Read lango Olevi 22 Bible Online

Olevi 22 - lango bible

Olevi 22

¹Rwot dok te kobbi Muca ni,

²“Titti Aron kede awobe mere ni myero gin ogwokere i kom jami a jo Icrael acil ame gin doŋ okwero oko pira, me wek gin kur opyed nyiŋa acil; an a Rwot.

³Kobbigi ni, ‘I kare ikwaewu luŋ ka ce ŋattoro i akinawu onoko ginnoro acil ame jo Icrael doŋ okwero pi Rwot, kun dano-nono tye kede ginnoro i kome ame mio en bedo ŋat a cik ogeŋo, wan dano-nono bino rwenyo oko i nyima; an a Rwot.’

⁴Ŋattoro ame i akina ikwae Aron ame won dobo onyo ame tut mollo i kome, myero kur cam ginnoro acil tuno ka kome olony. Ŋat ame bino gudo ginnoro a cik ogeŋo pi gudo kom dano oto, onyo lo ameremo mere me co oony i kome,

⁵onyo ŋat ame ogudo ginnoro ame lak alaka ame twero miyo en doko ŋat a cik ogeŋo, onyo ŋat ogudo dano ame cik ogeŋo ame twero miyo en daŋ doko ŋat a cik ogeŋo, onyo kit ginnoro keken ame twero miyo en doko ŋat a cik ogeŋo,

⁶ŋat ame ogudo kodi ginnono bino bedo ŋat a cik ogeŋo tuno naka otyeno, dok daŋ mom bino camo ginnoro acil ka mom ru olwoko kome kede pii.

⁷En bino doko ŋat a cik mom ogeŋo ka cen doŋ opoto, icennere en doŋ twero camo gin acil, pien kodi cemmono mere.

⁸Dano-nono myero kur cam lee oto kene onyo ame lee tim omwodo, me en kur balle kede kene; an a Rwot.

⁹Pi mannono myero gin gwok gin ame aciko me bal kur bed i wigi, te miyogi to oko ka ce gin opyedde i kome; an a Rwot ame alonyogi obedo acil.

¹⁰“Ŋattoro ata myero kur cam ginnoro acil. Ŋat a bedo baŋ alamdog onyo apakaca mere myero kur cam gin acil.

¹¹Ento ka alamdog onwoŋo owilo opii kede limmere, ame dok te doko calo jami mere ikome, en opiinono twero camo; opii ame onywalo i ode daŋ twero camo.

¹²Ka ce lo moro ata onyomo nyaka alamdog, nyare-nono myero kur cam gin acil ame oyalo Obaŋa.

¹³Cite ka nyaka alamdoggono cware doŋ oto oko, onyo oryemo oko kun mom ru onywalo atinnoro, eka en te dwogo tuŋ a pappere kite a rik en obedo kede iye i kare ame pwod tidi, en doŋ twero camo cam a pappere, cite ŋattoro myero kur cam.

¹⁴“Ka ce ŋattoro ocamo gin acil kun mom ocamo me akaka, en bino culo waŋ gin ame ecamo-nono kun medo acel me abic iye, te doŋ dwoko gin acillono baŋ alamdog.

¹⁵Olamdog myero kur pyed jami a jo Icrael acil ame gin doŋ otyeko miyo baŋ Rwot,

¹⁶me bal kede roccere kur bed i wigi pi camo cemgi acil; pien an a Rwot ame alonyogi obedo acil.”

¹⁷Rwot dok te kobbi Muca ni,

¹⁸“Kobbi Aron kede awobe mere, karacel kede jo Icrael luŋ ni, Ka ce ŋattoro me doggola Icrael onyo ŋattoro ame bedo iyi Icrael, omio mottere me yalo Obaŋa, kadi bed omio me cobo kwon, onyo me ber a yic kun mio baŋ Rwot me mot awaŋa.

¹⁹Rwot bino gamo ka ikelo wunu mot a roccoro mom i kome, kadi bed ikwanyo wunu i akina dok onyo romi onyo akina dyegi.

²⁰Kur ikel wunu ginnoro a roccoro tye i kome, pien Rwot gire mom bino gamo pirwu.

²¹Dok ka dano moro omio mot baŋ Rwot me kweyo cuny, pi cobo kwoŋ onyo me ber a yic, kun okwanyo mottere-nono i akina dok onyo i akina romi onyo dyegi, Rwot bino gamo en ame balloro mom i komgi; myero roccoro kur bed i komgi.

²²Lee ame waŋe oto onyo ame tyene otur onyo oŋol oko, onyo ame tut mollo i kome, onyo oŋoloŋol omako, onyo kannoro odugo tye i kome, mom myero imi wunu baŋ Rwot; kur imi wunu me mot owaŋo i mac baŋ Rwot i wi keno lam.

²³Twon onyo romo ame dul kome moro bor atek onyo cek atek itwero wunu miyo me mot me ber a yic; ento ka me mot me cobo kwoŋ, Rwot mom bino gamo.

²⁴Kur iyal wunu Rwot kede lee moro ame odino mane oko, onyo ame oroo oko, onyo ame okao mane akaa, onyo ame oŋolo mane oko, kur iyal wunu Rwot i kodi mannono i lobowu.

²⁵Dok daŋ kur iyal wunu Rwot i kodi lee-nono ame iwilo wunu i baŋ a rokkoro me cam Obaŋawu, Rwot gire mom bino gamo pirwu, pien komgi roc tye iye pi bal ame onwoŋo tye iye-nono.”

²⁶Rwot dokokobo baŋ Muca ni,

²⁷“Ka onywalo atin twon onyo romo onyo dyel, myero koŋ bed baŋ tottere pi nino abiro; cakere i nino me aboro nwoŋo doŋ otwero gamo me bedo mot owaŋo i mac baŋ Rwot.

²⁸Kadi tottere obedo min dyan onyo min romo, myero kur nekgi luŋ nino acel, tottere kede atinnere.

²⁹Ka iyalo wunu Rwot i mot me pwoc, myero itim wunu i yore ame mio Rwot twero pwoyowu.

³⁰Myero cam i nino ame omio iyenono; myero kur wek moro iye doŋ tuno naka odiko; an a Rwot.

³¹“Pi mannono myero igwok wunu icwilla luŋ, dok daŋ icob wunugi; an a Rwot.

³²Kur ipyed wunu nyiŋa ame cil, jo Icrael myero ŋe ni an acil; an a Rwot ame lonyowu ite bedo wunu acil,

³³ame rik akwanyowu i lobo Miciri, me an abed Obaŋawu; an a Rwot.”