Read lango Icaya 9 Bible Online

Icaya 9 - lango bible

Icaya 9

¹Jo rik onwoŋo cao lobo Jabulon kede lobo Naputali, cite en bino miyo tuŋ nam, loka Jordan, Galilaya Orok doko me kwogo.

²Rok a yam bedo i piny acol doŋ oneno lero adwoŋ; jo a yam bedo i lobo acol icuc ceŋ doŋ oryeny, omenyogi.

³Yin doŋ imio rokwu onya, imedo daŋ doŋ yomcunygi; gin olelo i nyimgi, kite ame jo bedo i yomcuny kare me kac, kite ame jo lelo kede ka opoko gin oyako.

⁴Pien kolgi apek, kede lut me pwodo wi gwokgi, kede biro a yam oburogi kede tetek i tic, yin doŋ iturogi oko, acalo i nino a jo Midian.

⁵Pien amuk luŋ ame cirikale me jebo wot i dye lweny, kede boŋŋi luŋ ame ojejebo i remo, obino waŋogi oko i mac akaka yen.

⁶Pien doŋ onywalliwa atin, omiowa atin awobi; obino keto twer me loc i ciŋe, aco nyiŋe obino cako kit man ni, “Ami-tam me awura, Obaŋa Won Twer, Papo ame perakino nakanaka, Aloc ame kelo kuc.”

⁷Aco medde me loccere kede kuc iye, ka gikkere bino bedo pe, wi kom loc a Daudi kede wi mege, me miyo moko kede me jiŋo bedo atek, i ŋolo kop atira kede i kite atira, cakere tin naka waŋ i waŋ. Mitkom a Rwot me mony bino miyo man cobere.

⁸Rwot ocwalo kop i kom Yakobo, koppono bino poto i kom Icrael;

⁹jo luŋ bino ŋeyo, Epraim kede jo ame bedo i Camaria, ame gin owakere dok gin ocae i cunygi kun okobo ni,

¹⁰“Matafali doŋ orereta oko piny, ento obino gero gire oko i gweŋ apaa; olam doŋ otoŋo oko, ento wan obino leyo kakargi oko i yen cedar.”

¹¹Mannono omio Rwot tye amiyo okwor abino i komgi, tye daŋ atutugo omonegi.

¹²Jo Curia i tuŋ kide kede jo Piriciti i tuŋ to omwomwonyo jo Icrael kun doggi oŋamere aŋama. Magi luŋ mom gire okweo akemo mere, ciŋge pwod tye ame oryeye aryea.

¹³Cite jo mom gire odwogo baŋ ŋat oketo can i komgi, akadi cwalo kwacgi baŋ Rwot me mony.

¹⁴Mannono omio Rwot oŋolo wi Icrael oko kede yibe, jaŋ otit kede ogada i nino acel.

¹⁵Odoŋe karacel kede jo ame oworo gin obedo wi Icrael; eka odwarpiny ame pwonyo kop me goba te bedo yin Icrael;

¹⁶pien otelo a rok man omiogi ogak oko, jo ame gin telo wigi tamgi oballe oko.

¹⁷Mannono omio Rwot mom lelo i kom awobegi, kica daŋ mom mako i kom otino kic kede mom a coggi oto; pien ŋat acel acel i akinagi mon woro Obaŋa, dok gin luŋ obedo jo ame timo tim areco, kop aya i doggi luŋ obedo me mino keken. Magi luŋ mom gire okweo akemo a Rwot, ciŋe pwod tye ame oryeye aryea.

¹⁸Pien tim areco waŋ calo mac, waŋ calo okuto kede ocokocok; gamoro agaba i buŋ, kun gin luŋ ominne i yito ame owikino malo.

¹⁹Pi akemo a Rwot me mony, omio lobo tye ka waŋ i imac, jo iye doŋ odoko gin me awaŋa mac; mom tye ŋattoro iye ame weko ominnere doŋ.

²⁰Omaoi tuŋ cem cite kec nwoŋo pwod anekogi, ocamo tuŋ cam cite nwoŋo mom ru oromogi; ŋat acel acel camo riŋo kom wadgi,

²¹Manace camo Epraim, Epraim camo Manace, gin aryo luŋ ocobo mony i kom Juda. Magi luŋ mom gire okweo akemo mere, ciŋge pwod tye ame oryeye aryea.