Read lango Olevi 20 Bible Online

Olevi 20 - lango bible

Olevi 20

¹Rwot okobo baŋ Muca ni,

²“Kobbi jo Icrael ni, Dano moro i akina jo Icrael onyo arok ame bedo i akina jo Icrael ame omio atinnere baŋ Molek, obino neko oko; lwak bino nanapo ananap kede gweŋe.

³An ikoma abino ciko waŋa i kom dano-nono, abino miyo waŋe rwenyo oko i akina jo me turgi, pien omio atinnere baŋ Molek, kun balo i kabedona acil, dok pyedo daŋ nyiŋa acil.

⁴Ka ce lwak mom ociko waŋgi i kom dano-nono kun en mio atinnere baŋ Molek, eka mom daŋ ote neko gigi dano-nono,

⁵an ikoma abino ciko waŋa i kom dano-nono kede i kom jo me doggola mere, abino miyo waŋe rwenyo oko i akina jo me turgi, en karacel kede jo luŋ ame lube i timo tim me coco baŋ Molek.

⁶“Ka cedano moro olokere odoko baŋ okor tipo kede baŋ emuroko kun timo tim me coco dok lubogi daŋ, abino ciko waŋa i kom dano-nono, abino miyo waŋe rwenyo oko i akina jo me turgi.

⁷Kwerre wunu kenwu ibed wunu jo acil, pien an a Rwot, Obaŋawu.

⁸Gwok wunu i cwilla luŋ kun daŋ icobo wunu, pien an a Rwot, an ame alonyowu idoko wunu acil.

⁹Pi mannono dano moro ame bino ceno tottere onyo pappere, obino neko oko; pien nwoŋo en oceno pappere onyo tottere, remo mere gire bino bedo i wie.

¹⁰“Ka lo moro ocodo dako awottere, ico kede dako ame ocode-nono obino neko oko.

¹¹Dano ame obuto i ci-pappaere, nwoŋo okelo lewic i kom pappere, obino neko gin aryo luŋ, remogi bino dok i wigi.

¹²Ka ce lo moro obuto i ci-wode, obino neko gin aryo luŋ; gin nwoŋo otimo tim me kwer, remogi bino dok i wigi.

¹³Ka lo moro obuto ico wadgi acalo dako, gin aryo luŋ nwoŋo otimo tim me kwer, gin aryo luŋ obino nekogi oko, remogi bino dok i wigi.

¹⁴Ka lo moro onyomo dako eka dok te buto i totta a dako mere, manno nwoŋo otimo tim me kwer; obino waŋogi luŋ kede mac, ico kede mon aryo-nono luŋ, me wek timmoro me kwer kur timere i akinawu.

¹⁵Ka ce dano moro obuto kede lee obino neko oko; lee daŋ obino neko oko.

¹⁶Ka dako moro onoko laŋet lee te miyo buto kede, obino neko dako-nono oko karacel kede lee daŋ; obino nekogi oko, remogi bino bedo i wigi.

¹⁷“Ka ce lo moro otero aminnere ame obedo nyakka a pappere onyo nyakka a tottere, ce en oneno kome me mon, nyako daŋ te neno mege me co, gin nwoŋo otimo tim me lewic, obino nekogi kun jo me turgi tye anene. Pien en obuto aminnere, ballere gire bino bedo i wie.

¹⁸Ka ce lo moro obuto i dako ame tye kede two dwe, en nwoŋo mom oworo remo ame acwer i kom dako-nono, dako daŋ lewic mom omako i remo mere ame onwoŋo cwer; gin aryo luŋ waŋgi bino rwenyo oko i akina jo me turgi.

¹⁹Kur ibut amin totti onyo amin pappi; mannono nwoŋo ibuto i wattini; balgi bino bedo i wigi.

²⁰Ka ce lo moro obuto i dako omin pappere, mannono nwoŋo obuto i dako omin pappere ame omin pappere gire en ame buto kede; balgi bino dok i wigi, gin bino to aboŋo atinnoro.

²¹Ka lo moro obuto i ci-ominnere, nwoŋo otimo tim me kwer; nwoŋo obuto i dako ame ominnere gire en ame buto kede, gin daŋ bino to aboŋo atinnoro.

²²“Pi mannono myero igwok wunu i cwilla luŋ kede gin ame aciko ducu, myero icob wunugi, me lobo ame aterowu iye-nono kur ŋokwu oko.

²³Wun myero kur ilub wunu kite a rokkoro ame atye ka ryemo oko i nyimwu-ni; pien gin otimo kodi ginnono luŋ, en omio yia okwerogi oko.

²⁴Cite atyeko kobo baŋwu ni, ‘Ibino wunu leyo lobogi, an abino miyo baŋwu me bed megwu, lobo ame opoŋ i cak kede moo kic’ An a Rwot Obaŋawu, ame apokowu oko i kom rok ocele.

²⁵En omio myero wun ipok wunu gin akwo a myero cam kede a mom myero cam, kede winy ame ocamo kede en a mom ocamo. Myero kur iballe wunu idok wunu gin me kwer pi lee moro onyo pi winyo moro onyo pi ginnoro ame nya corre i wi lobo, i akina magi luŋ ame an doŋ atyeko pokogi oko pat pirwu, ni myero gin bed gin a cik ogeŋo.

²⁶Myero ibed wunu jo acil i nyima, pien an Rwot acil. An doŋ atyek o pokowu oko i kom rok ocele luŋ wek ibed wunu mega.

²⁷“Ico moro onyo dako moro ame obedo akor tipo onyo emuroko, obino neko oko; obino nanapogi oko kede gweŋe, remogi bino dok i wigi.”