Read lango Icaya 64 Bible Online

Icaya 64 - lango bible

Icaya 64

¹Kono iyeco polo oko ite yitto piny! Kono omio kiddi oyeŋere i nyimi.

²Kite acalo mac moko i yen, dok mio daŋ pii walo, me nyiŋi ŋeye baŋ okworri, dok rok luŋ daŋ komgi myel i nyimi!

³Kare ame rik itimo gigi mogo iyiliyili ame wan mom oromo tamo pire, rik yin ibino piny, kiddi te yeŋere i nyimi.

⁴Cakere gire con meicel ŋattoro gire mom ogiporo, ŋattoro mom owinyo kede yite, ŋattoro daŋ mom oneno Obaŋa moro apat kono yin keni, Obaŋa ame tio tic luŋ pi jo ame kure.

⁵Yin irwatte i ŋat ame tio tic atira i yomcuny, jo ame po piri i yoni luŋ, Nen ba, yin rik akemo omaki i komwa, cite wan omedde ameda i timo bal, obedo timo bal pi kare alac meicel, doŋ wan obino larre ateni?

⁶Wan doŋ odoko jo ame cik ogeŋo, ginnoro luŋ ame wan otimo ame wan oneno ni atira rom gire aroma i boŋo ame ocido oko i gigi mogo me kwer. Wan luŋ doŋ oner oko calo pot yat, timwa areco doŋ kolowa calo yamo,

⁷Ŋattoro ame lwoŋo nyiŋi mom tye kadi acel, ame cukere kene me maki; pien doŋ ikanne giri oko i baŋwa, imiowa doŋ i ciŋ timwa areco me loyowa,

⁸Kadi amannono, yin i Rwot gire ibedo Papawa; wan obedo lobo, yin en icweowa; wan luŋ obedo gin ame yin itio.

⁹Kur imi akemo maki atek ate ka, Ama Rwot, kur daŋ ibed poyo balwa nakanaka, Koŋ inen, ipar, wan luŋ obedo joni,

¹⁰Bomani acil luŋ doŋ odoko tim, Cion doŋ odoko tim oko, Jerucalem doŋ odoŋ kene ata.

¹¹Odwa acil, aber meicel, kan ame rik kwariwa paki iye, obin owaŋo oko i mac; kabedo luŋ ame rik yomoro cunywa doŋ odoko wi obur.

¹²Ibino diyo cunyi i kom jami magi luŋ, Ama Rwot? Ibino liŋ aliŋa, kun iwunowa atek ateka?