Read lango Olevi 10 Bible Online

Olevi 10 - lango bible

Olevi 10

¹Nadab kede Abiku, awobe Aron ŋat acel acel okwanyo tabo mere me waŋo odok akur, te keto iye mac, te daŋ keto iye odok akur, eka ote waŋo i mac i nyim Rwot kun owaŋo i mac a rik mom ocikogi me tic kede.

²Mac te ya i nyim Rwot, te waŋogi oko, gin te to oko i nyim Rwot.

³Muca te kobbi Aron ni, “Man en gin ame Rwot okobo, ni, ‘Abino nyutte kena i akina jo ame ceggi keda ni acil, dok daŋ abino mito ni gin ket kwogo i koma i nyim lwak ducu.’ ” Aron te liŋ gire mol.

⁴Muca te lwoŋo Micael kede Elijapan, awobe a Ujiel ame obedo omin papa Aron, te kobo baŋgi ni, “Nyiggo wunu ceggi, tin omegowu oko i nyim kabedo acil, tergi wunu oko i ŋe gony.”

⁵Gin te nyiggo, ote tiŋogi kede kanyigi, terogi oko i ŋe gony, kite ame Muca okobo.

⁶Muca te kobbi Aron kede awobe mere Eleajar kede Itamar ni, “Kur igony yer wiwu iwek wunu ony iyak, kur daŋ iyec wunu rukwu, me kur ito wunu, dok me akemo a Rwot kur kat i kom lwak luŋ. Ento omegowu ame gin luŋ me ot Icrael twero kok pi mac ame Rwot owaŋogi kede.

⁷Kur ikat wunu oko i doggola kema me rwatte, me kur ito wunu; pien moo wir a Rwot tye i komwu.” Gin daŋ te tiyo kite ame Muca okobo.

⁸Rwot te kobbi Aron ni,

⁹“Yin, akadi awobeni ame tye kedi, myero kur imat wunu koŋo olok onyo kit mattoro ocele ame mero jo i kare ame iwot wunu i ke ma me rwatte, me kur ito wunu; mano bino bedo cik atwal naka i kare ikwaewu luŋ.

¹⁰Myero iŋe poko wunu jami acil kede jami ocele, kede kin jami ame cik ogeŋo kede jami a cik oye.

¹¹Dok daŋ ibino pwonyo wunu jo Icrael cik luŋ ame Rwot ociko kun kobo baŋ Muca.”

¹²Muca te kobbi Aron kede awobe mere a rik odoŋ: Eleajar kede Itamar ni, “Kwany wunu moko kwon me yalo Obaŋa ame odoŋ i kom mot ame owaŋo i mac baŋ Rwot, icam wunu i ŋet keno lam kun mom orubo i tobi, pien mano en gin acil meicel.

¹³Cam wunu i kakannoro acil, pien mano en gin a myero yin icam kede gin a myero awobeni cam i kom mot ame owaŋo me yalo Rwot; pien rik ocika kittono.

¹⁴Ento ogokkere ame oyoko kede amuru atyeko doŋ miyo oko me mot olamdog ame oya i kom mot me kweyo cuny ame jo Icrael oyalo kede Obaŋa. Mano itwero wunu camo kakannoro acil, yin karacel kede awobeni kede anyirani, pien mano obedo iner ame myero yin icam kede iner ame awobeni myero cam.

¹⁵Amuru ame amio olamdog kede ogokkere ame oyoko me kweyo cuny myero kelgi karacel kede mot awaŋa i mac, ame obedo dwollege, me ayoka i nyim Rwot, eka te bedo megi karacel kede me awobeni; mano en iner ame myero migi kare ducu kite a Rwot rik ociko kede.”

¹⁶Muca te penyo pi dyel me yalo Obaŋa pi bal kun penyo momot, en te nwoŋo ni doŋ owaŋo oko! Akemo te mako Muca atek i kom Eleajar kede Itamar, awobe Aron ame rik onwoŋo odoŋ, te kobo ni,

¹⁷“Piŋo kara mom icamo wunu gin oŋolo oyalo Obaŋa pi bal i kabedo acil? Pien mano en gin acil meicel ame omiowu, me itiŋ wunu bal a lwak, me tiyo tic me kwanyo bal i komgi i nyim Rwot.

¹⁸Koŋ inen remo mere mom doŋ otero i kabedo acil. Rik onwoŋo myero icam wunu i kabedo acil, kite a rik ociko kede.”

¹⁹Aron te gamo dog Muca ni, “Nen ba, tin doŋ gin oyalo Obaŋa i motgi me bal kede motgi me awaŋa i nyim Rwot; kadi amano, gin acalo man opoto i koma. Kono ce onwoŋo tin acamomot me bal, kono Rwot opwoa.”

²⁰Kare ame Muca owinyo, yie doŋ te kwe.