Read lango Olevi 14 Bible Online

Olevi 14 - lango bible

Olevi 14

²“Man bino bedo cik a mako won two dobo i nino ame myero en lonyere iye. Obino kele baŋ alamdog;

³eka alamdog te ya wot oko i ŋe gony, te ŋiyo kome. Ka onwoŋo ni two dobo doŋ ocaŋ oko i kome,

⁴alamdog bino miyogi okelo winyo a kwo aryo a cik mom ogeŋo pi ŋat ame omito lonyo karacel kede yat cedar kede uci arema kede yat ogudo.

⁵Alamdog bino miyogi otwomo pii amol ote onyo i tako lobo, ote neko winyo acel i wi pii-nono.

⁶Alamdog bino mako winyo akwo karacel kede yat, cedar kede uci arema ca kede ogudo, te lutogi luŋ karacel i winyo akwo iyi remo winyo ame oneko malo i wi pii amol.

⁷En bino kiro tyen abiro i kom dano ame obino me lonyere i two dobo; alamdog doŋ te tuco kannaler ni en doŋ olony oko, eka en te weko winyo akwo ca twarre wot i tim.

⁸Ŋat ame obino me lonyerenono bino doŋ lwoko boŋŋi mere te daŋ lyelo yer luŋ i kome, te lwokere kede pii, en doŋ doko dano olony ame cik mom ogeŋo. I ŋe mano en doŋ twero bino i gony, cite pwod bino buto oko i ŋe kema mere pi nino abiro.

⁹I nino me abiro mere, en bino lyelo yer wie ducu kede tike kede yer i del waŋe karacel kede yer i kome luŋ. En dok bino lwoko boŋŋi mere kede kome daŋ i pii, en doŋ te lony.

¹⁰“I nino me aboro, en bino tero itino nyogi rommi aryo ame roccoro mom i komgi kede akale romo ame dittere romo mwaka acel, a daŋ roccoro mom i kome kede mot yalo Obaŋa me moko kwon ame romo gwata adek me moko apwottere orubo kede moo, kede dok moo ame romo cupa acel.

¹¹Alamdog ame alonyo dano-nono, en ame bino tero dano-nono karacel kede jami mere, te ketogi i nyim Rwot i doggola kema me rwatte.

¹²Alamdog bino kwanyo nyok romo acel te yalo Obaŋa me wal akino i roc, karacel i moo cupa acel, bino yokogi me mot ayoka i nyim Rwot.

¹³En bino neko atin romo-nono kan ame oneko iye mot me bal kede mot awaŋa, i kan acil; pien mot me walakino i roc rom aroma i mot bal, gin luŋ bedo me alamdog; mano en dul acil meicel.

¹⁴Alamdog bino gweto remo me mot oŋolo me walakino i me te cwicwinyo i yit dano ame alonyo-nono tuŋ cem kede i twon ciŋe tuŋ cem kede i twon tyene tun cem.

¹⁵Alamdog te kwanyo moo ame romo cupa acel ca, te tono aduno i cuny ciŋe tun cem,

¹⁶te luto nyako ciŋe tuŋ cem i moo ame tye i cuny ciŋe tuŋ cam, eka te kikiro moo i nyako ciŋe-nono tyen abiro i nyim Rwot.

¹⁷Moo odoŋ i ciŋe, en bino cwicwinyo i alago yit dano ame olonyo tuŋ cem, kede i twon ciŋe tun cem, kede i twon tyene tuŋ cem, i kom remo mot oŋolo me walakino i roc.

¹⁸Moo ame odoŋ i ciŋ alamdog, en bino weweo i wi ŋat ame alonyo. Alamdog bino tiyo tic me kwanyo bal i kome i nyim Rwot.

¹⁹Alamdog bino yalo Obaŋa i mot me bal, me kwanyo bal i kom dano ame alonyo me mom dok bed ŋat a cik ogeŋo. I ŋe mannono, en doŋ bino neko mot awaŋa,

²⁰eka alamdog te yalo Obaŋa i mot awaŋa karacel kede mot me moko kwon i wi keno lam. Alamdog bino tiyo tic me kwanyo bal i kome kittono, en doŋ te lony bedo ŋat a cik mom ogeŋo.

²¹“Cite ka en acan ame mom romo nwoŋo mannono luŋ, en bino kelo atin nyok romo acel me mottere me walakino i roc, me ayoka me kwanyo bal i kome, kede moko kwon apwottere gwata acel ame orubo kede moo me mot moko kwon, kede moo cupa acel.

²²Dok daŋ bino kelo amam aryo onyo itino awele aryo, kite ame en romo nwoŋo kede; acel bino bedo me mot bal, acel me mot awaŋa.

²³I nino me aboro en bino kelo baŋ alamdog pi lonyere mere i doggola kema me rwatte i nyim Rwot.

²⁴Alamdog bino tero atin romo me mot walakino i roc karacel kede moo ame romo cupa acel, bino yokogi me ayoka i nyim Rwot.

²⁵En doŋ te neko atin romo me mot walakino i roc; bino gweto remo mot oŋolo me walakino i roc, te cwicwinyo i alago yit dano ame alonyonono tuŋ cem kede twon ciŋe tuŋ cem, kede i twon tyene tuŋ cem.

²⁶Alamdog te tono moo aduno i cuny ciŋe tuŋ cem,

²⁷te kikiro moo i cuny ciŋe-nono i nyako ciŋe me tuŋ cem tyen abiro i nyim Rwot.

²⁸Alamdog bino cwicwinyo moo mogo i cuny ciŋe-nono i alago yit dano ame alonyo-nono tuŋ cem kede i twon ciŋe tuŋ cem kede i twon tyene tuŋ cem, kan ame ocwicwinyo iye remo mot walakino i roc.

²⁹Moo ame odoŋŋere luŋ i ciŋ alamdog, en bino weweo i wi dano ame alonyo me kwanyo bal i kome i nyim Rwot.

³⁰En bino miyo moro acel i kom amam onyo itino awele kite ame en romo nwoŋo,

³¹me mot bal, acel me mot awaŋa, karacel kede mot me moko kwon; alamdog bino tiyo tic me kwanyo bal i kom dano ame alonyo-nono i nyim Rwot.

³²Man en cik a mako lon ame two dobo ame mom romo nwoŋo mot me lonyere mere.”

³³Rwot okobo baŋ Muca kede Aron ni,

³⁴“Ka doŋ ituno wunu i lobo me Kanaan, ame amiowu me bedo megwu, ka ce abino keto two dobo i ottoro i lobo ame ibino wunu gamo-naca,

³⁵won ot bino wot tito baŋ alamdog kun kobo ni, ‘Two moro nen calo tye i oda.’

³⁶Alamdog bino miyo ocoko jami i ottono okelo oko, me ot doŋ yie nono ame en alamdog pwod mom ru odonyo iye me ŋiyo two, me kur tuc kannaler ni jami luŋ i ottono cik ogeŋo oko; icennere alamdog doŋ bino donyo ka ŋiyo ot.

³⁷En bino ŋiyo two; ka onwoŋo two-nono tye i kor apama a kun obedo tworo tworo, onyo tye arema rema, ka ce onen ni odonyo atut i kor apama,

³⁸alamdog bino donyo i ottono woto i doggola, te cego dog ottono oko pi nino abiro.

³⁹I nino me abiro mere alamdog dok bino dwogo neno. Ka onwoŋo two onya omedde i kor apama,

⁴⁰alamdog bino miyo omuko matafali gweŋe ame two tye iye-nono oko, ote bolo i ŋe boma kan a mom cil.

⁴¹Dok daŋ bino miyo ocwero kor apama iyi ot luŋ, eka lobo ame ocwero i kor apama ote wot onyo oko i ŋe boma kan a mom cil.

⁴²Eka ote doŋ kelo matafali me gweŋe ocele, ote keto kan ame okwanyo iye maca, ote daŋ dok kelo lobo ocele puyo kede kor apama-nono luŋ.

⁴³“Ka two dok obelle i ottono kun onwoŋo doŋ omuko gweŋe ca oko, dok daŋ ocwero kor apama, ote puyo daŋ oko,

⁴⁴alamdog dok bino dok wot neno. Ka onwoŋo two onya omedde i ottono, mano nwoŋo two dobo ame ŋoŋolo jami ame tye i ot; ottono doŋ ot ame cik ogeŋo.

⁴⁵En bino mumuko ot tu reto oko piny; gweŋe mere, yennere kede lobo ame opuo kede luŋ, obino tero oko i ŋe boma kan a mom cil.

⁴⁶Dano ame bino donyo i ot-tu kare ame ocego oko, bino bedo ŋat a cik ogeŋo naka otyeno.

⁴⁷Dano ame obuto piny i ot-tu, bino lwoko boŋŋi mere; ŋat ame ocemo i ot-tu, daŋ bino lwoko boŋŋi mere.

⁴⁸“Cite ka alamdog obino te ŋiyo ot-tu, eka mom te nwoŋo two onya omedde geye i kare ame opuo kede, alamdog bino tuco kannaler ni ot-tu gire mom cik ogeŋo, pien two iye ocaŋ oko.

⁴⁹Doŋ me lonyo ot tu, en bino kelo itino winy aryo karacel kede yat cedar, kede uci arema kede yat acalo ogudo.

⁵⁰Alamdog bino miyo otwomo pii amol i tako lobo, ote neko winyo acel malo i wi pii-nono.

⁵¹Alamdog bino mako yat cedar kede ogudo kede uci arema karacel kede winyo akwo, te lutogi luŋ i remo winyo ame oneko malo i wi pii amol, te kikiro i kor apama tyen kany wie aryo.

⁵²En bino lonyo ot i remo winyo, karacel kede pii amol, kede winyo akwo kede yat cedar, kede yat acalo ogudo kede uci arema kittono,

⁵³En te weko winyo akwo ca twarre wot i tim i ŋe boma. En bino tiyo tic me kwanyo bal i kom ot kittono, ot te doŋ bedo ame olony.”

⁵⁴Man en cik a mako kit two dobo luŋ; two akukuc,

⁵⁵two dobo me ruk onyo me ot,

⁵⁶onyo me kan okwot, onyo odugo, onyo del kom ococola,

⁵⁷me nyuto ka cik ogeŋo onyo mom ogeŋo Man en cik a mako two dobo.