Read lango Olevi 16 Bible Online

Olevi 16 - lango bible

Olevi 16

¹Rwot okobo baŋ Muca i kare ame awobe Aron aryo doŋ oto oko, pien i kare a rik gin onwoŋo onoko nyim Rwot aceggi, gin rik te to oko.

²Rwot te kobbi Muca ni, “Kobbi ominni Aron ni myero kur ebed donyo i kabedo acil i kare luŋ, kan ame boŋo icika owumo i nyim kom-me-kica ame tye i wi canduk me kur eto; pien abino nen i pol i wi kom-me-kica.

³Ento en bino donyo i kabedo acil i jami magi: atin twon me mot me bal kede nyok romo me mot awaŋa.

⁴En bino ruko kanyi acil me boŋo camanini, kun daŋ oruko pali me boŋo camanini i kome, te tweyo pyere kede itambara me boŋo camanini, dok daŋ otweo wie itambara adwala i wie. Magi-nono gin boŋŋi me aruka acil; en bino lwoko kome kede pii eka te rukogi.

⁵En bino daŋ gamo i baŋ lwak jo Icrael nyogi dyegi aryo me mot bal kede nyok romo acel me mot awaŋa.

⁶Aron bino yalo Obaŋa i twon me bed mot me ballere en ikome, kun tio tic me kwanyo bal i kome kede i kom jo me ode.

⁷En dok bino kelo dyegi aryo-ca, te keto i nyim Rwot i doggola kema me rwatte.

⁸En bino bolo kwir i kom dyegi aryo-nono, kwir acel me a Rwot kede ocele me Ajajal.

⁹Dyel ame kwir a Rwot opoto i kome, Aron bino kela te yalo Obaŋa me bed mot me bal.

¹⁰Cite dyel ame kwir Ajajel opoto i kome obino tero akwo i nyim Rwot me ti tic me kwanyo bal i kome, eka ote cwaye wot oko i tim baŋ Ajajel.

¹¹“Aron bino yalo Obaŋa i twon me mot me ballere en ikome, kun tio tic me kwanyo bal i kome kede i kom jo me ode. En bino neko twon me bed mot me ballere en ikome.

¹²En bino kwanyo tabo me waŋo odok akur ame lodi mac tye iye poŋ kun kwanyo i wi keno lam ame tye i nyim Rwot, dok daŋ bino juko odok akur ame ocacanyo oluro atitino poŋ ciŋe aryo, eka te kelogi i tyelo kan ame boŋo icika owumo.

¹³En bino onyo odok akur i mac i nyim Rwot me yitto odok akurrono adwoŋŋere duny mwon kom kom-me-kica oko, ame bedo i wi canduk me kop me caden, me kur eto.

¹⁴En dok bino tero remo twonnono mogo, te totono i nyako ciŋe i kom kom-me-kica tuŋ nyime, te dok totono remo-nono i nyako ciŋe tyen kany wie aryo kun totono piny i nyim kom-mekica.

¹⁵“Kare ame man otum, en bino neko dyel ame rik tye pi lwak me yalo Obaŋa pi bal, te tero remo mere i tyelo kan ame boŋo icika owumo, eka te tic i remo-nono kite ame otimo kede i kom remo twon. En bino totono remo-nono i wi kom-me-kica kede i nyim kom-mekica,

¹⁶Aron bino tiyo tic me kwanyo bal i kom kabedo acil kittono, pi gigi mogo ame mio jo Icrael bedo jo a me mom olony ame cik ogeŋo, kede pi timgi mogo areco kede kit balgi ocele luŋ. Dok bino daŋ timo amannono i kema me rwatte ame bedo i akinagi kede i dyegi gin luŋ miogi obedo jo ame mom olony ame cik geno.

¹⁷I kare ame en donyo i kabedo acil pi tiyo tic me kwanyo bal, ŋattoro myero kur bed i kema me rwatte ituno ka en doŋ otyeko donyo oko kun doŋ otyeko tiyo tic me kwanyo ballere en ikome kede bal i kom jo me ode kede i kom jo Icrael luŋ ame ocokere.

¹⁸En te wot i nyim keno lam ame tye i nyim Rwot, te tiyo tic me kwanyo bal i kom keno lam. En bino kwanyo remo twon mogo, kede remo dyel te cwicwinyo i tuŋ aŋwen ame tye i keno lam, bino cwicwinyo romo komgi luŋ.

¹⁹En dok bino totono remo iye tyen kany wie aryo kun lonyo, kwero doko acil kun kwanyo gigi mogo luŋ ame mio jo Icrael bedo jo a mom olony ame cik ogeŋo.

²⁰“Kare ame en doŋ otyeko tiyo tic me kwanyo bal i kom kabedo acil, kede i kom kema me rwatte, kede keno lam, en bino kelo dyel akwo;

²¹eka Aron te keto ciŋe ryoryo luŋ i wi dyel akwo, kun tuco bal luŋ ame jo Icrael otimo, kede timgi mogo areco kede kit bal luŋ ame gin otimo. En bino ketogi luŋ i wi dyellono, te cwayogi wot oko i tim, kun dano ame oyero en ame tero.

²²Dyel bino tiŋo balgi i kome, woto kede i tim ata; dano otero-nono bino gonyo dyel woto gire i tim.

²³“Aron dok bino donyo i kema me rwatte, te gonyo boŋŋi camanini ame onwoŋo en oruko i kare ame donyo i kabedo acil, te weko oko kuno.

²⁴En bino lwoko kome kede pii i kakannoro acil te ruko boŋŋi mere i kome, eka te doŋ donyo oko yalo Obaŋa i mot awaŋa ame tye pire, kede mot awaŋa ame tye pi lwak, kun tio tic me kwanyo bal i keme kede i kom lwak.

²⁵Dwol me mot awaŋa en bino waŋo i wi keno lam.

²⁶Ŋat otero dyel te wot cwayo baŋ Ajajel bino lwoko boŋŋi mere, tec lwoko daŋ kome kede pii, i ŋe mano en doŋ twero bino i gony.

²⁷Twon kede dyel me yalo Obaŋa pi bal ame onwoŋo otero remogi i kabedo acil me tiyo tic me kwanyo bal, obino tero i ŋe gony; pyengi kede riŋogi kede weegi obino waŋo i mac.

²⁸Ŋat owaŋo bino lwoko boŋŋi mere, te lwoko daŋ kome kede pii, i ŋe mano en doŋ twero donyo i gony.

²⁹“Man bino bedo cik baŋwu nakanaka ni, dwe me kany wie aryo nino dwe tomon, ibino bedo wunu kede kumo kun cunywu cwer. Kur igud wunu ticcoro, kadi anywali me lobo, kadi arokkoro ame bedo i akinawu.

³⁰Pien i nino-nono en ame abino tiyo iye tic me kwanyo bal i komwu me ibed ame ilony wunu. Myero ibed ame ilonyere wunu i kom balwu luŋ i nyim Rwot.

³¹Nino-nono bino bedo cabit me weowu mot, ibino wunu bedo i kumo kun cunywu cwer. Man en cik ame bino bedo atwal.

³²Alamdog ame obino wiro kede moo i kare me kete i dog ticcere me alamdog kun leo kaka pappere, en bino tiyo tic me kwanyo bal kun oruko boŋŋi acil me camanini.

³³En bino tiyo ticcere me kwanyo bal i kom kabedo acil, dok te tiyo tic me kwanyo bal i kom kema me rwatte i kom keno lam. Eka dok te tiyo tic me kwanyo bal i kom olamdog kede i kom jo luŋ ocokere.

³⁴Man bino bedo cik baŋwu ame perakino atwal ni myero ti tic me kwanyo bal i kom jo Icrael mwaka acel icel, pi balgi luŋ.” Muca daŋ te limo kite a Rwot ocike kede.