Read lango Olevi 21 Bible Online

Olevi 21 - lango bible

Olevi 21

¹Rwot okobbi Muca ni, “Kob baŋ olamdog, awobe Aron, kob baŋgi ni, Ŋattoro i akinagi myero kur balle kene pi gudo kom ŋat oto i akina jo me turgi,

²kono onyo kom wattoro keken ame ceggi kedgi, acalo pappere onyo tottere, wode, nyare, ominnere,

³onyo aminnere a mom ru oŋeye kede ico moro. En nwoŋo pwod wattere aceggi, pien cware pwod mom; en twero balle pire te doko ŋat a cik ogeŋo.

⁴Kadi bed en doŋ tye acalo won paco i akina jo turgi, myero en kur balle kene, te miyo en pyedde kene.

⁵Myero gin kur lyel dye wigi; kur daŋ olyel laŋet yer tikgi, mom daŋ oŋolo komgi.

⁶Gin bino bedo jo acil baŋ Obaŋagi, kun mom opyedo nyiŋ Obaŋagi, pien gin obedo jo ame mio mot owaŋo i mac baŋ Rwot, ame en cam Obaŋagi; pi mannono myero gin bed jo acil.

⁷Gin myero mom nyom dako ame alaya, onyo dannoro ame doŋ ŋat ocele obalo oko; mom daŋ obino nyomo dako a cware oryemo; pien alamdog obedo ŋat acil baŋ Obaŋa mere.

⁸Ibino gwoke wunu ebed acil, pien en mio cam Obaŋani; en bino bedo acil baŋi, pien an a Rwot ame alonyowu ibedo wunu acil, an daŋ acil.

⁹Ka ce nyaka alamdoggoro odoko ipyeda pi timo tim me coco, nwoŋo opyedo pappere; obino waŋo nyannono oko kede mac.

¹⁰“Alamdog ame adwoŋ i akina omego mere, ame otyeko daŋ kwero oko i kare ame okete i dog ticcere, wek oruk boŋŋi acillege mom bino gonyo yer wie ony iyak ata, dok daŋ mom bino yeco rukkere;

¹¹mom daŋ bino donyo i ot ame kom dano oto tye iye, mom bino balle kene, kadi pi pappere onyo tottere.

¹²Mom bino donyo oko i kabedo acil, mom bino pyedo kabedo Obaŋa mere ame cil, pien moo wir a rikokwere kede baŋ Obaŋa mere tye i kome, an a Rwot.

¹³En bino nyomo nyako a mom ru oŋeye kede lo moro.

¹⁴Myero kur nyom dako a cware oto, onyo dako a cware oryemo, onyo dako moro a doŋ lon ocele obalo oko, onyo dako ame alaya; en myero nyom nyako me turgi a mom ru oŋeye kede lo moro,

¹⁵me wek en kur pyed itino mere i akina jo me turgi, pien an a Rwot ame alonye ebedo acil.”

¹⁶Rwot dok te kobbi Muca ni,

¹⁷“Kobbi Aron ni, Dano moro i akinawu a roccoro tye i kome mom bino noko Rwot aceggi me miyo cam Obaŋa mere naka i kare ikwaewu luŋ.

¹⁸Pien dano a roccoro tye i kome mom bino noke aceggi, dano acalo atowaŋ, aŋwalo, onyo ŋattoro ame poo tye i waŋe, onyo ame tyene onyo bade tuncel bor okato kare,

¹⁹onyo lon a tyene otur, onyo a bade otur,

²⁰onyo lon a kore ogunakino, onyo lon acek meicel, onyo lon ame two moro obalo oko, onyo ame two too gwenyo onyo oŋoloŋol, onyo ginnoro owaŋo mane.

²¹Dano moro i akina ikwae Aron ame roccoro tye i kome mom bino noko Rwot aceggi, me miyo mot awaŋa i mac baŋ Rwot; ka ce roccoro tye i kome, mom bino noko Rwot accegi me miyo cam Obaŋa mere.

²²En twero camo cam Obaŋa mere aryo luŋ, en acillere meicel kede jami acillere;

²³cite myero kur nok boŋo icika aceggi, kur daŋ bin cok i keno lam, pien roc tye i kome; me en kur pyed kabedona acil, pien an a Rwot ame alonyogi obedo acil.”

²⁴Muca daŋ te kobo kittono baŋ Aron kede awobe mere kede baŋ jo Icrael luŋ.