Read lango Olevi 18 Bible Online

Olevi 18 - lango bible

Olevi 18

¹Rwot okobbi Muca ni

²“Kobbi jo Icrael ni, An a Rwot Obaŋawu.

³Mom ibino timo wunu kite ame otimo kede i lobo me Miciri a rik ibedo wunu iye; dok daŋ mom ibino timo wunu kite ame otimo i lobo me Kanaan kan ame aterowu iye-ni. Mom ibino lubo wunu cikgi.

⁴Ibino wunu tiyo gin ame aciko kun igwoko wunu icwilla, dok daŋ ilubo wunu. An a Rwot Obaŋawu.

⁵Pi mannono ibino wunu gwoko icwilla kede gin ame aciko. Timo kittono bino miyo dano kwo; An a Rwot.

⁶“Dano moro i akinawu mom bino noko laŋet wattere me buto kede; an a Rwot.

⁷Mom ibino buto i totti, pappi gire en a buto kede; mano obedo totti, yin mom ibino buto kede.

⁸Mom ibino buto i ci-pappi, pappi gire en a buto kede.

⁹Mom ibino buto aminni ame obedo nyaka a pappi onyo nyaka a totti, kadi onywalo paco onyo onywalo kun ocele.

¹⁰Mom ibino buto i nyaka a wodi onyo nyaka a nyari, pien komgi obedo komi yin i komi.

¹¹Mom ibino buto i nyaka ci-pappi, ame pappi en onywalo, pien en obedo aminni.

¹²Mom ibino buto amin pappi, pien en obedo wat a pappi.

¹³Mom ibino buto amin totti, pien en obedo wat a totti.

¹⁴Mom ibino buto i dako omin a pappi, kur inok laŋet cege, pien en obedo dako omin pappi.

¹⁵Mom ibino buto i dako a wodi, pien en obedo ci-wodi; mom ibino buta kede.

¹⁶Mom ibino buto i dako ominni, pien ominni gire en a buto kede.

¹⁷Mom ibino buto i dako moro eka dokite buto daŋ i nyare; mom daŋ ibino tero nyaka wode kadi nyaka a nyare me wot buto kede. Gin gire obedo watini; mano tim me ipyeda.

¹⁸Mom ibino nyomo amuni me bedo nyek aminnere, kun ibuto kede ame aminnere pwod kwo.

¹⁹“Mom ibino noko laŋet dako me buto kede i kare ame en tye kede two dwe, kun mom ru olony.

²⁰Mom daŋ ibino buto i dako awotti, bino miyo iballe oko.

²¹Mom ibino miyo atinni moro me awŋa i mac baŋ Molek, me pyedo nyiŋ Obaŋani; an a Rwot.

²²Mom ibino buto ico wadwu bala ibuto i dako; mano tim me kwer.

²³Mom daŋ ibino balle keni pi buto kede lee moro; dako moro daŋ myero kur mi lee but kede; mano tim me ipyeda.

²⁴“Kur iballe wunu kenwu i ginnoro i kom jami magi pien rok luŋ ame atyeko ryemogi oko i nyimwu-ni, gin obedo balle kengi i kodi timmono,

²⁵te miyo lobo balle, te miya keto can i kome pi ballere, eka lobo te noko jo a bedo iye oko.

²⁶Ento wun myero igwok wunu icwilla kede cikka, kun mom itimo wunu ginnoro me kwer i kom jami magi luŋ, kadi ŋat onywalo i lobowu, onyo welo onyo arokkoro ame bedo i akinawu.

²⁷Pien jami me kwerrono luŋ wegi lobo-nono obedo tiyo, ame gin jo a yam otelo nyimwu; mano te miyo lobo balle oko.

²⁸Kur itim wunu timmoro ame balo lobo, naka mio lobo ŋokowu oko, kite ame onoko kede rok ame otelo nyimwu.

²⁹Ŋat ame bino timo ginnoro i kom jami magi me kwer, ŋat otimo-nono obino miyo waŋe rwenyo oko i akina jo me turgi.

³⁰Doŋ ba, myero igwok wunu gin ame aciko, kur iti wunu ticcoro me kwer ame yam obedo timo i nyimwu, kur iballe wunu kenwu kedgi; an a Rwot Obaŋawu.”