Read lango Olevi 19 Bible Online

Olevi 19 - lango bible

Olevi 19

¹Rwot dok te kobbi Muca ni,

²“Kobbi lwak jo Icrael ni, Bed wunu jo acil, pie an abedo Rwot Obaŋawu ame acil.

³Ŋat acel acel i akinawu myer wor tottere kede pappere, dok myero gwok cabitta luŋ; an a Rwot Obaŋawu.

⁴Kur ilokere idok wunu baŋ cal jogi, ite tiyo wunu obaŋa mogo me nyonyo ame itwako wunu atwaka pirwu kenwu; an a Rwot Obaŋawu.

⁵“Ka iyalo wunu Rwot i motwu me kweyo cuny, ibino wunu miyo i yore ame mio Obaŋa ye gamowu.

⁶Myero cam oko i nino ame oŋolo iye-nono, onyo orwo mere; en odoŋŋere naka i nino me adekkere, obino waŋo awaŋa kede mac.

⁷Ka ce dok ocamo i nino me adekkere, bino doŋ doko gin me kwer; Obaŋa mom dok bino ye gamo.

⁸Ŋat ame ocamo-nono ballere gire bino dok i wie, pien opyedo gi a Rwot ame cil; dano-nono obino miyo waŋe rwenyo oko i akina jo me turgi.

⁹“Ka ikaa wunu cam ame oceki lobowu, myero kur ika wunu yi poto luŋ aluŋa tuno naka i laŋaete;

¹⁰dok daŋ kur irarao wunu en obwoto wanwu luŋ aluŋa i tyene, dok kur idep wunu nyig olok opoto piny i poto olok; ibino weko wunu magi-nono me konyo ocan kede orok ame bedo i akinawu; an a Rwot Obaŋawu.

¹¹“Kur ikwal wunu ginnoro, kadi timo tim me goba goba, onyo bwolle wunu kenwu kenwu.

¹²Kur ikwoŋ wunu kwoŋ me goba kede nyiŋa, ame mio ipyedo nyiŋ Obaŋani; an a Rwot.

¹³“Kur ibur awotti, dok daŋ kur ima jami mere. Kur imi ocara apakaca ri baŋi tuno naka odiko.

¹⁴Myero daŋ kur iyet adiŋyittoro, kur daŋ iri dulloro i nyim atowaŋ, ento myero ilwor Obaŋani, an a Rwot.

¹⁵“Kur ileŋere wunu i ŋolo kop; kur daŋ idwor wunu ocan i pido mere, kadi lo moro adit, ento ŋol kop atira i kom awotti.

¹⁶Kur ibed rimo piny i akina jo turwu me yeyeto jo kur daŋ ikel kopporo pi neko awotti; an a Rwot.

¹⁷“Kur idag ominni i cuny, ento juk awotti ajuka, me ballere kur bed i wii.

¹⁸Kur icul kwor, kur daŋ ibed akemo moro i cunyi i kom jo me turwu; ento mar dano wadwu acalo imarre keni; an a Rwot.

¹⁹“Ibino gwoko wunu icwilla. Mom ibino miyo wunu limwu akwo nywal i kit lee moro ocele a mom epone mere; mom daŋ ibino wunu coyo koti aryo apapat i poto acel; dok daŋ kur iruk wunu boŋo moro ame ocweo i kit uci aryo apapat.

²⁰“Kacelo moro obuto i nyannoro ame obedo aŋeca, ame doŋ onwoŋo otyeko moko me miyo baŋ ŋat ocele, kun nyannono mom ru oculo limmoro me lakoro onyo ogonyo, obino poro koppere apora. Mom obino nekogi pien nyannono onwoŋo mom loye kene.

²¹En lonnono bino tero mottere me walakino i roc baŋ Rwot, i doggola kema me rwatte, bino tero nyok romo me mot me walakino i roc.

²²Alamdog bino tiyo tic me kwanyo bal i kome i nyim Rwot kun tio i nyok romo me mot walakino i roc, pi bal ame etimonono; Rwot daŋ bino weko ballere.

²³“Ka doŋ ituno wunu i lobo-naca, eka ite pito wunu iye kwone yen luŋ me acama, ibino wunu koŋ geyo tero wunu nyiggi acalo gin ogeŋo ni kur cam; ogeŋowu camo nyiggi oko pi mwakki adek, myero kur icam wunu.

²⁴I mwaka me aŋwennere, nyiggi luŋ bino bedo gin acil, mot ame omio me pako Rwot.

²⁵Cite i mwaka me kannyape, itwero wunu doŋ camo nyiggi, me nyiggi nyak abup pirwu; an a Rwot Obaŋawu.

²⁶“Kur icam wunu riŋo moro kun remo tye iye. Mom daŋ ibino wunu tyet, mom ibino wunu lamo amuk.

²⁷Kur ilyel wunu te wiwu, kur daŋ ilyel wunu laŋet tikwu.

²⁸Mom daŋ ibino ŋoŋolo wunu komwu pi kwero cola a jo oto, kadi kekedo komwu; a Rwot.

²⁹“Kur imi anyirawu dok ipyeda pi bedo alaya, mio lobo balle oko i tim me, ipyeda.

³⁰Gwok wunu cabit mera, wor wunu daŋ kabedona acil; an a Rwot.

³¹“Kur ilokere idok wunu baŋ okor tipo onyo emuroko; kur iyenygi wunu; mio iballe wunu oko pirgi, an a Rwot Obaŋawu.

³²“Ibino wunu ya malo i nyim dano a wie obuko lwar; dok myero iwor wunu ŋat oti; lwor wunu daŋ Obaŋawu; an a Rwot.

³³“Ka ce arokkoro bedo i akinawu, mom ibino wunu timo ginnoro arac i kome.

³⁴Arok me bedo i akinawu, ibino bedo kede calo anywalli me lobowu, ibino wunu mare acalo imarre kenwu; pien wun daŋ yam ibedo wunu orok i lobo me Miciri; an a Rwot Obaŋawu.

³⁵“Kur itim wunu ginnoro arac i ŋolo kop, i pimo bor a ginnoro, onyo pek a ginnoro, onyo dit a ginnoro.

³⁶Myero ibed wunu i mijan ame pimo jami kakare, kede ratili abeco, kede dita me pimo kal aber, kede tabo me pimo moo aber; an a Rwot Obaŋawu ame rik akwanyowu i lobo Miciri.

³⁷Myero igwok wunu icwilla luŋ, kede gin ame aciko luŋ; dok daŋ icob wunugi; an a Rwot.”