Read lango Icaya 66 Bible Online

Icaya 66 - lango bible

Icaya 66

¹ Rwot okobo ni, “Polo obedo kom me locca, lobo te bedo kom me to na tyena. Kara kit ot aŋo ame itwero gero wunu pira? Kara ka weona twero bedo kwene?

²Jami magi luŋ ciŋa en otio, mannono omio jami magi luŋ obedo mega, Man en kit dano ame abino ciko waŋa i kome, ŋat ame mwol, ame ŋut i cunye, dok ame kome myel i kop ame an akobo.

³“Ŋat ame neko twon, rom aroma i ŋat ame neko dano; ŋat ame mio romo acalo mot aŋola, rom aroma i ŋat ame turo ŋut gwok; ŋat ame yalo Obaŋa i mot me moko kwon, rom a aroma i ŋat ame mio remo a puno; ŋat ame waŋo luban acalo mot me po, rom aroma i ŋat ame woro cal jok. Jo magi doŋ oyero yogi kengi, olelo gigi alela i timgi me ipyeda.

⁴An daŋ abino yero can aber pirgi, abino yero en ame miogi lworo; pien i kare ame rik alwoŋogi, ŋattoro mom ogamo doga, i kare ame akobo kedgi, ŋattoro mom owinyo koppa; cite gin otimo gin anen arac i nyima, oyero gin ame mom yomoro cunya.”

⁵Winy wunu kop a Rwot, wun jo ame komwu myel koppere, “Omegowu ame dagowu, ame oryemowu oko teŋe pi nyiŋa, doŋ okobo ni, ‘Koŋ iwek doŋ mi kwogo baŋ Rwot’; me koŋ onen yomcunywu; ento gin en ame obino miyo lewic makogi.

⁶Koŋ iwiny wunu wo ame tye i boma, dwonnoro ame ya i ot Obaŋa! Dwon Rwot ennono, ame tye ka culo okworrere.

⁷“Ame mom ru owinyo rem me nywal, en te nywal gire oko; kun rem me nywal mom ru ogoe, en onywalo atin awobi.

⁸Ŋa ame yam koŋ owinyo kodi ginnono? Ŋa ame yam koŋ oneno kodi ginnono? Obino nywalo lobo i nino acel keken? Otwero nywalo rok luŋ i dakika moro keken? Pien i kare ame rem pwod ogoo Cion agoa, en te nywalo itino mere oko.

⁹Itamo ni abino tero jona i kare me nywal eka mom ate miyo nywalogi? An ame amio jo nywal abino cego ot nyodo oko? Rwot okobo.

¹⁰“Lel wunu karacel kede Jerucalem, cunywu bed ayom pire, wun jo luŋ ame imare wunu; lel wunu karacel kede yomcuny, wun jo luŋ ame kumo pire;

¹¹me idot wunu tuno mere kwe cunywu, calo atin ame doto tuno a tottere, me imwonyomwonyo wunu cakkere i yomcuny, pien cak dwoŋ meicel i kore.”

¹²Pien Rwot okobo ni, “Nen ba, abino nyayo kuc baŋe calo kulo, kede lonyo orok calo kulo ame opoŋ meicel; ibino dote wunu, en te tiŋowu i laŋete, dok ibino tuko wunu i tyene.

¹³Abino kweyo cunywu, calo atin ame tottere kweo cunye; cunywu bino kwe i Jerucalem

¹⁴Ibino neno wunu, cunywu te bedo yom; komwu bino bedo ayot calo lum a pwod alot alota; mannono bino miyo iŋeo wunu ni, Rwot konyo jo ame tio pire ento akemo mere tye i kom okworrere.

¹⁵“Pien ba, Rwot bino bino i mac, kun gadigadi mere luŋ dwir calo yamo ajuru; me coro akemo mere i komgi i twon iniga adwoŋ meicel, dok kun jukogi i leb mac.

¹⁶Pien Rwot bino ŋolli jo kop me mac, en bino tyeko kop a jo luŋ i pala lweny; jo ame Rwot bino neko bino bedo apol.”

¹⁷Rwot okobo ni, “Jo ame olonyere kengi me wot i potti, kun lubo dano acel ame tye i dyere, ame camo riŋo puno kede gigi mogo me kwer kede oyoo, gin luŋ obino tum karacel awaŋe acel.”

¹⁸“Pien an aŋeo ticgi kede tamgi, an abino bino me coko rok luŋ ame kobo leb apapat karacel; gin bino bino te bino neno kwogona,

¹⁹an abino keto anyut i akinagi. Iyi akinagi kannono, abino cwayo jo ame obwot baŋ orok, baŋ Tarcic, Put kede Lud, ame gin jo ame wao akud atero, baŋ Tubal kede Javan, baŋ lobo ame tye i dog nam kannabor, ame mom ru owinyo kite a nyiŋa orwo kede, akadi neno kwogona; gin bino rabo pi kwogona i akina orok.

²⁰Gin bino kelo omegowu i akina rok luŋ acalo mot me yalo Rwot, kun okelogi aguragura, gadigadi, alago, kanne kede inaga, naka i kidina acil ame tye i Jerucalem, kite ame jo Icrael kela kede motgi me moko kwon i tabo acil, i ot a Rwot.

²¹Dok jo ocele i akinagi abino kwanyo me bedo olamdog kede jo Levi.”

²²“Pien kite acalo polo anyen kede lobo anyen ame abino tiyo, bino ri i nyima, Ikwaewu kede nyiŋwu daŋ bino ri kittono.

²³Por dwe, i por dwe, cabit, i cabit, jo luŋ bino i nyima me wora.

²⁴“Gin te wot me wot neno kom jo oto ame yam onwoŋo ojem i koma; pien kudi i kuno mom to, mac iye mom daŋ to, gin doŋ bino bedo gin ame yi jo luŋ okwero.” Man kop a Rwot okobo.