Read lango Olevi 11 Bible Online

Olevi 11 - lango bible

Olevi 11

¹Rwot okobbi Muca kede Aron ni,

²“Kobbi wunu jo Icrael ni, Magi en gin ame tye kede kwo ame ibino wunu camo i kom leyi luŋ ame tye i wi lobo.

³Leyi luŋ ame lwet tyengi okaro aryo, kun akina tyengi okaro aryo, dok daŋ omedo nyamo cem a koŋ omwonyo oko i yigi, ame tye i akina leyi, itwero camo wunu.

⁴Kadi amanno, i akina leyi ame medo nyamo cem a koŋ omwonyo oko i yigi, onyo ame lwet tyengi okaro aryo, myero kur icam wunu magi: Inaga, pien kadi bed medo nyamo cem a koŋ omwonyo, cite lwet tyene mom okaro aryo, mano cik mom oyewu camo.

⁵Anyeri daŋ, en daŋ medo nyamo cem a koŋ omwonyo, cite lwet tyene mom okaro aryo, mano daŋ cik mom oyewu camo.

⁶Apwoo daŋ, en daŋ kadi medo nyamo cem a koŋ omwonyo, cite lwet tyene mom okaro aryo, mano daŋ cik mom oyewu camo.

⁷Puno daŋ, kadi bed lyet tyene mom okaro aryo kun akina tyene okaro aryo, mom medo nyamo cem a koŋ omwonyo, mano daŋ cik mom oyewu camo.

⁸Kur icam wunu rinogi, kur daŋ igud wunu komgi ka ce oto, cik mom oyewu gudo.

⁹“I kom gin akwo luŋ a bedo i pii ibino wunu camo magi: Itwero wunu camo gin i pii luŋ ame tye kede icikigir kede pok komgi, en a tye i nam kede en a tye i kulo.

¹⁰Ento gin luŋ ame tye i nam kede i kulo ame mom tye kede icikigir kede pok komgi, i akina gin ame corre nya i pii, kede i akina gin akwo a bedo i pii, gin luŋ obedo me kwer baŋwu.

¹¹Gin bino bedo me kwer baŋwu nakanaka; mom ibino wunu camo riŋogi, dok daŋ komgi oto obedo me kwer baŋwu.

¹²Ginnoro luŋ ame tye i pii ame mom tye kede icikigir kede pok komgi, obedo me kwer baŋwu.

¹³“I akina winy, gin ame bino bedo me kwer baŋwu ame mom ibino wunu camo, gin ene ame bino bedo me kwer: cur, acut, ekokom,

¹⁴ogole, ocecu kede eponegi luŋ,

¹⁵kite agak luŋ kede eponegi,

¹⁶udo, ojoro, jigijigijur olwit kede kite epone mere luŋ,

¹⁷tula, alwinyalwiny, adyeladyel.

¹⁸Okumbere, etolo, ewuma,

¹⁹araptela, ogoro kede kite epone mere luŋ, otebakori kede olikolik.

²⁰“Kite kudi luŋ ame tye kede bwomgi ame woto i tyengi aŋwen, gin luŋ obedo me kwer baŋwu.

²¹Kadi bed amannono, i akina kudi ame woto kede tyengi aŋwen, itwero camo wunu en ame tyengi ame opye kede i wi lobo bocoboco.

²²I akinagi itwero camo wunu: bonyo kede kite eponegi luŋ, ocenne kede kite eponegi luŋ, odir kede kite eponegi luŋ, kede otwoŋo kede kite eponegi luŋ,

²³Ento kudi ocele luŋ ame tye kede bwomgi, dok tyengi daŋ tye aŋwen, gin luŋ bino bedo me kwer baŋwu.

²⁴“Ginnono luŋ, bino miyo idoko wunu jo a cik ogeŋo; ŋattoro ame bino gudo komgi oto, bino doko ŋat a cik ogeŋo tuno otyeno,

²⁵dok daŋ ŋat ame bino mako kakannoro i komgi, bino lwoko boŋo mere eka te bedo ŋat a cik ogeŋo naka otyeno.

²⁶Leyi luŋ ame lwet tyengi okaro aryo, ento akina tyengi mom okaro aryo onyo mom omedo nyamo cem a kon omwonyo i yigi, gin luŋ obedo me kwer baŋwu, ŋat ogudo komgi bino bedo ŋat acik ogeŋo.

²⁷Leyi luŋ daŋ ame woto i wi tyengi, ame tye i akina leyi luŋ ame woto i tyengi aŋwen, gin luŋ cik ogeŋowu oko iye. Ŋat ame bino gudo komgi a doŋ oto, bino bedo ŋat a cik ogeŋo naka otyeno.

²⁸Dok daŋ ŋattoro keken ame bino tiŋo komgi a doŋ oto, bino lwoko boŋŋi mere te bedo ŋat a cik ogeŋo naka otyeno; gin luŋ obedo gin ame cik ogeŋowu iye oko.

²⁹“I akina gin a corre nya i wi lobo, magi obedo gin ame cik ogeŋowu iye oko: oculi, oyoo, agwedegwede adoŋo mege kede kite eponegi luŋ,

³⁰amwomwol, ŋec, agwedegwede, agwedegwede me kwoyo, kede agogo.

³¹Magi luŋ obedo gin ame cik ogeŋowu iye oko i akina gin a corre, nya luŋ; ŋattoro keken ame bino gudo komgi ka doŋ oto, bino bedo ŋat a cik ogeŋo naka otyeno.

³²Dok ginnoro keken ame kom moro i akinagi a doŋ oto orette iye, bino bedo gin a cik ogeŋo, kadi bed obedo ginnoro ame otio i yat onyo boŋo aruka, onyo lao, onyo puku, kadi ginnoro keken ame otio kede i yore moro; myero lut i pii, eka te bedo gin a cik ogeŋo naka otyeno; icennere doŋ twero bedo gin a cik oye.

³³Dok ka moro i akinagi orette i kom gin ame otio kede lobo, gin onwoŋo tye iyi ginnono luŋ bino bedo gin a cik ogeŋo, dok obino ne ko ginnono oko.

³⁴Cammoro ame onwoŋo tye i yie ame romo acama, ame otwero onyo iye pii, bino bedo gin ame cik ogeŋo; kede ginnoro me amata ame onwoŋo tye i kodi jamini ame romo amata, bino bedo gin a cik ogeŋo.

³⁵Dok ginnoro luŋ ame dulloro keken me kom ginnoro oto ogudo, bino bedo gin a cik ogeŋo; kadi keno onyo tuke keno, obino babaro oko atitino; gin doŋ bino bedo gin a cik ogeŋowu i komgi oko.

³⁶Kadi bed amanno, waŋ akoŋ onyo bur ame pii poŋ iye bino bedo gin a cik mom ogeŋo; ento ginnoro keken ame bino gudo kodikommono a doŋ oto, bino bedo gin a cik ogeŋo.

³⁷Ka komgi a doŋ oto orette i kom kotimoro me acoa ame onwoŋo myero co, koti-nono cik mom bino geŋo;

³⁸ento ka kotinono onwoŋo tye i pii, eka kodikom oto-nono te rette gudo kakannoro i kom koti-nono, bino miyo koti-nono bedo gin a cik ogeŋowu iye oko.

³⁹“Ka ce lee moro ame icamo wunu oto, ŋat ogudo kome oto-nono bino bedo a cik ogeŋo naka otyeno.

⁴⁰Doŋ ŋat ame ocamo riŋo mere oto-nono bino lwoko boŋŋi mere, eka te bedo ŋat a cik ogeŋo naka otyeno. Ŋat a daŋ otiŋso kom oto-nono bino lwoko boŋŋi mere, eka te bedo ŋat a cik ogeŋo naka otyeno.

⁴¹“Ginnoro luŋ ame corre nya i wi lobo obedo gin me kwer baŋwu; mom ibino camo wunu,

⁴²Ginnoro luŋ ame mol amola kede korgi kede ginnoro luŋ ame wo to i tyengi aŋwen onyo ame tye i tyengi apipim, ginnoro luŋ ame corre nya i wi lobo, mom ibino camo wunu; pien gin obedo gin me kwer baŋwu.

⁴³Kur ilokere idok wunu gin me kwer kenwu pi gin a corre, nya; dok daŋ kur iballe wunu kenwu kedgi, naka mio idoko wunu gin a cik ogeŋo.

⁴⁴Pien an a Rwot Obaŋawu, pi mannono kwerre wunu kenwu ibed wunu acil, pien an daŋ acil. Kur iballe wunu kenwu i ginnoro a corre, nya, ame lak alaka i wi lobo.

⁴⁵Pien an a Rwot ame akwanyowu i lobo Miciri, me abed Obaŋawu; pi mannono myero ibed wunu jo acil, pien an daŋ acil.”

⁴⁶Man en cik a mako leyi kede winnyi kede gin akwo luŋ ame kwaŋ i pii, kede ginnoro luŋ ame corre, nya i wi lobo,

⁴⁷me poko gin a cik ogeŋo kede gin a cik oye, kede gin akwo ame myero cam kede a mom myero cam.