Read lango Icaya 65 Bible Online

Icaya 65 - lango bible

Icaya 65

¹Rik ayikere me gamo kop a jo ame kwaa, cite naka mom okwaa gigi. Ayikere-gu ni gin myero nwoŋa, cite naka mom otemo yenya. Akobbigi ni, “An ene, an en kan,” akobo baŋ rok ame onwoŋo mom doŋ lwoŋo nyiŋa.

²Abedo ryeyo ciŋa dyeceŋ benebene baŋ jo ame jem ajema, jo ame woto i yo a mom ber kadi acel, kun olubo gigi ryekogi kengi.

³Gin bedo miyo akemo maka kare i kare, kun obedo miyo motgi me yalo jogi i potti, owaŋo-gu odok akur i kom matafali;

⁴obedo bedo-gu i lyel, eka dyewor ote bedo kabedo mogo me imun; obedo camo-gu riŋo puno, jami me tedogi luŋ tye iye pig riŋo leyi ame okwero.

⁵Gin jo ame kobo ni, “Bed teŋe kuno, kur ibin baŋa, pien an opoka oko pi obaŋana.” Jo man kom calo yito i wuma, ocalo mac ame mom to kadi acel.

⁶Nen ba, otyeko doŋ coyo i nyima ni, “An gire mom abino liŋ aliŋa, ento abino culo. Ateteni abino culogi gire, timgi areco karacel kede me a kwarigi, Rwot okobo;

⁷pien gin obedo waŋo odok akur i wi kiddi, obedo yetta-gu i wi tur luŋ; abino poro culgi oromogi, abino culogi pi balgi acon.”

⁸Rwot okobo ni, “Kite acalo koŋo olok nwoŋere kede i nyig olok, dok jo okobo ni, ‘Kur ibal oko, pien gum tye iye’, abino timo daŋ amannono pi omirona, mom abino tyekogi luŋ,

⁹Abino miyo ikwae ya kom Yakobo, kede jo ame bino leyo wi kiddina luŋ ya i Juda; jona ame ayero bino leyo me bedo megi, omirona bino bedo kuno,

¹⁰Caron bino doko ka kwayo rommi, luŋ me Akor bino bedo me buto a dok, bino bedo me a jona ame obedo yenya.

¹¹Ento wun ame doŋ ityeko weko wunu Rwot, ame wiwu doŋ owil oko i kom kiddina acil, ame yikomeja a jok me winyo, ame piko koŋo orubo poŋ ikopo pi jo amio gum,

¹²wun ibino to wunu i pala lweny, wun luŋ ibino guŋu wunu aguŋa ka aŋolo ŋutwu, pien i kare ame alwoŋowu, ikwero gamo wunu oko, i kare ame an abedo kop, mom iciko wunu yitwu iye, ento ibedo timo wunu gin anen arac inyima, iyero wunu gin ame mom yomoro cunya.”

¹³Mannono omio Rwot Obaŋa okobo ni, “Nen ba, omirona bino cem, cite wun kec bino nekowu; omirona bino mato pii, ento wun oryo pii bino cirowu; omirona bino lelo, cite wun obino miyo lewic makowu;

¹⁴yomcuny bino miyo omirona wero, ento wun wancuny bino miyo ikok wunu, cwercuny bino miyo iredo wunu i koko,

¹⁵Nyinwu bino doŋ baŋ jona ame ayero calo gi-ceno jo, Rwot Obaŋa gire en abino nekowu; ento omiro mere, en bino lwoŋogi i nyiŋ apat.

¹⁶Pi mannono, ka ce ŋattoro lamo gum i kome kene i lobo, bino lamo gum i kome kene i nyiŋ Obaŋa me ateni, dok ŋat ame bino kwoŋo kwoŋ i lobo man, bino kwoŋ i nyiŋ Obaŋa me ateni; pien wiwu doŋ bino wil oko i kom can ame ineno wunu con, bino doŋ rwenyo oko i wiwu.”

¹⁷Rwot dok te kobo ni, “Pien, nen ba, aketo polo anyen kede lobo anyen; mom dok obino po pi jami acon, mom daŋ bino riŋo i wi ŋattoro.

¹⁸Cite myero cunywu bed ayom kun ilelo wunu nakanaka, i kom jami ame aketo-nono; pien, nen ba, Jerucalem ame aketo bino bedo me yomcuny, jo mere daŋ bino bedo kede lelo.

¹⁹Abino lelo i Jerucalem, cunya bino bedo yom i kom jona; dwonnoro me koko mom dok bino winyere iye, akadi koko moro me can,

²⁰Atinnoro ame onywalo te ri kare anonok mom bino bedo tye iye, akadi adwoŋŋoro ame mom bino cobo kare mere kakare; atin bino to ame mwaka mere doŋ oromo mia acel, abalo ame mwaka mere bino romo mia acel, nwoŋo oceno acena.

²¹Jo bino gero udigi ote daŋ bedo iye, obino puro poto olokgi ote daŋ camo nyige.

²²Mom obino gero udigi eka ŋat acele en ate bedo iye, mom obino puro poto olokgi eka ŋat ocele en a te camo. Jona bino perakino ame romo aroma i yat, jona ame ayero bino bilo tic me ciŋgi kare alac,

²³Ŋattoro i akinagi mom bino yelle i tic nono, akadi nywalo atin pi neno can; pien gin bino bedo itino a jo ame Rwot doŋ otyeko miyo gum, kun gumgi-nono kwako naka itinogi.

²⁴Ame mom ru gin olwoŋo, an abino gamo doggi, kun mom ru okobo kopporo, an abino winyo kopgi.

²⁵Epet kede atin romo bino cem karacel, eŋatu obino pito paco calo twon; twol bino camo apua. I wi kidina acil luŋ, awano onyo anek mom bino bedo tye iye.”