ŋattoro ame twero miya teko; mannono omio ciŋa an ikoma en omio aloo loc, akemona en omio anwoŋo teko,

⁶Akemo rik omio ajejebo rok piny, iniga omio amiogi okakomeicel, aonyo remogi piny i lobo.”

⁷Abino dok kwano mar a Rwot a mom lokere, abino doŋ rabo pi jami abeco ame Rwot otimo, kun lubere i ginnoro luŋ ame Rwot otimo pirwa, kede twon ber adwoŋ meicel ame en onyuto baŋ jo Icrael, ame en otimo pirgi kun lubo kica mere, kite ame twon marrere a mom lokere tye kede.

⁸Pien en okobo ni, “Ateni, gin gire obedo jona”, itino ame mom bino bwola; en te doko Alargi.

⁹I cangi luŋ, en daŋ oneno iye can; en ikome olarogi pe okwena moro kadi omalaika. En olakorogi i marrere kede i kica mere, en otiŋogi, te bedo byelogi nino i nino i kare acon,

¹⁰Ento gin ojem, omio akemo omako Cuny Acil; mannono omio Rwot odoko akworgi, olokere te lweny kedgi.

¹¹Gin dok te po pi kare acon, i kare a Muca, amiro a Rwot, ote penyo ni, “Ŋat ame rik okwanyo okwat rommi mere i nam tye kara kwene? Ŋat a rik oketo Cuny Acil i akinagi tye kara kwene?

¹²Ŋat a rik omio ciŋe me kwogo, owoto i ŋet Muca tuŋ cem, ame omio pii opokere i dul aryo i nyimgi me miye nwoŋo nyiŋ ame perakino nakanaka, ame otelogi obeo i dye nam atut?”

¹³Mom ogatte kadi acel, calo aguragura ame woto dye tim,

¹⁴Cunya Rwot omiogi weo, calo dok ame otuno i luŋ. Rik itelo joni kittono, me inwoŋ kede nyiŋ me kwogo. Kwac pi kica kede kony

¹⁵Kul waŋi inen piny i wi polo, ame en kabedoni acil me kwogo. Arimani kede twer tye kara kwene? Mar meri kede kicani tye kwene ba? Tim ber kur ikwerwa ba.

¹⁶Pien yin gire ibedo Papawa, kadi bed Iburaim mom ŋeowa, dok Icrael daŋ mom ŋeo ni wan obedo ikwae; yin Rwot gire ibedo papawa, yin ibedo ŋat ame lakorowa cakere yam con.

¹⁷Piŋo kara imiowa ogak oko i yoni, Ama Rwot? Piŋo kara imiowa odoko jo ame nwaŋ kun mom olwori? Dwog baŋwa pi jo ame tio piri, pi itekere luŋ ame obedo megi yin i komi.

¹⁸Kabedoni acil obedo baŋ joni kare anok meicel, okworwa doŋ otyeko jejebo oko i tyengi,

¹⁹Wan dok odoko calo jo ame yam mom iloo, ocalo doŋ jo ame mom olwoŋo kede nyiŋi.