Read lango Olevi 15 Bible Online

Olevi 15 - lango bible

Olevi 15

¹Rwot okobo baŋ Muca kede Aron ni,

²“Kobbi jo Icrael ni, Ka lo moro tut mollo i kome, tut ame mollo-nono mio ebedo ŋat a cik ogeŋo.

³Doŋ man en cik a mako ŋat a cik ogeŋo pi cwer a tut, kadi tutu mollo i kome onyo tut ame mollo i kome doŋ ogikoko; mano mio cik geŋe.

⁴Itanda moro keken ame ŋat a tut mollo i kome obuto iye, bino doko itanda ame cik ogeŋo, kede ginnoro luŋ a en obedo iye, bino doko gin a cik ogeŋo.

⁵Ŋat ame bino gudo itanda mere, bino lwoko boŋŋi mere, te lwoko kome daŋ kede pii, eka te bedo ŋat a cik ogeŋo tuno naka otyeno.

⁶Ŋat ame obedo i ginnoro ame ŋat a tut mollo i kome obedo iye, bino lwoko boŋŋi mere, te lwoko daŋ kome kede i pii, eka te bedo ŋat a cik ogeŋo tuno naka otyeno.

⁷Ŋat ame ogudo kom ŋat a kome mollo tut, bino lwoko boŋŋi mere, te lwoko daŋ kome eka te bedo ŋat a cik ogeŋo tuno naka otyeno.

⁸Ka ŋat ame tut mollo i kome oŋulo lao i kom dano moro ame cikkoro mom ogeŋo, danonono bino lwoko boŋŋi mere, te lwoko daŋ kome kede pii, eka te bedo ŋat a cik ogeŋo tuno naka otyeno.

⁹Kommoro ame obedo kede i wi inaga ame ŋat a kome mollo tut obedo iye, bino bedo gin a cik ogeŋo.

¹⁰Ŋat ame ogudo ginnoro ame en obedo iye, onyo obuto iye, bino bedo ŋat a cik ogeŋo tuno naka otyeno; kede ŋat ame otiŋo kodi ginnono, bino lwoko boŋŋi mere, te lwoko daŋ kome kede pii, eka te bedo ŋat a cik ogeŋo tuno naka otyeno.

¹¹Ka dano a tut mollo i kome ogudo kom dano moro kun mom ologo ciŋe kede pii, dano ame ogudo bino lwoko boŋŋi mere, te lwoko daŋ kome kede pii, eka te bedo ŋat a cik ogeŋo tuno naka otyeno.

¹²Ka dano a kome mollo tut ogudo gulu lobo moro, obino neko gulu lobo-nono oko; ginnoro me amaka luŋ ame otio kede yat, obino lwoko komgi kede pii.

¹³“Ka dano moro ame tut mollo i kome doŋ olony oko, en bino kwano nino kany wie aryo me lonyere mere pire kene, te lwoko boŋŋi mere, te lwoko daŋ kome i pii ame mol, te doŋ bedo ŋat a cik mom ogeŋo.

¹⁴I nino me aboro mere en bino tero amam aryo onyo itno awele aryo, te bino i nyim Rwot i doggola kema me rwatte, te miyogi baŋ alamdog.

¹⁵Alamdog miogi kun mio acel me mot bal, acel me mot awaŋa, alamdog bino tiyo tic me kwanyo bal i kome kittono i nyim Rwot, pi tut ame onwoŋo obedo mollo i kome.

¹⁶“Ka remo a lo moro me co oony i kome, en bino lwoko kome luŋ kede pii, te bedo ŋat a cik ogeŋo tuno naka otyeno.

¹⁷Rukkoro onyo pyennoro ameremo me co omol iye, obino lwoko kede pii, te bedo gin a cik ogeŋo tuno naka otyeno.

¹⁸Ka ico obuto kede dako eka remo mere me co te ŋolle ony oko i komgi, gin aryo luŋ bino lwokere kede pii, gin te bedo jo a cik ogeŋo tuno naka otyeno.

¹⁹“Ka ce remo me kwer me two dwe ocwer i kom dako i kite me nino ducu, en bino bedo nino kany wie aryo pi kwerrere-nono, ŋat ame ogudo kome bino bedo ŋat a cik ogeŋo tuno naka otyeno.

²⁰Ginnoro keken ame en obuto iye i kare ame en tye ikwer, bino bedo gin a cik ogeŋo, dok ginnoro luŋ ame en obedo iye, gin luŋ bino bedo jami a cik ogeŋo.

²¹Ŋat ogudo itanda mere myero lwok boŋŋi mere, te lwoko daŋ kome kede pii, eka te bedo ŋat a cik ogeŋo tuno naka otyeno.

²²Ŋat ogudo kom gin ame en obedo iye, bino lwoko boŋŋi mere, te lwoko daŋ kome kede pii, eka te bedo ŋat a cik ogeŋo tuno naka otyeno.

²³Kadi itanda onyo ginnoro ame en obedo iye, ŋat ogudo bino bedo ŋat a cik ogeŋo tuno naka otyeno.

²⁴Ka lo moro obuto kede, eka remo two mere te gudo kome, en bino bedo ŋat a cik ogeŋo nino abiro, dok itanda moro keken ame en obuto iye, bino bedo gin a cik ogeŋo.

²⁵“Ka ce remo obedo cwer i kom dako moro pi kare alac kun mom cwer i kare me two dwe keken, onyo ka ce remo mere me kwer cwer kare alac alaca, dannono bino medde bedo ŋat a cik ogeŋo i kare luŋ ameremo mere tye ka cwer i kome bala i kare ame two too dwe.

²⁶Itanda moro keken ame en obuto iye i kare ameremo mere tye ka cwer, bino bedo baŋe acalo itanda me twoyo two kwerrere, dok ginnoro luŋ ame en obedo iye, bino bedo gin a cik ogeŋo kite ame cik geŋe kede i kare me two dwe.

²⁷Ŋat ogudo jami magi bino bedo ŋat a cik ogeŋo; bino lwoko boŋŋi mere te lwoko daŋ kome kede pii, eka te bedo ŋat a cik ogeŋo tuno naka otyeno.

²⁸Cite ka dako ameremo kwer cwer i kome doŋ olwoko two mere oko en bino kwano nino abiro me lonyere mere pire kene, icennere en bino bedo dako a cik mom ogeŋo.

²⁹I nino me aboro mere en bino tero amam aryo onyo awele aryo, te kelo baŋ alamdog i doggola kema me rwatte.

³⁰Alamdog bino miyo acel me mot me bal, acel me mot awaŋa; alamdog bino tiyo tic me kwanyo bal i kome kittono i nyim Rwot pi remo ame obedo cwer i kome te miyo en bedo ŋat a cik ogeŋo.

³¹“Ibino poko wunu jo Icrael ame cik ogeŋo kittono, me gin kur to kun cik pwod ogenogi pi balo kemana ame tye i akinagi.”

³²Man en cik a mako ico ame tut mollo i kome kede ico ameremo mere me co oony i kome te miyo en doko ŋat a cik ogeŋo,

³³kede dako ame two too me kwer. Man en cik a mako ŋattoro keken, ico onyo dako, ame tut mollo i kome onyo remo cwer i kome, kede ico ame obuto i dako ame cik ogeŋo.